ബാങ്കോക്ക് ട്രിപ്പ് ഭാര്യ അറിയാതിരിക്കാന്‍ പാസ്പോര്‍ട്ടിലെ പേജ് കീറി; അറസ്റ്റ്

പാസ്പോര്‍ട്ടിലെ പേജുകള്‍ കീറിക്കളഞ്ഞ സംഭവത്തില്‍ 51കാരന്‍ പിടിയില്‍. പൂണെ സ്വദേശിയായ വിജയ് ഭലേറാവുവാണ് മുംബൈ വിമാനത്താവളത്തില്‍ പിടിയിലായത്. ബാങ്കോക്കിലേക്ക് നാലുവട്ടം യാത്ര പോയ വിവരം ഭാര്യയില്‍ നിന്നും മറച്ച് വയ്ക്കുന്നതിനായാണ് പാസ്പോര്‍ട്ടിലെ പേജുകള്‍ കീറിയതെന്ന് ഇയാള്‍ ചോദ്യം ചെയ്യലില്‍ സമ്മതിച്ചു. 

വിജയ്​യുടെ പാസ്പോര്‍ട്ടിലെ 17,18 പേജുകളും 21 മുതല്‍ 26 വരെയുള്ള പേജുകളും കാണാതായതോടെയാണ് സംശയമുണ്ടായത്. ഇതിന് മുന്‍പുള്ള പേജുകളില്‍ തായ്​ലന്‍ഡ് സന്ദര്‍ശിച്ച വിവരങ്ങള്‍ രേഖപ്പെടുത്തിയിരുന്നുവെന്ന് അസിസ്റ്റന്‍റ് ഇമിഗ്രേഷന്‍ ഓഫിസര്‍ രാജിവ് കുമാര്‍ പൊലീസിന് നല്‍കിയ പരാതിയില്‍ ചൂണ്ടിക്കാട്ടുന്നു. ചോദ്യം ചെയ്യലില്‍ തുടക്കില്‍ വിജയ് നിസഹകരിച്ചെങ്കിലും തുടര്‍ന്ന് തുറന്ന് പറയുകയായിരുന്നു.

തിങ്കളാഴ്ച പുലര്‍ച്ചയോടെയാണ് എമിഗ്രേഷന്‍ വിഭാഗം വിജയ്​യെ പിടികൂടുന്നത്. കഴിഞ്ഞ വര്‍ഷം നാലുവട്ടം ബാങ്കോക്കിലേക്ക് പോയത് കൂടാതെ ഈ മാസവും മുംബൈ വിമാനത്താവളത്തില്‍ നിന്നും വിജയ് ഇന്തൊനേഷ്യയിലേക്ക് പോയിരുന്നതായും ഉദ്യോഗസ്ഥര്‍ കണ്ടെത്തി.  തുടര്‍ന്ന് വിജയ്​യെ സഹര്‍ പൊലീസ് സ്റ്റേഷനിലെത്തിക്കുകയും പാസ്പോര്‍ട്ട് നിയമവും ഭാരതീയ ന്യായ് സംഹിതയുമനുസരിച്ചുള്ള വകുപ്പുകള്‍ ചുമത്തുകയും ചെയ്തു. കേസില്‍ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.