രാജ്യം ആരു ഭരിക്കും?; തീരുമാനിക്കും ഈ 96.88 കോടി വോട്ടര്‍മാര്‍

2024ലെ ലോക്‌സഭാ തിരഞ്ഞെടുപ്പ് അടുത്തിരിക്കെ രാജ്യത്ത് റജിസ്റ്റർ ചെയ്തിട്ടുള്ള വോട്ടർമാരുടെ കണക്കുകൾ പുറത്തുവിട്ട് കേന്ദ്ര തിരഞ്ഞെടുപ്പ് കമ്മീഷൻ.  രാജ്യത്ത് ആകെ ഇതുവരെയായി 96.88 കോടി വോട്ടര്‍മാരാണ് റജിസ്റ്റര്‍ ചെയ്തിട്ടുള്ളത്. ഇത്തവണ കഴിഞ്ഞ തവണത്തേക്കാള്‍ 7.2 കോടി വോട്ടര്‍മാര്‍ കൂടുതലാണ്. 

തിരഞ്ഞെടുപ്പ് പ്രഖ്യാപന നടപടിയുടെ ഭാ​ഗമായാണ് കണക്ക് പുറത്തുവിട്ടത്. ലോകത്തിലെ ഏറ്റവും വലിയ തിരഞ്ഞെടുപ്പാണ് നടക്കാൻ പോകുന്നതെന്നും കണക്ക് പുറത്തുവിട്ട് കേന്ദ്ര തിരഞ്ഞെടുപ്പ് കമ്മീഷൻ അറിയിച്ചു. 18-29 പ്രായപരിധിയിലുള്ള രണ്ടു കോടിയിലധികം ആളുകള്‍ പുതുതായി റജിസ്റ്റര്‍ ചെയ്തിട്ടുണ്ട്. 

96.88 കോടി വോട്ടര്‍മാരില്‍ കൂടുതല്‍ പുരുഷ വോട്ടര്‍മാരാണ്. 49.72 കോടി പുരുഷ വോട്ടര്‍മാരും 47.15 കോടി വനിതാ വോട്ടര്‍മാരുമാണുള്ളത്. 18-19 വയസിലുള്ള 1,84,81,610 വോട്ടര്‍മാരും 20-29 വയസിലുള്ള 19,74,37,160 വോട്ടര്‍മാരും 80 കഴിഞ്ഞവരിൽ 1.85 കോടി വോട്ടര്‍മാരുമാണുള്ളത്. 48,000 ആളുകള്‍ ട്രാൻസ്ജൻഡർ വിഭാഗത്തിൽ നിന്നുള്ള വോട്ടര്‍മാരാണ്. 

കൂടാതെ, ജമ്മു കശ്മീരിലെയും അസമിലെയും വോട്ടര്‍പട്ടിക പുതുക്കലും വിജയകരമായി പൂര്‍ത്തിയാക്കിയതായും കമ്മിഷന്‍ അറിയിച്ചു.