ഒരു ലാപ്ടോപ്പ് വാങ്ങിയാലോ...? കുറഞ്ഞ വിലയിൽ പ്രീമിയം ലാപ്ടോപ്പുകൾ; ഇന്റലിന്റെ ‘ഫയർഫ്ലൈ’ പദ്ധതിക്ക് തുടക്കം

നിങ്ങള്‍ ലാപ്ടോപ്പ് വാങ്ങാന്‍ പ്ലാന്‍ ചെയ്യുന്നുണ്ടോ ? എന്നാല്‍ ഒരു രഹസ്യം പറയട്ടെ..., സാധാരണക്കാർക്കും പ്രീമിയം നിലവാരമുള്ള ലാപ്ടോപ്പുകൾ കുറഞ്ഞ വിലയിൽ ലഭ്യമാക്കുകയെന്ന ലക്ഷ്യത്തോടെ ഇന്റൽ പുതിയ ഫയർഫ്ലൈ പദ്ധതി അവതരിപ്പിച്ചിരിക്കുകയാണ്. കമ്പനിയുടെ പുതിയ ‘വൈൽഡ്‌കാറ്റ് ലേക്ക്’ പ്രോസസർ ശ്രേണിയെ അടിസ്ഥാനമാക്കിയുള്ള ഈ പദ്ധതി, ബജറ്റ് വിഭാഗത്തിലെ ലാപ്ടോപ്പുകളുടെ നിലവാരം ഉയർത്താൻ സഹായിക്കുമെന്നാണ് വിലയിരുത്തലുകളുള്ളത്.

ഇന്റലിന്റെ പാന്തർലേക്ക് പ്രൊസസർ കുടുംബത്തിന്റെ ലളിതവത്കരിച്ച പതിപ്പാണ് വൈൽഡ്‌കാറ്റ് ലേക്ക്. ഉയർന്ന പ്രകടനശേഷിയുള്ള കോറുകളും കുറഞ്ഞ വൈദ്യുതി ഉപയോഗിക്കുന്ന കോറുകളും ഉൾക്കൊള്ളുന്ന ഈ പ്രോസസറുകൾ, ദൈനംദിന ആവശ്യങ്ങൾക്ക് മികച്ച വേഗതയും കാര്യക്ഷമതയും നൽകുമെന്നാണ് കമ്പനി അവകാശപ്പെടുന്നത്.

മുൻ തലമുറയിലെ എൻട്രി-ലെവൽ പ്രോസസറുകളെ അപേക്ഷിച്ച് കൂടുതൽ ശേഷിയുള്ളതായിരുന്നാലും, ബജറ്റ് ലാപ്ടോപ്പുകളിൽ ഗുണമേന്മ കുറഞ്ഞ ചാസിസും ഘടകങ്ങളും ഉപയോഗിക്കുന്നത് വലിയ വെല്ലുവിളിയായിരുന്നു. ഈ പ്രശ്നത്തിന് പരിഹാരമായാണ് ഫയർഫ്ലൈ പദ്ധതി അവതരിപ്പിച്ചിരിക്കുന്നത്.

പ്രോസസറിനൊപ്പം സ്‌ക്രീൻ, കീബോർഡ്, കവറിങ് തുടങ്ങി ലാപ്ടോപ്പിന്റെ പ്രധാന ഘടകങ്ങളെല്ലാം ഒരുമിച്ച് പരിഗണിച്ച് ഉയർന്ന നിലവാരമുള്ള കുറഞ്ഞ വിലയില്‍ ലാപ്ടോപ്പുകൾ രൂപകൽപന ചെയ്യാനുള്ള മാതൃകയാണ് ഫയർഫ്ലൈ.

പദ്ധതിയുടെ ഭാഗമായി ചൈനയിലെ സാങ്കേതിക മേഖലയുമായി ഇന്റൽ സഹകരിക്കുന്നുണ്ട്. മൊബൈൽ ഫോണുകളിലും ടാബ്‌ലെറ്റുകളിലും വ്യാപകമായി ഉപയോഗിക്കുന്ന ഘടകങ്ങൾ വലിയ തോതിൽ ലഭ്യമാകുന്നതിനാൽ, അവ ലാപ്ടോപ്പുകളിലും ഉപയോഗിക്കുന്നത് നിർമ്മാണച്ചെലവ് കുറയ്ക്കാൻ സഹായിക്കുമെന്നാണ് കമ്പനിയുടെ വിലയിരുത്തൽ.

ഇതുവഴി ലോകമെമ്പാടുമുള്ള നിർമ്മാതാക്കൾക്ക് സമാന രൂപകൽപനകൾ വേഗത്തിൽ വികസിപ്പിക്കാനും ആകും. പദ്ധതിയുടെ മുഴുവൻ മാതൃകയോ അതിലെ ചില ഭാഗങ്ങളോ സ്വീകരിച്ച് കമ്പനികൾക്ക് തങ്ങളുടെ ആവശ്യങ്ങൾക്കനുസരിച്ച് മാറ്റങ്ങൾ വരുത്താനും അവസരമുണ്ട്.

ഫയർഫ്ലൈ പദ്ധതിയുടെ ഭാഗമായി വികസിപ്പിച്ച മാതൃകാ ലാപ്ടോപ്പായ ഇന്റൽ കളർ കമ്പനി അവതരിപ്പിച്ചുകഴിഞ്ഞു. എൻട്രി-ലെവൽ വിഭാഗത്തിൽ അപൂർവമായി മാത്രം കാണപ്പെടുന്ന ലോഹ നിർമിത കവറാണ് ഈ ഉപകരണത്തിന്റെ പ്രധാന പ്രത്യേകത. വെറും 12.9 മില്ലീമീറ്റർ മാത്രം കനമുള്ള ഈ ലാപ്ടോപ്പ് പ്രീമിയം രൂപഭംഗിയും മെലിഞ്ഞ ഡിസൈനും ഒരുമിപ്പിക്കുന്നതുമാണ്. 

വായുസഞ്ചാരത്തിനായി വലിയ വെന്റുകൾ പിൻഭാഗത്ത് നൽകിയിട്ടില്ലാത്തതിനാൽ കൂടുതൽ വൃത്തിയുള്ള രൂപകൽപനയാണ് ലാപ്ടോപ്പിനുള്ളത്. അതേസമയം ആവശ്യമായ കൂളിങ് ഉറപ്പാക്കാൻ ചെറിയ വായുസഞ്ചാര ദ്വാരങ്ങളും ഉൾപ്പെടുത്തിയിട്ടുണ്ട്. കൂടാതെ സാധാരണ യുഎസ്ബി പോർട്ടുകൾ, പുതിയ മോഡല്‍ യുഎസ്ബി-സി പോർട്ടുകൾ, അതിവേഗ ഡാറ്റാ കൈമാറ്റത്തിനുള്ള തണ്ടർബോൾട്ട് സൗകര്യം എന്നിവയും ലഭ്യമാണ്.

ഇതിനകം തന്നെ പ്രമുഖ കമ്പ്യൂട്ടർ നിർമ്മാതാക്കളായ ഡെൽ, അസൂസ്, കളർഫുൾ, ഏസർ തുടങ്ങിയ കമ്പനികൾ വൈൽഡ്‌കാറ്റ് ലേക്ക് അടിസ്ഥാനമാക്കിയുള്ള സ്വന്തം ലാപ്ടോപ്പുകൾ വികസിപ്പിക്കാനും ആരംഭിച്ചുകഴിഞ്ഞു. ചില മോഡലുകൾ വിപണിയിലെത്തിയതായും കൂടുതൽ ഉൽപ്പന്നങ്ങൾ വരും മാസങ്ങളിൽ അവതരിപ്പിക്കപ്പെടുമെന്നും റിപ്പോർട്ടുകൾ സൂചിപ്പിക്കുന്നുണ്ട്.

അതേസമയം, പ്രോസസറും സ്മാർട്ട്ഫോൺ സാങ്കേതികവിദ്യയിൽ ഉപയോഗിക്കുന്ന മെമ്മറി ഘടകങ്ങളും ഒരൊറ്റ യൂണിറ്റായി സംയോജിപ്പിക്കുന്ന കോർ ലോജിക് മൊഡ്യൂൾ എന്ന പുതിയ സാങ്കേതികവിദ്യയും ഇന്റൽ അവതരിപ്പിച്ചു. ലാപ്ടോപ്പ് വികസനം വേഗത്തിലാക്കാനും കൂടുതൽ സാങ്കേതിക നവീകരണങ്ങൾക്ക് വഴിയൊരുക്കാനും ഇത് സഹായിക്കുമെന്നാണ് കമ്പനി പ്രതീക്ഷ വെയ്ക്കുന്നത്.