ന്യൂസീലൻഡ് മുൻ ക്യാപ്റ്റൻ കെയ്ൻ വില്യംസൺ രാജ്യാന്തര ക്രിക്കറ്റിൽ നിന്ന് വിരമിച്ചു

ന്യൂസീലൻഡ് മുൻ ക്യാപ്റ്റൻ കെയ്ൻ വില്യംസൺ രാജ്യാന്തര ക്രിക്കറ്റിൽ നിന്ന് വിരമിച്ചു. 35 വയസ്സുള്ള വില്യംസൺ ഇംഗ്ലണ്ടിൽ നടക്കുന്ന ടെസ്റ്റ് പരമ്പരയ്ക്കിടെയാണ് ഈ പ്രഖ്യാപനം നടത്തിയത്. 2016 മുതൽ 2024 വരെ അദ്ദേഹം ന്യൂസീലൻഡ് ടീമിന്റെ ക്യാപ്റ്റനായിരുന്നു. കിവീസിനായി അദ്ദേഹം 378 മത്സരങ്ങൾ കളിച്ചിട്ടുണ്ട്. 16 വർഷത്തെ ശ്രദ്ധേയമായ കരിയറിന് ഇത് ഒരു അപ്രതീക്ഷിത വിരാമമായി. ന്യൂസീലൻഡിന്റെ ബാറ്റിങ് ചരിത്രത്തിൽ പുതിയ അധ്യായം കുറിച്ചാണ് അദ്ദേഹത്തിന്റെ വിരമിക്കൽ. ഇതിനോടകം രാജ്യാന്തര ട്വന്റി20യിൽ നിന്ന് വിരമിച്ച വില്യംസൺ, കഴിഞ്ഞയാഴ്ച ലോർഡ്‌സിൽ ഇംഗ്ലണ്ടിനെതിരെ നേരിട്ട വലിയ തോൽവിക്ക് ശേഷം, ശേഷിക്കുന്ന മത്സരങ്ങളിൽ നിന്ന് വിരമിക്കാനുള്ള സമയം തെളിഞ്ഞുവെന്ന് സമ്മതിച്ചു.

 

'കുറച്ചുകാലമായി ഞാൻ ഇതിനെക്കുറിച്ച് ചിന്തിക്കുകയായിരുന്നു, എന്നാൽ കഴിഞ്ഞ കുറച്ച് ദിവസങ്ങളായി ഇപ്പോൾ വിരമിക്കാനുള്ള ശരിയായ സമയമാണെന്ന് എനിക്ക് വ്യക്തമായി തോന്നി,' ന്യൂസീലൻഡ് ക്രിക്കറ്റ് പുറത്തിറക്കിയ വികാരനിർഭരമായ പ്രസ്താവനയിൽ വില്യംസൺ പറഞ്ഞു. 'എപ്പോഴും രാജ്യന്തര ക്രിക്കറ്റിനോട് എനിക്ക് വലിയ ആകാംഷയും മത്സരബുദ്ധിയും തോന്നിയിട്ടുണ്ട്. ന്യൂസീലൻഡിനായി കളിച്ച ഓരോ മത്സരത്തിലും എന്‍റെ പരമാവധി നൽകാൻ സാധിച്ചു എന്നറിയുന്നതിൽ ഞാൻ അഭിമാനിക്കുന്നു. അതിൽ കുറഞ്ഞൊന്നും തുടർന്ന് ചെയ്യാനാവില്ല എന്ന് തോന്നിയതിനാലാണ് ഈ തീരുമാനം. എന്‍റെ സ്വന്തം നിബന്ധനകളിൽ വിരമിക്കാൻ കഴിഞ്ഞതിൽ ഞാൻ ഭാഗ്യവാനായി കരുതുന്നു.' – വില്യംസൺ പറഞ്ഞു.

 

ബ്ലാക്ക് കാപ്‌സിന്‍റെ ചരിത്രത്തിൽ ഏറ്റവും കൂടുതൽ റൺസ് നേടിയ താരമെന്ന നിലയിലാണ് വില്യംസൺ രാജ്യാന്തര ക്രിക്കറ്റിൽ നിന്ന് വിടവാങ്ങുന്നത്. 2010-ൽ അരങ്ങേറ്റം കുറിച്ച ശേഷം 378 മത്സരങ്ങളിൽ നിന്ന് അദ്ദേഹം 19,346 റൺസ് നേടി. ഇതിൽ 48 സെഞ്ചറികളും ആറ് ഇരട്ട സെഞ്ചറികളും ഉൾപ്പെടുന്നു. ആധുനിക ക്രിക്കറ്റിലെ വിഖ്യാതരായ വിരാട് കോലി, ജോ റൂട്ട്, സ്റ്റീവ് സ്മിത്ത് എന്നിവരുൾപ്പെടുന്ന 'ഫാബ് ഫോറി'ൽ നിന്നുള്ള ആദ്യത്തെ വിരമിക്കലാണ് വില്യംസണിന്റേത്. കോലി ഇതിനോടകം രാജ്യാന്തര ട്വന്റി20യിൽ നിന്നും ടെസ്റ്റിൽ നിന്നും വിരമിച്ചിട്ടുണ്ടെങ്കിലും, ഈ ഗ്രൂപ്പിൽ നിന്ന് എല്ലാ അന്താരാഷ്ട്ര ഫോർമാറ്റുകളിൽ നിന്നും പൂർണ്ണമായി പിന്മാറുന്ന ആദ്യത്തെയാൾ വില്യംസൺ ആണ്. 

 

വില്യംസണിന്റെ ക്യാപ്റ്റൻസിയും ശാന്തമായ നേതൃത്വ ശൈലിയും ലോകമെമ്പാടും പ്രശംസിക്കപ്പെട്ടു. 2016 നും 2024 നും ഇടയിൽ ബ്ലാക്ക് കാപ്‌സിനെ നയിച്ച അദ്ദേഹം അവരെ രണ്ട് ഐസിസി ലോകകപ്പ് ഫൈനലുകളിലേക്കും മൂന്ന് സെമി ഫൈനലുകളിലേക്കും എത്തിച്ചു. 2021-ൽ ഇന്ത്യയ്ക്കെതിരായ പ്രഥമ ഐസിസി ലോക ടെസ്റ്റ് ചാംപ്യൻഷിപ്പ് വിജയം വില്യംസണിന്റെ ഏറ്റവും വലിയ നേട്ടങ്ങളിലൊന്നാണ്. 'വലിയ കഴിവുകളുള്ള ധാരാളം കളിക്കാർ ഇവിടെയുണ്ട്, ഈ ന്യൂസീലൻഡ് ടീമിനൊപ്പം എന്തെങ്കിലും നേടാനാവുമെന്ന വലിയ ആഗ്രഹവുമുണ്ട്. ഇത് ഞാൻ സ്നേഹിക്കുന്ന ഒരു ടീമാണ്, ഇത്രയും കാലം ഇതിന്റെ ഭാഗമാകാൻ കഴിഞ്ഞതിൽ ഞാൻ വളരെ ഭാഗ്യവാനായി കരുതുന്നു'– വില്യംസൺ കൂട്ടിച്ചേർത്തു.