കൊല്ലം പാരിപ്പള്ളിയില്‍ ഭര്‍ത്താവിന്റെ സംശയരോഗത്തിനു മുന്‍പില്‍ ഇല്ലാതായ നദീറയുെട ജീവിതം അങ്ങേയറ്റം വേദനകള്‍ നിറഞ്ഞതായിരുന്നു. വിവാഹശേഷം സമാധാനമെന്തെന്ന് അറിയാത്ത ഭാര്യ. ഭര്‍ത്താവ് റഹീമിന്റെ സംശയരോഗത്തിനു മുന്‍പില്‍ അവള്‍ക്ക് പലതവണ മുറിവേറ്റു, കഴിഞ്ഞ ഓണത്തിനു മുന്‍പും അയാളുടെ ക്രൂരതയ്ക്കു മുന്‍പില്‍ മരിച്ചു ജീവിച്ചവളാണ് ആ രണ്ടു മക്കളുടെ അമ്മ.
അന്നത്തെ ആക്രമണത്തെക്കുറിച്ച് അയല്‍വാസി പറയുന്നു; ‘ഓണത്തിനു മുന്‍പ് നദീറയെ ക്രൂരമായി ആക്രമിച്ചതിന് പള്ളിക്കല്‍പൊലിസ് റഹീമിനെതിരെ കേസെടുത്തിരുന്നു. അപ്പുറത്ത് താമസിക്കുന്ന പെണ്ണിനെ അവന്‍ അടിച്ചുകൊന്നിട്ടേക്കുന്നു , പെട്ടെന്ന് വായോ എന്നു പറഞ്ഞ് എന്റെ ഭാര്യ എന്നെ വിളിച്ചു, . സഹോദരനെയും നാട്ടുകാരെയും വിളിച്ച് ചെന്നപ്പോള്‍ നദീറയെ അടിച്ചു തലപൊട്ടിച്ചിട്ടിരിക്കുകയായിരുന്നു. പൊലിസിനെ വിളിച്ചു, ആശുപത്രിയിലെത്തിച്ചു, അന്ന് തല പൊട്ടുകയും നദീറയുെട കാലൊടിയുകയും ചെയ്തു. വധശ്രമത്തിനു കേസെടുക്കുകയും ചെയ്തു.ജയിലിലായിരുന്ന റഹീം നാലു ദിവസം മുന്‍പാണ് പുറത്തിറങ്ങിയത്. അന്നു തന്നെ നദീറയെ കൊല്ലുമെന്ന് ഭീഷണിപ്പെടുത്തിയിരുന്നു. പതിനെട്ടുവര്‍ഷം മുന്‍പാണ് കുടക് സ്വദേശിനിയായ നദീറയും കിഴക്കനേല സ്വദേശി റഹീമും വിവാഹിതരായത്. ദമ്പതികള്‍ക്ക് പതിനഞ്ചും പതിമൂന്നും വയസുളള രണ്ട് മക്കളുണ്ട്്.
സംശയരോഗത്തെ തുടര്‍ന്ന് നദീറയെ തീകൊളുത്തി കൊന്ന ശേഷം ഭര്‍ത്താവ് റഹിം കിണറ്റില്‍ ചാടി മരിക്കുകയായിരുന്നു. കൊല്ലം പാരിപ്പളളിയിലാണ് അതിദാരുണ കൊലപാതകം . കര്‍ണാടക കുടക് സ്വദേശിനി നദീറയാണ് കൊല്ലപ്പെട്ടത്. പാരിപ്പളളി കിഴക്കനേല സ്വദേശി റഹീമാണ് നദീറ ജോലി ചെയ്്ത അക്ഷയ സെന്ററില്‍ വച്ച് കൊലപ്പെടുത്തിയത്. നേരത്തെ നദീറയെ കൊലപ്പെടുത്താന്‍ ശ്രമിച്ചതിന് റിമാന്‍ഡിലായിരുന്ന റഹീം നാലുദിവസം മുന്‍പാണ് ജയിലില്‍ നിന്നിറങ്ങിയത്.ഹെല്‍മറ്റ് ധരിച്ചാണ് റഹീം നദീറ ജോലി ചെയ്യുകയായിരുന്ന അക്ഷയ സെന്ററിലേക്ക് എത്തിയത്. കഴുത്തില്‍ കുത്തി പിടിച്ച് കൈയില്‍ കരുതിയ പെട്രോള്‍ നദീറയുടെ ശരീരത്തിലേക്ക് ഒഴിച്ച് തീകൊളുത്തി. കത്തിയെടുത്ത് മറ്റുളളവരെ ഭീഷണിപ്പെടുത്തി പുറത്തേക്ക് ചാടി. നദീറ വെന്തുമരിച്ചെന്ന് ഉറപ്പാക്കിയ ശേഷമായിരുന്നു റഹീമിന്റെ മടക്കം. അക്ഷയ സെന്ററിലുണ്ടായിരുന്നവര്‍ തടയാന്‍ ശ്രമിച്ചെങ്കിലും സാധിച്ചില്ല. എല്ലാവരും ഭയന്നുപോയതായി ജീവനക്കാര്‍ പറയുന്നു.
അക്ഷയെ സെന്ററില്‍ നിന്ന് പുറത്തേക്ക് ചാടിപ്പോകുന്ന റഹീമിന്റെ സിസിടിവി ദൃശ്യം പൊലീസിന് ലഭിച്ചു. ഇവിടെ നിന്ന് പുറത്തേക്ക് ഒാടി ആര്‍ക്കുംപിടികൊടുക്കാതെ രക്ഷപെട്ട റഹീം അന്‍പതുമീറ്റര്‍ അകലെയുളള ഒരുവീടിന്റെ കിണറ്റിലേക്കാണ് ചാടിയത്. ആക്രോശിച്ചുകൊണ്ടു കത്തിയുമായി ഒാടിയെത്തിയ റഹീം കഴുത്തില്‍ സ്വയം മുറിവേല്‍പ്പിച്ച ശേഷം കിണറ്റില്‍ ചാടുകയായിരുന്നു. അഗ്നിശമനസേനയെത്തി പുറത്തെടുത്തപ്പോഴേക്കും റഹീമിന്റെ ജീവന്‍ നഷ്ടപ്പെട്ടു.
Kollam Parippalli murder case details
