ചർമ്മത്തിലെ സുഷിരങ്ങൾ, എണ്ണമയം, ബ്ലാക്ക് ഹെഡ്സ്, വൈറ്റ് ഹെഡ്സ്, കൂടാതെ അന്തരീക്ഷ മലിനീകരണം എന്നിവ മൂലം മുഖ കാന്തി മങ്ങിപ്പോയി എന്ന് കരുതുന്നവർക്ക് തികച്ചും ഉപയോഗപ്രദമായ ക്ലാരിഫയിങ് ഫേസ് മാസ്കുകൾ ആണ് ഇപ്പോൾ ബ്യൂട്ടി-സ്കിൻ കെയർ ലോകത്തെ സംസാര വിഷയം.
സാധാരണ ഫേസ് വാഷുകൾക്കോ ക്ലെൻസറുകൾക്കോ നീക്കം ചെയ്യാൻ കഴിയാത്തവിധം ചർമ്മത്തിന്റെ ആഴങ്ങളിൽ അടിഞ്ഞുകൂടുന്ന മാലിന്യങ്ങളെ പുറന്തള്ളി ചർമ്മത്തിന് പെട്ടെന്ന് തന്നെ ഒരു ഉണർവ് നൽകാൻ ഇത്തരം മാസ്കുകൾക്ക് സാധിക്കുമെന്ന് വിദഗ്ധർ ചൂണ്ടിക്കാണിക്കുന്നു.
ആ മാസ്കുകൾ തിരഞ്ഞെടുക്കുമ്പോൾ പ്രത്യേകം ശ്രദ്ധിക്കേണ്ടത് അവയിൽ അടങ്ങിയിട്ടുള്ള ചേരുവകളാണ്. അതിൽ പ്രധാനമായും ക്ലേ, ചാർക്കോൾ, സാലിസിലിക് ആസിഡ്, എഎച്ച്എ-ബിഎച്ച്എ തുടങ്ങിയ ഘടകങ്ങൾ ആണ് ഉള്ളതെന്ന് ഉറപ്പു വരുത്തണം ഇത് ചർമ്മത്തിന്റെ നഷ്ടപ്പെട്ടുപോയ തിളക്കം വീണ്ടെടുക്കാൻ സഹായിക്കുന്നു. മാത്രമല്ല, ഇവ അമിത എണ്ണമയത്തെ ആഗിരണം ചെയ്യാനും, മൃതകോശങ്ങളെ നീക്കം ചെയ്യാനും, എക്സ്ഫോളിയേഷനിലൂടെ മുഖക്കുരു സാധ്യത തടയാനും സഹായിക്കുന്നുണ്ട്.
മുഖം വൃത്തിയായി കഴുകിയ ശേഷം ആഴ്ചയിൽ ഒന്നോ രണ്ടോ തവണ മാത്രം ഇവ അടങ്ങിയ മാസ്‌ക്കുകൾ ഉപയോഗിച്ചാൽ മതിയാകും. ഇത് ചർമ്മത്തിന്റെ സ്വാഭാവിക ഈർപ്പം നഷ്ടപ്പെടുത്താതെ തന്നെ തുറന്ന സുഷിരങ്ങളെ ചുരുക്കി തികച്ചും മനോഹരവും മൃദുലവുമായ സ്കിൻ സമ്മാനിക്കും.
കൂടാതെ, കാലാവസ്ഥാ വ്യതിയാനവും പൊടിയും കാരണം നിരന്തരം ചർമ്മപ്രശ്നങ്ങൾ നേരിടുന്നവർക്ക് അവരുടെ സ്കിൻ ടൈപ്പിന് അനുയോജ്യമായ ചേരുവകൾ അടങ്ങിയ മാസ്‌ക്കുകൾ തിരഞ്ഞെടുക്കാനും ശ്രദ്ധിക്കേണ്ടതുണ്ട്.