തുടക്കം ദുഷ്ക്കരം; ഗൗതം ഗംഭീറുമായുള്ള ബന്ധത്തെക്കുറിച്ച് മനസുതുറന്ന് ശ്രേയസ് അയ്യർ

പരിശീലകൻ ഗൗതം ഗംഭീറുമായുള്ള ബന്ധത്തെക്കുറിച്ച് തുറന്നുപറയുകയാണ് ഇന്ത്യൻ ക്രിക്കറ്റ് ടീം ക്യാപ്റ്റൻ ശ്രേയസ് അയ്യർ. തന്‍റെ ക്യാപ്റ്റൻസി കരിയറിലെ തുടക്കം വെല്ലുവിളി നിറഞ്ഞതാണെന്ന് അദ്ദേഹം പറയുന്നു. അഫ്ഗാനിസ്ഥാനെതിരായ ഒന്നാം ട്വന്‍റി 20 മത്സരത്തിന് മുന്‍പ് നടന്ന വാര്‍ത്താസമ്മേളനത്തിലാണ് ശ്രേയസ് അയ്യർ മനസുതുറന്നത്. 

ഗൗതം ഗംഭീറിന്‍റെ മനോഭാവവും ടീമിലെ ഓരോ പ്ലയറിലെയും മികച്ചവ പുറത്തെടുക്കാനുള്ള അദ്ദേഹത്തിന്‍റെ കഴിവുമാണ് പരിശീലകനെന്ന നിലയിൽ ഗൗതം ഗംഭീറിനെ  മികച്ചതാക്കുന്നതെന്ന് ശ്രേയസ് അഭിപ്രായപ്പെട്ടു. കളിക്കളത്തിൽ എപ്പോഴും വിജയം മാത്രം ലക്ഷ്യമിടുന്നയാളാണ് ഗംഭീർ എന്നും ടീമിലെ ഓരോ അംഗത്തിനും ആവശ്യമായ ആത്മവിശ്വാസവും പിന്തുണയും നൽകാൻ അദ്ദേഹത്തിന് സാധിക്കുന്നുണ്ടെന്നും താരം വ്യക്തമാക്കി. 

മുൻപ് ഐപിഎൽ ഫ്രാഞ്ചൈസിയായ കൊൽക്കത്ത നൈറ്റ് റൈഡേഴ്സിൽ ഒരുമിച്ച് പ്രവർത്തിച്ച പരിചയമുള്ളതിനാൽ ഗംഭീറിന്‍റെ ചിന്താഗതിയും സമീപനവും എങ്ങനെയെന്ന് തനിക്ക് വ്യക്തമായി അറിയാമെന്നും ശ്രേയസ് അയ്യർ കൂട്ടിച്ചേർത്തു. കളിക്കാർ ഓരോരുത്തരും വ്യത്യസ്തരായതിനാൽ അവരവരുടെ സ്വഭാവം മനസിലാക്കിക്കൊണ്ട് മികച്ച വ്യക്തിഗത മാനേജ്മെന്‍റ് രീതിയാണ് ഗംഭീർ നടപ്പിലാക്കുന്നത്. ഇത് വരും മത്സരങ്ങളിലും ടൂർണമെന്‍റുകളിലും ടീമിന് ഏറെ ഗുണം ചെയ്യുമെന്നും ഇന്ത്യൻ ക്യാപ്റ്റൻ ആത്മവിശ്വാസം പ്രകടിപ്പിച്ചു.