ഉണ്ണി മുകുന്ദന്റെ ആരാധകർ പ്രതീക്ഷയോടെ കാത്തിരുന്ന ആക്ഷൻ ചിത്രം ബ്രൂസ് ലി ഉപേക്ഷിച്ചോ? 2022ലെ ഉണ്ണി മുകുന്ദൻറെ പിറന്നാൾ ദിനത്തിലായിരുന്നു വൈശാഖ് സംവിധാനം ചെയ്യുന്ന ബിഗ് ബജറ്റ് ചിത്രം ‘ബ്രൂസ് ലി’ പ്രഖ്യാപിക്കുന്നത്. ഇപ്പോഴിതാ സിനിമ ഉപേക്ഷിച്ചോ എന്ന ആരാധകന്റെ ചോദ്യത്തിനു മറുപടിയുമായി ഉണ്ണി മുകുന്ദൻ തന്നെ രംഗത്ത് എത്തിയിരിക്കുകയാണ്.
ബ്രൂസ് ലി ഉപേക്ഷിക്കേണ്ടി വന്നുവെന്നും അതേ ടീമിൽ നിന്നും മറ്റൊരു ചിത്രത്തിനുള്ള തയാറെടുപ്പിലാണ് താനെന്നും ഉണ്ണി മുകുന്ദൻ ആരാധകന്റെ ചോദ്യത്തിനു മറുപടി നല്‍കി. ‘ദൗര്‍ഭാഗ്യവശാല്‍ ബ്രൂസ് ലീ ഉപേക്ഷിക്കേണ്ടിവന്നു. ക്രിയേറ്റീവ് ആയ കാരണങ്ങളാലാണ് അത് വേണ്ടിവന്നത്. പക്ഷേ അതേ ടീം മറ്റൊരു പ്രോജക്റ്റിനുവേണ്ടിയുള്ള ജോലികളിലാണ്. അത് ഒരു ആക്‌ഷന്‍ ചിത്രമാവാനാണ് സാധ്യത. കാലം എന്താണോ ഡിമാന്‍ഡ് ചെയ്യുന്നത് അതനുസരിച്ചാവും ആ ചിത്രം.’’–ഉണ്ണി മുകുന്ദൻ പറഞ്ഞു.
ബ്രൂസ് ലി സിനിമ ഉപേക്ഷിച്ചോ എന്ന ആരാധകന്റെ ചോദ്യത്തിനു മറുപടിയായിരുന്നു ഉണ്ണിയുടെ വെളിപ്പെടുത്തൽ.രഞ്ജിത് ശങ്കറിന്റെ ജയ് ഗണേഷ്, ഫിക്‌ഷൻ ചിത്രമായ ഗന്ധര്‍വ ജൂനിയർ എന്നിവയാണ് ഉണ്ണി മുകുന്ദന്റെ പുതിയ പ്രോജക്ടുകൾ
