ഫോൾഡബിൾ ഐഫോൺ മുതൽ എ20 പ്രോ ചിപ്പ് വരെ; ആപ്പിള്‍ അപ്ഡേറ്റുകള്‍ സീനാണേ...

പ്രായഭേതമില്ലാതെ ആപ്പിള്‍ പ്രൊഡക്ട് ഫാന്‍സാണല്ലോ എല്ലാവരും. ഒരു ആപ്പിള്‍ പ്രൊഡക്ട് എല്ലാവരുടേയും വിഷ് ലിസ്റ്റില്‍ ഒന്നുമായിരിക്കും. ആ ആരാധകര്‍ക്കിതാ പുതിയ ആവേശമേകികൊണ്ട് ആപ്പിള്‍ എത്തിയിരിക്കുന്നു. ആപ്പിള്‍ ഫോള്‍ഡബിള്‍ മോഡില്‍ എത്തുന്നു. സാംസങ് ഉൾപ്പെടെയുള്ള പ്രമുഖ ബ്രാൻഡുകളോട് മത്സരിക്കാനായി ആപ്പിൾ അവതരിപ്പിച്ച ഫോൾഡബിൾ ഫോണാണ് ഐഫോൺ DUO.

പുതിയ സിഇഒ ജോൺ ടേണസിന്റെ നേതൃത്വത്തിലുള്ള ടീമാണ് ഐഫോൺ 18 പ്രോ, ഐഫോൺ 18 പ്രോ മാക്സ്, ഫോള്‍ഡബിള്‍ ഐഫോൺ, ആപ്പിൾ വാച്ച് സീരീസ് 12, വാച്ച് അൾട്രാ 4 എന്നിവ അവതരിപ്പിച്ചിരിക്കുന്നത്. വർഷങ്ങളായുള്ള അഭ്യൂഹങ്ങൾക്ക് വിരാമമിട്ടുകൊണ്ടാണ് ഈ പ്രഖ്യാപനം. പാസ്പോർട്ടിനോട് സാമ്യമുള്ള വലുപ്പത്തിലുള്ള ഫോണിൽ അകത്തും പുറത്തുമായി രണ്ട് ഡിസ്പ്ലേയാണുള്ളത്.

മുമ്പത്തെ റിപ്പോർട്ടുകൾ പ്രകാരം ഏകദേശം 5.5 ഇഞ്ച് പുറം ഡിസ്പ്ലേയും 8 ഇഞ്ചിനോട് അടുത്ത അകത്തെ ഡിസ്പ്ലേയും ഫോണിലുണ്ടാകും. സ്ക്രീനിലെ മടക്കവരവ് കുറയ്ക്കാൻ പ്രത്യേക ഹിഞ്ചും അതിസൂക്ഷ്മമായ ഗ്ലാസ് പാളിയുമാണ് ഉപയോഗിക്കുന്നത്.

സ്ലീക്ക് ഡിസൈനും മെച്ചപ്പെടുത്തിയ ഹിഞ്ച് സംവിധാനവുമാണ് ഐഫോൺ DUO-യുടെ പ്രധാന ആകർഷണം. മടക്കിവെയ്ക്കുമ്പോൾ സാധാരണ സ്മാർട്ട്ഫോണായും നിവർത്തുമ്പോൾ ടാബ്‌ലെറ്റിന് സമാനമായ വലിയ ഡിസ്‌പ്ലേയായും ഉപയോഗിക്കാനാകും. ആപ്പിളിന്റെ പ്രീമിയം ഡിസൈൻ ശൈലി നിലനിർത്തിയെത്തുന്ന ഫോൺ ഉപയോക്താക്കൾക്ക് പുതിയ അനുഭവം സമ്മാനിക്കുമെന്നാണ് പ്രതീക്ഷ.

ഐഫോൺ 18 പ്രോയിൽ എ20 പ്രോ ചിപ്പ്

പുതിയ ഐഫോൺ 18 പ്രോ, പ്രോ മാക്സ് മോഡലുകൾ ഗ്ലേഷ്യർ, ബർഗണ്ടി എന്നീ പുതിയ നിറങ്ങളിലാണ് എത്തുക. ഫോണിന്റെ പ്രധാന സവിശേഷത പുതിയ എ20 പ്രോ ചിപ്പാണ്. 2 നാനോമീറ്റർ സാങ്കേതികവിദ്യയിൽ നിർമിച്ച ചിപ്പ് മികച്ച പ്രകടനവും ഉപകരണത്തിൽ നേരിട്ട് കൃത്രിമ ബുദ്ധി പ്രവർത്തനങ്ങളും നൽകുന്നതിനായി രൂപകൽപ്പന ചെയ്തതാണ്.

ആപ്പിളിന്റെ കണക്കനുസരിച്ച് കേന്ദ്ര പ്രോസസറിന് 20 ശതമാനം വരെ കൂടുതൽ വേഗതയും, ഗ്രാഫിക്സ് സംവിധാനത്തിന് 40 ശതമാനം വരെ കൂടുതൽ പ്രകടനവും ലഭിക്കും. മെമ്മറി വേഗതയിലും 50 ശതമാനം വരെ വർധനയുണ്ട്. ഐഫോൺ 18 പ്രോയിൽ 48 മെഗാപിക്സൽ ക്യാമറ, ലൈറ്റിങ് സെറ്റിങ്സ്, മെച്ചപ്പെടുത്തിയ ദൂരദൃശ്യ (ZOOMING) ചിത്രീകരണം എന്നിവ പ്രതീക്ഷിക്കുന്നു.

ഫോൾഡബിൾ മോഡലിനൊപ്പം ആപ്പിളിന്റെ പുതിയ മുൻനിര ഫോണുകളായ ഐഫോൺ 18, ഐഫോൺ 18 പ്രോ മാക്സ് എന്നിവയും പുറത്തിറക്കി. കൂടുതൽ കരുത്തുറ്റ പ്രോസസർ, മെച്ചപ്പെടുത്തിയ ക്യാമറ, മികച്ച ബാറ്ററി പ്രകടനം, പുതിയ എഐ സവിശേഷതകൾ എന്നിവയാണ് പുതിയ സീരീസിന്റെ പ്രധാന പ്രത്യേകതകൾ. ആപ്പിളിന്റെ പുതിയ നീക്കങ്ങൾ ആഗോള സ്മാർട്ട്ഫോൺ വിപണിയിൽ ശ്രദ്ധേയമായ മാറ്റങ്ങൾക്ക് വഴിയൊരുക്കുമെന്നാണ് സാങ്കേതിക വിദഗ്ധരുടെ വിലയിരുത്തൽ.

ഇനി കാത്തിരിക്കുന്നത് എയർപോഡ്സിൽ ഹൃദയമിടിപ്പ് നിരീക്ഷണ സംവിധാനം എത്താൻ സാധ്യതയുള്ളതാണ്. പുതിയ സ്മാർട്ട് ഹോം കേന്ദ്ര ഉപകരണവും ഹോം ഒഎസ് സംവിധാനവും അവതരിപ്പിക്കാനുള്ള ആപ്പിളിന്റെ പദ്ധതികളും ശ്രദ്ധേയമാണ്.

മുൻ മേധാവി ടിം കുക്കിന്റെ സാന്നിധ്യത്തിലായിരുന്നു ജോൺ ടേണസിന്റെ ആദ്യ പ്രധാന ഉൽപ്പന്ന അവതരണം. ഐഫോൺ, AI, ധരിക്കാവുന്ന ഉപകരണങ്ങൾ, സ്മാർട്ട് ഹോം തുടങ്ങിയ മേഖലകളിൽ വലിയ മാറ്റങ്ങൾക്ക് തുടക്കമിടുന്നതാണ് ആപ്പിളിന്റെ പുതിയ നീക്കങ്ങൾ.