തിരുവല്ലയിൽ വീണ്ടും കല്ലറക്കള്ളന്മാർ; മതവികാരം വ്രണപ്പെടുത്തിയതിനും കേസെടുത്തേക്കും

തിരുവല്ലയിൽ വീണ്ടും കല്ലറയിൽ നിന്ന് ഗ്രാനൈറ്റ് മോഷണം. മല്ലപ്പള്ളി വെങ്കലശ്ശേരി മാർത്തോമ്മാ പള്ളിയിലെ കല്ലറയിൽ വിരിച്ചിരുന്ന ഗ്രാനൈറ്റ് പാളിയാണ് മോഷണം പോയത്. കഴിഞ്ഞ ദിവസം മങ്കുഴപ്പള്ളി പള്ളിയിലെ കല്ലറയിൽ നിന്നും ഗ്രാനൈറ്റ് മോഷണം നടന്നിരുന്നു. ഇതോടെ രണ്ട് പള്ളികളിലെ കല്ലറകളിലാണ് സമാന മോഷണങ്ങൾ റിപ്പോർട്ട് ചെയ്തിരിക്കുന്നത്.

ആറടി നീളവും മൂന്നടി വീതിയുമുള്ള ഗ്രാനൈറ്റ് പാളികളാണ് മോഷ്ടിക്കപ്പെട്ടത്. മല്ലപ്പള്ളി മാർത്തോമ്മാ പള്ളിയിൽ എല്ലാ ഞായറാഴ്ചയും സെമിത്തേരിയിൽ പ്രത്യേക ആരാധന നടക്കാറുണ്ട്. പതിവുപോലെ ആരാധനയ്ക്കെത്തിയ വിശ്വാസികളാണ് കല്ലറയിലെ ഗ്രാനൈറ്റ് പാളി നഷ്ടമായതായി ആദ്യം ശ്രദ്ധിച്ചത്.

മങ്കുഴപ്പള്ളിയിലെ മോഷണവുമായി ബന്ധപ്പെട്ട് നേരത്തേ തന്നെ പൊലീസ് കേസെടുത്തിരുന്നു. ഇടവക അധികൃതരുടെ പരാതിയെ തുടർന്ന് കീഴ്‍വായ്പൂർ പൊലീസാണ് അന്വേഷണം ആരംഭിച്ചത്. രണ്ട് മോഷണങ്ങൾക്കും പിന്നിൽ ഒരേ സംഘമാകാമെന്നാണ് പൊലീസിന്റെ പ്രാഥമിക നിഗമനം.

വളരെ ഭാരമേറിയ ഗ്രാനൈറ്റ് പാളികളായതിനാൽ ഒരാൾക്ക് മാത്രമായി അവ മാറ്റിക്കൊണ്ടുപോകാൻ കഴിയില്ലെന്നും, പിക്കപ്പ് ട്രക്ക് പോലുള്ള വലിയ വാഹനങ്ങളുമായെത്തിയ സംഘമാണ് മോഷണത്തിന് പിന്നിലെന്നുമാണ് പൊലീസ് സംശയിക്കുന്നത്.

സിസിടിവി ക്യാമറകളില്ലാത്ത സെമിത്തേരികളെയാണ് സംഘം ലക്ഷ്യമിട്ടതെന്നാണ് അന്വേഷണ സംഘം വിലയിരുത്തുന്നത്. അതിനാൽ സമീപത്തെ പ്രധാന റോഡുകളിലെ സിസിടിവി ദൃശ്യങ്ങൾ കേന്ദ്രീകരിച്ചാണ് അന്വേഷണം പുരോഗമിക്കുന്നത്.

കല്ലറയിൽ നിന്ന് വിലപിടിപ്പുള്ള ഗ്രാനൈറ്റ് പാളികൾ മോഷ്ടിച്ചതിന് പ്രധാനമായും മോഷണക്കുറ്റമാണ് ചുമത്തുക. ഭാരതീയ ന്യായ സംഹിത (BNS) സെക്ഷൻ 303 പ്രകാരം ഇതിന് മൂന്ന് വർഷം വരെ തടവോ പിഴയോ അല്ലെങ്കിൽ രണ്ടും ഒരുമിച്ചോ ലഭിക്കാം.

എന്നാൽ, മതപരമായ വികാരങ്ങളെ വ്രണപ്പെടുത്തുന്ന തരത്തിൽ സെമിത്തേരിയിൽ അതിക്രമിച്ച് കയറി നാശനഷ്ടം വരുത്തിയതായി അന്വേഷണത്തിൽ തെളിഞ്ഞാൽ കൂടുതൽ ഗുരുതര വകുപ്പുകളും ചുമത്താൻ സാധ്യതയുണ്ട്. BNS സെക്ഷൻ 301 പ്രകാരം ഒരു വർഷം വരെ തടവോ പിഴയോ അല്ലെങ്കിൽ രണ്ടും ഒരുമിച്ചോ ലഭിക്കാം. ഇതുകൂടാതെ പൊതുമുതൽ നശിപ്പിക്കൽ, നിയമവിരുദ്ധമായി ഒത്തുചേരൽ തുടങ്ങിയ വകുപ്പുകളും ചേർത്താൽ കൂടുതൽ കർശനമായ ശിക്ഷ ലഭിക്കാനും സാധ്യതയുണ്ട്.