കോട്ടയം: കുമരകം ഗ്രാമപഞ്ചായത്തിലെ 16–ാം വാർഡിലെ സ്വതന്ത്ര സ്ഥാനാർഥിയായ ജിഷ ഷെയിൻ പോസ്റ്ററിനുള്ള ഫോട്ടോ എടുക്കാനാണ് കോട്ടയം കഞ്ഞിക്കുഴിയിലെ സ്റ്റുഡിയോയിൽ എത്തിയത്. ഏയ്, സ്റ്റുഡിയോ ഫ്ലോർ ഒന്നും വേണ്ട നമുക്ക് നാട്ടുമ്പുറത്തേയ്ക്ക് പോകാം എന്ന് ഫൊട്ടോഗ്രഫർ!! നാടോടുമ്പോൾ നടുവേ ഓടണമല്ലോ. തിരഞ്ഞെടുപ്പിനു വേണ്ടിയുള്ള ന്യൂജെൻ ഫോട്ടോഷൂട്ടിന് സ്ഥാനാർഥി തയാറായി.
ക്യാമറയുമായി ഫൊട്ടോഗ്രാഫർ തോട്ടിൻ കരയിലൂടെ അങ്ങോട്ടുമിങ്ങോട്ടും നടന്നു. പോര, പോര, ഒരു ‘ഗുമ്മി’ല്ല എന്നു മനസു പറയുന്നു. എന്നാൽ പിന്നെ ശ്രീനിവാസൻ പറഞ്ഞതുപോലെ ക്യാമറയും കൂടെ ചാടട്ടേ.