കര്‍ക്കിടകമാണ്, ആരോഗ്യം നോക്കണം; കർക്കിടക കഞ്ഞി മറക്കരുത്; പരമ്പരാഗത ഔഷധഭക്ഷണം ഉണ്ടാക്കി നോക്കിയാലോ?

പഞ്ഞക്കർക്കിടകമാണ്. ആരോഗ്യ സംരക്ഷണം പ്രധാനമാണ് . ഈ മഴക്കാലത്ത് രോഗങ്ങളെ അകറ്റി നിര്‍ത്താന്‍  അത്യുത്തമം പരമ്പരാഗത ഔഷധഭക്ഷണമായ കർക്കിടക കഞ്ഞി തന്നെ. മഴക്കാലത്ത് ശരീരത്തിന് പ്രതിരോധശേഷിയും കരുത്തും പകരുമെന്ന വിശ്വാസത്തിൽ തലമുറകളായി മലയാളികൾ പിന്തുടരുന്ന ആരോഗ്യശീലങ്ങളിലൊന്നാണ് ഈ കഞ്ഞി.

ആയുർവേദത്തിൽ കർക്കിടക മാസത്തെ ശരീരസംരക്ഷണത്തിന് ഏറ്റവും അനുയോജ്യമായ കാലഘട്ടമായാണ് കണക്കാക്കുന്നത്. ഈ സമയത്ത് ദഹനശേഷി താരതമ്യേന കുറയുന്നതിനാൽ എളുപ്പത്തിൽ ദഹിക്കുന്നതും ഔഷധഗുണങ്ങളുള്ളതുമായ ഭക്ഷണങ്ങളാണ് കൂടുതലായി കഴിക്കേണ്ടത്. അതുകൊണ്ടുതന്നെയാണ് നവര അരിയും ഔഷധക്കൂട്ടുകളും ചേർത്ത് തയ്യാറാക്കുന്ന കർക്കിടക കഞ്ഞിക്ക് പ്രാധാന്യം ലഭിച്ചത്.

കർക്കിടക കഞ്ഞിയുടെ പ്രധാന ചേരുവയാണ് നവര അരി. ഇതിനൊപ്പം ചെറുപയർ, ഉലുവ, ചുക്ക്, കുരുമുളക്, വെളുത്തുള്ളി, ജീരകം, മഞ്ഞൾ എന്നിവയും വിപണിയിൽ ലഭ്യമായ കർക്കിടക കഞ്ഞിക്കൂട്ടും ചേർത്താണ് കഞ്ഞി തയ്യാറാക്കുന്നത്. അവസാനം ഒന്നും രണ്ടും തേങ്ങാപ്പാൽ ചേർക്കുന്നതിലൂടെ രുചിയും പോഷകമൂല്യവും വർധിപ്പിക്കുന്നു.

തയ്യാറാക്കുന്ന വിധം

ആദ്യം നവര അരിയും ചെറുപയറും കഴുകി ഉലുവ, ചുക്ക്, കുരുമുളക്, വെളുത്തുള്ളി, മഞ്ഞൾ എന്നിവ ചേർത്ത് ആവശ്യത്തിന് വെള്ളത്തിൽ നന്നായി വേവിക്കുക. അരി കഞ്ഞിപരുവമായാൽ കർക്കിടക കഞ്ഞിക്കൂട്ട് വെള്ളത്തിൽ കലക്കി ചേർക്കണം. തുടർന്ന് രണ്ടാം തേങ്ങാപ്പാൽ ഒഴിച്ച് ചെറിയ തീയിൽ കുറച്ചുനേരം വേവിച്ച ശേഷം ആവശ്യത്തിന് ഉപ്പ് ചേർക്കുക. ഒടുവിൽ ഒന്നാം തേങ്ങാപ്പാൽ ചേർത്ത് തിളയ്ക്കുന്നതിന് മുൻപ് തീ അണയ്ക്കണം.

ആരോഗ്യഗുണങ്ങൾ

ആയുർവേദ വിശ്വാസപ്രകാരം കർക്കിടക കഞ്ഞി ശരീരത്തിന് ഊർജം നൽകാനും ദഹനശേഷി മെച്ചപ്പെടുത്താനും മഴക്കാലത്ത് രോഗപ്രതിരോധശേഷി വർധിപ്പിക്കാനും സഹായകമാണ്. ചുക്ക്, കുരുമുളക്, വെളുത്തുള്ളി തുടങ്ങിയ ചേരുവകൾ ദഹനത്തിന് സഹായകരമാണെന്നും നവര അരി പോഷകസമൃദ്ധമാണെന്നും വിദഗ്ധർ ചൂണ്ടിക്കാട്ടുന്നു.

എന്നിരുന്നാലും, കർക്കിടക കഞ്ഞി ഒരു ഔഷധചികിത്സയ്ക്ക് പകരമല്ലെന്ന് ആരോഗ്യവിദഗ്ധർ ഓർമിപ്പിക്കുന്നുമുണ്ട്. പ്രമേഹം, വൃക്കരോഗം, മറ്റ് ഗുരുതര ആരോഗ്യപ്രശ്നങ്ങൾ എന്നിവയുള്ളവർ ഇത് പതിവായി ഭക്ഷണത്തിൽ ഉൾപ്പെടുത്തുന്നതിന് മുൻപ് ഡോക്ടറുടെയോ ആയുർവേദ വിദഗ്ധരുടെയോ നിർദേശം തേടുന്നതാണ് ഉചിതം.

കർക്കിടക മാസത്തിൽ പപ്പടം, ചെറുപഴം, അച്ചാർ, ചെറുപയർ തോരൻ എന്നിവയ്‌ക്കൊപ്പം ചൂടോടെ വിളമ്പുന്ന കർക്കിടക കഞ്ഞി ഇന്നും കേരളത്തിന്റെ ഭക്ഷണസംസ്കാരത്തിലെ പ്രധാന പരമ്പരാഗത വിഭവങ്ങളിൽ ഒന്നായി തുടരുകയാണ്.