30 കോടി രൂപയുടെ തിരുവോണം ബംപർ TL 360615 നമ്പറിനാണ്. ടിക്കറ്റ് വിറ്റത് കണ്ണൂരിലാണെന്ന വിവരവും പുറത്തുവന്നു. ആരാണ് ഭാഗ്യശാലി എന്നതു മാത്രമെ ഇനി അറിയേണ്ടതുള്ളൂ. ഭാഗ്യശാലി ഒരാളാണോ ഒന്നിലധികം പേരുണ്ടോ എന്നതിനെ ആശ്രയിച്ച് ശ്രദ്ധിക്കേണ്ട കാര്യങ്ങളിലും വ്യത്യാസമുണ്ടാകും. ഒന്നിലധികം പേർ ഷെയറിട്ടെടുത്ത ടിക്കറ്റാണെങ്കിൽ ഒരാൾ ക്ലെയിം ചെയ്ത് ബാക്കിയുള്ളവർക്ക് സമ്മാനത്തുക വീതംവച്ച് കൊടുക്കുകയാണെങ്കിൽ രണ്ടു തവണ നികുതി ബാധ്യത വരും. ഭാഗ്യാവാന്‍ ശ്രദ്ധിക്കേണ്ട കാര്യങ്ങള പറ്റി മനോരമ ന്യൂസ്.കോമുമായി സംസാരിക്കുകയാണ് ചാർട്ടേഡ് അക്കൗണ്ടന്റായ സുബിൻ വി.ആർ.
എത്ര രൂപ കയ്യിൽ കിട്ടും
30 കോടി രൂപ ഒന്നാം സമ്മാനമുള്ള ഓണം ബംപറടിച്ചാല്‍ 10 ശതമാനം ഏജൻസി കമ്മീഷനായി പിടിക്കും. മൂന്നു കോടി രൂപ അങ്ങനെ കുറയും. ബാക്കി വരുന്ന 27 കോടി രൂപയിലാണ് നികുതി ഈടാക്കുക. 27 കോടി രൂപയുടെ 30 ശതമാനം ടിഡിഎസ് ഈടാക്കിയാണ് ലോട്ടറി വകുപ്പ് തുക അനുവദിക്കുക. ടിഡിഎസ് 8.10 കോടി രൂപയാണ്. ഈ നികുതിക്ക് മുകളിൽ 25 ശതമാനം സർചാർജ് വരും. 2,02,50,000 രൂപ സർചാർജായി ലോട്ടറിയടിച്ചയാള്‍ അടക്കണം. സർചാർജ് അടക്കമുള്ള തുകയുടെ നാലു ശതമാനം ഹെല്‍ത്ത് ആന്‍ഡ് എജ്യുക്കേഷന്‍ സെസ് കൊടുക്കണം. 40,50,000 രൂപ വരുമിത്. ആകെ 10.53 കോടി രൂപ നികുതിയായി നല്‍കണം. ഇതു കുറച്ച് 16.47 കോടി രൂപ മാത്രമാണ് കയ്യില്‍ കിട്ടുക.
ഒരാള്‍ ക്ലെയിം ചെയ്താല്‍
30 കോടി രൂപ ഒരാള്‍ ക്ലെയിം ചെയ്താല്‍ 30 കോടി രൂപയ്ക്കും ആ വ്യക്തിയുടെ പേരില്‍ നികുതി പേരില്‍ ടിഡിഎസ് ഈടാക്കും. 30 കോടിയുടെ ബാധ്യത ക്ലെയിം ചെയ്തയാളുടെ പേരില്‍ വരും. ഈ തുക ബാക്കിയുള്ളവര്‍ക്ക് വീതിച്ചാല്‍ അത് ഗിഫ്റ്റ് ആയാണ് പരിഗണിക്കുക. അടുത്ത ബന്ധുവല്ലാത്തവരില്‍ നിന്നും 50,000 രൂപയില്‍ കൂടുതല്‍ സ്വീകരിച്ചാല്‍ ഈ തുകയ്ക്ക് ഓരോരുത്തരുടെയും നികുതി സ്ലാബ് അനുസരിച്ച് നികുതി നല്‍കേണ്ടി വരും. ലോട്ടറി സമ്മാനത്തുക വലിയ സംഖ്യായതിനാല്‍ സര്‍ചാര്‍ജും സെസും ബാധകമാകും. അങ്ങനെ ഒരേ തുകയ്ക്ക് ഇരട്ട നികുതി നല്‍കേണ്ടി സാഹചര്യം വരും.
ജോയിന്‍റ് ഡിക്ലറേഷൻ ഫോം സമര്‍പ്പിക്കാം
ഇതിനു പരിഹാരമായി സമ്മാനമടിച്ച ലോട്ടറി സമര്‍പ്പിക്കുമ്പോള്‍ തന്നെ ലോട്ടറി വകുപ്പില്‍ ജോയിന്‍റ് ഡിക്ലറേഷന്‍ ഫോം സമര്‍പ്പിക്കണം. ഇതില്‍ സമ്മാനടിച്ച ലോട്ടറിയിലുള്ളവരുടെ പേരും പാന്‍ വിവരങ്ങളും കൃത്യമായി രേഖപ്പെടുത്തണം. ലോട്ടറി വകുപ്പ് ഓരോരുത്തരുടെയും ടിഡിഎസ് പിടിച്ച് പണം അനുവദിക്കും. ഓരോരുത്തവര്‍ക്കും അവരവരുടെ വിഹിതം ലഭിക്കുകയും പ്രത്യേകം സെസും സര്‍ചാര്‍ജും സെസും അടയ്ക്കുകയും വേണം.
Also Read: ഓണം ബംപറില്‍ 21 പേര്‍ കോടിപതികളാകും; ഒരു ടിക്കറ്റില്‍ സര്‍ക്കാറിന് എത്ര രൂപ കിട്ടും
ഒരു കോടി സമ്മാനമടിച്ചാല്‍ എത്ര രൂപ ലഭിക്കും
രണ്ടാം സമ്മാനമായ ഒരു കോടി രൂപ 20 പേര്‍ക്കാണ് ലഭിക്കുക. ഒരു കോടി സമ്മാനം ലഭിക്കുന്നൊരാള്‍ക്ക് 63 ലക്ഷം രൂപയാണ് കയ്യില്‍ കിട്ടുക. 10 ശതമാനം ഏജന്‍സി കമ്മീഷനായി 10 ലക്ഷം രൂപ പോകുന്നതോടെ 90 ലക്ഷം രൂപയ്ക്കാണ് ടിഡിഎസ് ഈടാക്കുക. 27 ലക്ഷം രൂപയാണ് ടിഡിഎസ്. ഇതിനൊപ്പം സര്‍ചാര്‍ജും സെസും ബാധകമാകും. 50 ലക്ഷം രൂപ മുതല്‍ ഒരു കോടി രൂപ വരെ 10 ശതമാനമാണ് സര്‍ചാര്‍ജ്. 27 ലക്ഷത്തിന്‍റെ 10 ശതമാനമായ 2.7 ലക്ഷം രൂപ സര്‍ചാര്‍ജമായി നല്‍കണം. ടിഡിഎസും സര്‍ചാര്‍ജും ചേരുന്ന തുകയുടെ നാലു ശതമാനമായ 1,18,800 രൂപ സെസായും അടയ്ക്കണം.