ആ ബിസിനസുകാരന്‍ ആര്? ഐപിഎല്‍ വാതുവയ്പ്പ് ഭീഷണിയില്‍! മുന്നറിയിപ്പുമായി ബിസിസിഐ

ഐപിഎല്ലിന്‍റെ ഈ സീസണില്‍ വാതുവയ്പ്പുകാരെ കരുതിയിരിക്കണമെന്ന് കളിക്കാര്‍ക്കും ടീമുകള്‍ക്കും ബിസിസിഐയുടെ മുന്നറിയിപ്പ്. ഹൈദരാബാദില്‍ നിന്നുള്ള വ്യവസായ പ്രമുഖന്‍ വാതുവയ്പ്പിന് ശ്രമിക്കുന്നുവെന്നാണ് ഉന്നതവൃത്തങ്ങളെ ഉദ്ധരിച്ച് ക്രിക്ബസ് റിപ്പോര്‍ട്ട് ചെയ്യുന്നത്. കളിക്കാര്‍ക്കും കോച്ചുമാര്‍ക്കും സപ്പോര്‍ട്ടിങ് സ്റ്റാഫുമാര്‍ക്കും പുറമെ കമന്‍റേറ്റര്‍മാര്‍ക്കും ബിസിസിഐ ജാഗ്രതാ നിര്‍ദേശം നല്‍കിയിട്ടുണ്ട്. 

ഐപിഎല്ലിലെ വിവിധ കളിക്കാരുമായും മറ്റുന്നതരുമായും ബന്ധങ്ങള്‍ ഉണ്ടാക്കാന്‍ ഇയാള്‍ അടുത്തയിടെ ശ്രമിച്ചിരുന്നുവെന്നും വിലയേറിയ സമ്മാനങ്ങള്‍ നല്‍കി സ്വാധീനിക്കാന്‍ ശ്രമിച്ചുവെന്നും ആന്‍റി കറപ്ഷന്‍ സെക്യൂരിറ്റി യൂണിറ്റ് സംശയിക്കുന്നു. ഫ്രാഞ്ചൈസി ഉടമകളുടെ കുടുംബാംഗങ്ങളെയും , കളിക്കാരെയും കമന്‍റേറ്റര്‍മാരെയും നേരില്‍ കണ്ട് സൗഹൃദം സ്ഥാപിക്കാന്‍ വ്യവസായ പ്രമുഖന്‍ ശ്രമിച്ചുവെന്നും റിപ്പോര്‍ട്ട് പറയുന്നു. ഇതോടെയാണ് നിയമവിരുദ്ധമായ പ്രവര്‍ത്തനങ്ങളില്‍ നിന്നൊഴിഞ്ഞ് നില്‍ക്കണമെന്നും ജാഗ്രത വേണമെന്നും ബിസിസിഐ മുന്നറിയിപ്പ് പുറപ്പെടുവിച്ചത്. 

അതിനിടെ ഐപിഎല്ലില്‍ രാജസ്ഥാന്‍ റോയല്‍സിനെതിരായ മല്‍സരത്തിന് മുന്നോടിയായി ലക്നൗ ടീമിനൊപ്പം മായങ്ക് യാദവ് ചേര്‍ന്നു. ശനിയാഴ്ച ജയ്പുറില്‍ നടക്കുന്ന മല്‍സരത്തില്‍ ഫിറ്റ്നസ് വീണ്ടെടുത്ത മായങ്ക് ലക്നൗവിനായി ഇറങ്ങുമെന്ന് എഎസ്പിഎന്‍ ക്രിക് ഇന്‍ഫോ റിപ്പോര്‍ട്ട് ചെയ്യുന്നു.

2024 ഒക്ടോബറില്‍ പുറത്തിന് പരുക്കേറ്റതോടെയാണ് 22കാരനായ മായങ്ക് പുറത്തായത്. ബംഗ്ലദേശിനെതിരായി രാജ്യാന്തര ക്രിക്കറ്റില്‍ അരങ്ങേറുകയും മൂന്ന് ട്വന്‍റി20 കളിക്കുകയും ചെയ്തതിന് പിന്നാലെ താരത്തിന് പരുക്കേല്‍ക്കുകയായിരുന്നു. ഇതോടെ ആഭ്യന്തര സീസണ്‍ മുഴുവനായും മായങ്കിന് നഷ്ടമായി. തുടര്‍ന്ന് ബിസിസിഐയുടെ ബെംഗളൂരുവിലെ കേന്ദ്രത്തില്‍ സുഖംപ്രാപിച്ച് വരികയായിരുന്നു.