മെസ്സിയോ എംബപെയോ?; ഗോള്ഡന് ബൂട്ടിനായി വാശിയേറിയ പോരാട്ടം
- Sports
- Published on Jul 13, 2026, 06:39 PM IST
ലോകകപ്പില് മല്സരങ്ങള് സെമിഫൈനല് പോരാട്ടങ്ങളിലേക്ക് കടക്കുമ്പോള് ഗോള്ഡന് ബൂട്ടിനായി വാശിയേറിയ പോരാട്ടം. ഗോളെണ്ണത്തില് മെസിയും എംബപെയും ഒപ്പത്തിനൊപ്പമാണെങ്കിലും ഗോള് അസിസ്റ്റിലെ മുന്തൂക്കത്തില് എംബപെയാണ് മുന്നില്. തൊട്ടുപിന്നില് തന്നെയുണ്ട് ഇംഗ്ലണ്ടിന്റെ ഹാരി കെയ്നും ജൂഡ് ബെല്ലിങ്ങമും.
ലോകകപ്പില് അവശേഷിക്കുന്നത് നാല് മല്സരങ്ങള്. നാല് ടീമുകള്. ഓരോ ടീമിനും രണ്ട് മല്സരങ്ങള് വീതം. സെമിയില് ജയിക്കുന്നവര്ക്ക് ഫൈനല്. തോല്ക്കുന്നവര്ക്ക് ലൂസേഴ്സ് ഫൈനല്. എട്ട് ഗോളുകള് വീതമാണ് ഫ്രഞ്ച് താരം കിലിയന് എംബപെയ്ക്കും അര്ജന്റീനയുടെ ലയണല് മെസിയ്ക്കും അക്കൗണ്ടിലുള്ളത്. എന്നാല് ഗോള് അസിസ്റ്റില് എംബപെ മെസിയെ കടത്തിവെട്ടിയതോടെ പട്ടികയില് എംബപെ ഒന്നാമതും മെസി രണ്ടാമതുമായി. എംബപെയ്ക്ക് മൂന്ന് അസിസ്റ്റ്. മെസിക്ക് രണ്ട്. പ്രീക്വാര്ട്ടര് വരെ ഓരോ റൗണ്ട് പിന്നിട്ടപ്പോഴും ഒന്നാം സ്ഥാനത്ത് മെസി ആയിരുന്നു.
ക്വാര്ട്ടറിന് മുന്പ് മെസിക്ക് എട്ടും എംബപെയ്ക്ക് ഏഴും ഗോളുകള് സ്വന്തം. എന്നാല് ക്വാര്ട്ടറില് എംബപെ മൊറോക്കോയ്ക്കെതിരെ ഗോള് നേടുകയും മെസി സ്വിറ്റ്സര്ലന്ഡിനെതിരെ ഗോള് നേടാതെ പോവുകയും ചെയ്തതോടെ കണക്കില് ഒപ്പമായി. അസിസ്റ്റില് എംബപെ മുന്നിലും. ഇനിയുള്ള രണ്ട് കളികളില് ഇരുവരും അടിക്കുന്ന ഗോളും ഒരുക്കുന്ന ഗോളവസരവും തീരുമാനിക്കും ആരുടെ കാലില് സുവര്ണപാദുകമെത്തും എന്ന്. എന്നാല് ഇരുവര്ക്കും ഭീഷണിയായി പിന്നാലെ തന്നെയുണ്ട് ഹാരി കെയ്നും ജൂഡ് ബെല്ലിങ്ങമും.
രണ്ടുപേര്ക്കും ആറ് ഗോളുകള് വീതവും ഓരോ അസിസ്റ്റും. ഫ്രഞ്ച് താരം ഡെംബലെയാണ് പിന്നെ പട്ടികയില് മുന്നിലുള്ള താരം. അഞ്ച് ഗോളും രണ്ട് അസിസ്റ്റും. 2002-ലാണ് ഒടുവില് കിരീടം നേടുന്ന രാജ്യത്തെ കളിക്കാരന് തന്നെ ഗോള്ഡന് ബൂട്ട് നേടിയത്. ബ്രസീലും ഫൈനലിലെ രണ്ടുഗോള് ഉള്പ്പടെ എട്ടുഗോള് നേടിയ റൊണാള്ഡോയും. 2022-ൽ മെസിയും എംബപെയും തമ്മിലുള്ള പോരാട്ടം ഫൈനലിന്റെ അവസാന നിമിഷം വരെ നീണ്ടു. ഒടുവിൽ എട്ട് ഗോളുമായി എംബപെ ഗോൾഡൻ ബൂട്ട് നേടിയെങ്കിലും ലോകകപ്പ് കിരീടം മെസിയുടെ കൈകളിലെത്തി.
ENGLISH SUMMARY:
