സന്തോഷ് ട്രോഫി യോഗ്യത ടൂർണമെന്റിലെ ആദ്യ മത്സരത്തിൽ കേരളത്തിന് സമനില. തമിഴ്നാട് നെയ് വേലിയിലെ ഭാരതി സ്റ്റേഡിയത്തിൽ തെലങ്കാനയുമായി ഗോൾരഹിത സമനിലയിൽ പിരിയുകയായിരുന്നു.
തുടക്കം മുതൽ കേരളം അക്രമിച്ചു കളിച്ചു. ഗോളാകുമെന്ന് തോന്നിപ്പിച്ച അര ഡസണിലധികം അവസരങ്ങൾ കേരളതാരങ്ങൾ പാഴാക്കി. മുഹമ്മദ് സലായുടെയും ക്രിസ്റ്റി ഡേവിസിന്റയും നേതൃത്വത്തിൽ ഇടത് വലത് വിങ്ങുകളിലൂടെയുള്ള മുന്നേറ്റങ്ങളാണ് കേരളം നടത്തിയത്.
ടീമിന്റെ പ്രകടനത്തിൽ തൃപ്തിയുണ്ടെന്നാണ് കോച്ചിന്റെ വിലയിരുത്തൽ. നിലവിലെ ചാമ്പ്യൻമാർക്ക് ആദ്യമത്സരത്തിലെ സമനില ഒട്ടും സന്തോഷം നൽകില്ല. അതു കൊണ്ട് തന്നെ അടുത്ത രണ്ട് മത്സരങ്ങളും നിർണായകമാണ്. ബുധനാഴ്ച നടക്കുന്ന രണ്ടാം മത്സരത്തിൽ പുതുച്ചേരിയാണ് എതിരാളി.