സിനിമരംഗത്തു നിന്ന് പെട്ടെന്നൊരാള് പിന്വാങ്ങുന്നത് ആരാധകരെ അമ്പരപ്പിക്കാറുണ്ട്. അപ്രതീക്ഷിതമായ ക്ളൈമാക്സിനു പിന്നിലെ കാരണങ്ങളും അവര് ചികയാറുണ്ട്. അത് സ്വാഭാവികവുമാണ്. അത്തരത്തില് പ്രേക്ഷകരെ അത്ഭുതപ്പെടുത്തിയ നടിയാണ് സൈറ വാസിം. കശ്മീരില് ജനിച്ച സൈറ 2016- ല് ആമിര് ഖാന് ചിത്രമായ ദങ്കലിലൂടെയാണ് ബോളിവുഡില് അരങ്ങേറിയത്. ബബിത ഫോഗട്ടിന്റെ വേഷമായിരുന്നു ചിത്രത്തില് സൈറയ്ക്ക്. തൊട്ടടുത്ത വര്ഷം സീക്രട്ട് സൂപ്പര്സ്റ്റാറിലും അവര് വേഷമിട്ടു. നടിയുടെ അഭിനയത്തില് നിന്നുള്ള പിന്വാങ്ങല് ഏറെ ചര്ച്ച ചെയ്യപ്പെട്ടിരുന്നു.
മതപരമായ കാരണങ്ങളുടെ പേരിലാണ് കഴിഞ്ഞ വര്ഷം സൈറ അപ്രതീക്ഷിതമായി അഭിനയത്തോടു വിടപറഞ്ഞത്. അഭിനയം തനിക്കു വഴങ്ങുന്നതാണെങ്കിലും താന് മറ്റൊരു ലോകത്തേക്ക് ആകര്ഷിക്കപ്പെട്ടതായും നടി വെളിപ്പെടുത്തിയിരുന്നു. അഞ്ചു വര്ഷം ബോളിവുഡില് നിറഞ്ഞുനിന്ന ശേഷമാണ് 19 വയസ്സുകാരിയായ സൈറ അഭിനയം നിര്ത്തിയത്. പ്രശസ്തിയും ആരാധനയും ഇഷ്ടം പോലെ ലഭിക്കുന്നുണ്ടെങ്കിലും ഇതല്ല തന്റെ ലോകമെന്നായിരുന്നു സൈറയുടെ കണ്ടെത്തല്.
അഭിനയത്തില് നിന്നും പിന്വലിഞ്ഞെങ്കിലും നടിയുടെ ചിത്രങ്ങള് സോഷ്യല്മീഡിയയില് പ്രചരിക്കുന്നുണ്ട്. അതോടെയാണ് അഭ്യര്ഥനയുമായി സൈറ വീണ്ടും രംഗത്തെത്തിയത്. പ്രിയപ്പെട്ടവരെ, എന്നോടു നിരന്തരം കാണിച്ച സ്നേഹത്തിനും സഹാനുഭൂതിക്കും അളവറ്റ നന്ദി പറയുന്നു. നിങ്ങളായിരുന്നു എന്റെ ശക്തിയും പ്രചോദനവും. എന്നെ പിന്തുണച്ച എല്ലാവര്ക്കും നന്ദി. നിങ്ങളുടെ കൈവശമുള്ള എന്റെ ചിത്രങ്ങള് ഒഴിവാക്കാന് ഒരിക്കല്ക്കൂടി അഭ്യര്ഥിക്കുന്നു: സൈറയുടെ പോസ്റ്റില് പറയുന്നു.
ജീവിതത്തില് വ്യത്യസ്തമായ പുതിയ അധ്യായത്തിനാണ് സൈറ തുടക്കം കുറിച്ചിരിക്കുന്നത്. ഇന്റര്നെറ്റില് നിന്ന് ചിത്രങ്ങള് പൂര്ണമായി ഒഴിവാക്കുക എന്നത് അസാധ്യമാണെന്ന് എനിക്കറിയാം. എന്നാല് നിങ്ങള്ക്കു ചെയ്യാന് കഴിയുന്ന ഒരു കാര്യമുമുണ്ട്. എന്റെ ചിത്രങ്ങള് കഴിയുന്നത്ര ഷെയര് ചെയ്യാതിരിക്കുക. അഭിനയത്തില് സജീവമായിരുന്നപ്പോള് എന്നെ സഹായിച്ചതുപോലെ ഈ വിഷമഘട്ടത്തിലും നിങ്ങള് സഹായിക്കുമെന്നാണ് പ്രതീക്ഷ. എന്നോടൊപ്പമുള്ള യാത്രയ്ക്ക് നന്ദി പറയുന്നു. ഞാന് പുതിയൊരു ജീവിതത്തിലേക്കു കടക്കുകയാണ്- സൈറ പറയുന്നു.