ആസ്റ്റർ‌ ഡിഎം ഹെൽത്ത്കെയര്‍– ക്വാളിറ്റി കെയര്‍ ലയനം ഉടൻ; നടപടികള്‍ നിര്‍ണായക ഘട്ടത്തില്‍

ആസ്റ്റർ ഡി.എം ഹെൽത്ത്‌കെയറും ക്വാളിറ്റി കെയർ ഇന്ത്യയും തമ്മിലുള്ള ലയന നടപടികൾ നിർണായക ഘട്ടത്തിലേക്ക്. ഓഹരി ഉടമകളുടെയും അൺസെക്യൂർഡ് ട്രേഡ് ക്രെഡിറ്റേഴ്സിന്റെയും അംഗീകാരം തേടുന്നതിനായി യോഗം വിളിക്കാൻ നാഷണൽ കമ്പനി ലോ ട്രിബ്യൂണൽ ഹൈദരാബാദ് ബെഞ്ച് ഉത്തരവിട്ടു. 

ഫെബ്രുവരി 27-നും മാർച്ച് 13-നും ഇടയിലാകും യോഗം. ഇന്ത്യൻ ആരോഗ്യമേഖലയിലെ ഏറ്റവും വലിയ ലയനങ്ങളിലൊന്നാണിത്. കോമ്പറ്റീഷൻ കമ്മീഷൻ ഓഫ് ഇന്ത്യ, സ്റ്റോക്ക് എക്സ്ചേഞ്ചുകൾ എന്നിവയുടെ അനുമതി ലയനത്തിന് ഇതിനകം ലഭിച്ചിട്ടുണ്ട്. മറ്റ് അനുമതികൾ കൂടി ലഭിക്കുന്ന മുറയ്ക്ക്, 2026-27 സാമ്പത്തിക വർഷത്തിന്റെ ആദ്യ പാദത്തിൽ ലയനം പൂർത്തിയാക്കാനാണ് ലക്ഷ്യമിടുന്നതെന്നും നടപടികളിലെ പുരോഗതിയിൽ സന്തോഷമുണ്ടെന്നും ആസ്റ്റർ ഡിഎം ഹെൽത്ത്‌കെയർ സ്ഥാപക ചെയർമാൻ ഡോ. ആസാദ് മൂപ്പൻ വ്യക്തമാക്കി.