എന്റെ ശരിക്കുള്ള പേര് മോദി, ഉപ്പൂപ്പായുടെ പേരും മോദി: എം.എന്‍.കാരശേരി

തനിക്ക് ആദ്യമിട്ട പേര് മോദി എന്നായിരുന്നുവെന്ന് എഴുത്തുകാരന്‍ എം.എന്‍.കാരശേരി. ഉമ്മയുടെ ബാപ്പയുടെ പേരാണ് മോദി. അതാണ് തനിക്കിട്ടത്. ചെറുപ്പത്തില്‍ മോദി എന്നാണ് വിളിച്ചിരുന്നതെന്നും കാരശേരി മനോരമ ന്യൂസ് ‘നേരേ ചൊവ്വേ’യില്‍ പറഞ്ഞു.

‘സ്കൂളിൽ ചേർത്ത സമയത്ത് ബാപ്പ എന്‍റെ പേര് മൊഹിയുദീന്‍ എന്നാക്കി. മൊഹിയുദീന്‍ നടുക്കണ്ടി! ആറാം ക്ലാസില്‍ പഠിക്കുമ്പോള്‍ ഞാന്‍ എം.എന്‍ കാരശേരി എന്ന തൂലികാനാമം കൂടി ഉള്‍പ്പെടുത്തി. സാഹിത്യകാരനാകണമെന്ന ആഗ്രഹമായിരുന്നു അതിനുപിന്നില്‍.’ – കാരശേരി പറയുന്നു.

ഒരുപക്ഷേ ലോകത്തുതന്നെ ഏറ്റവും ചെറിയ പ്രായത്തില്‍ തൂലികാനാമം എടുത്ത ഒരാളാണ് താങ്കള്‍. ആറാംക്ലാസില്‍ പഠിക്കുമ്പോള്‍ മൊഹിയുദീന്‍ നടുക്കണ്ടി എന്നയാള്‍ എം.എന്‍.കാരശേരി ആയി. അതുകൊണ്ട് വല്ല പ്രയോജനവും ഉണ്ടായോ?

എനിക്ക് ഒരു എഴുത്തുകാരനാകണമെന്ന് കുട്ടിക്കാലത്തേ മോഹമുണ്ടായിരുന്നു. എന്റെ ഗുരുനാഥന്‍ നെട്ടയം ശിവദാസ്, പിന്നെ ഞാന്‍ പത്രത്തില്‍ കണ്ട ഒരു പേരുണ്ട് – എസ്.കെ.പൊറ്റക്കാട്, പിന്നെ എന്‍റെ കസിന്‍ ഉണ്ട്, സലാം കാരശേരി. അവരെയൊക്കെപ്പോലെ പേരിന്‍റെ കൂടെ സ്ഥലപ്പേര് ചേര്‍ക്കണമെന്ന് തോന്നിയപ്പോള്‍ മൊഹിയുദീന്‍ നടുക്കണ്ടി എന്ന എന്‍റെ ഈ നീണ്ട പേര് അതിന് പറ്റില്ല എന്ന് തോന്നി. എന്‍.മൊഹിയുദീന്‍ എന്ന് പറയുമ്പോഴും അതിന് ഒരു താളമില്ല. എം.എന്‍.ഒ.പി.ക്യൂ എന്നാണല്ലോ നമ്മളൊക്കെ പഠിക്കുന്നത്. അപ്പോ ഞാന്‍ എം.എന്‍.കാരശേരി എന്നാക്കി.

മോദി എന്ന പേര് മാറ്റേണ്ടിയിരുന്നോ? അതായിരുന്നെങ്കില്‍ ഇക്കാലത്ത് ഒരു പ്രത്യേക ശ്രദ്ധ കിട്ടുമായിരുന്നല്ലോ...:

ഇത് ഓരോ യോഗമല്ലേ. മൊഹിയുദീന്‍ എന്ന വാക്കിന് കേരളത്തില്‍ പല രൂപാന്തരങ്ങളുണ്ട്. മൊയ്തു, മൊയ്തീന്‍ എന്നൊക്കെ... അതില്‍ ഒരു രൂപാന്തരമാണ് മോദി. എന്നെ വീട്ടില്‍ വിളിച്ചിരുന്നത് കുഞ്ഞി എന്നാണ്. തെക്കന്‍ കേരളത്തില്‍ നിന്നുള്ള മാഷുമാരൊക്കെ മൊഹിയുദീന്‍ എന്നോ മൊയ്തീന്‍ എന്നോ വിളിക്കും. എനിക്ക് അതിലൊന്നും ഒരു സുഖം തോന്നിയില്ല. എഴുത്തുകാരനാകണമെങ്കില്‍ തൂലികാനാമം വേണമെന്നാണ് ഞാന്‍ വിചാരിച്ചിരുന്നത്. ചെറുപ്പകാലത്ത് ഗാന്ധിജിയുടെ ആദർശങ്ങളോടും മുഹമ്മദ് അബ്ദുറഹിമാൻ സാഹിബിന്റെ വ്യക്തിത്വത്തോടുമായിരുന്നു ആകർഷണം തോന്നിയതെന്നും കാരശേരി പറയുന്നു.

അഹിംസയിലുള്ള അടിയുറച്ച വിശ്വാസവും അക്രമ രാഷ്ട്രീയത്തോടുള്ള എതിർപ്പും കാരണം സജീവ രാഷ്ട്രീയത്തില്‍ ഇറങ്ങിയില്ല. പണത്തോടോ പദവികളോടോ അധികാരത്തോടോ ഒരു കാലത്തും ആഗ്രഹം തോന്നിയിട്ടില്ല. എന്നാൽ അഴിമതിവിരുദ്ധ പ്രസ്ഥാനമെന്ന നിലയിൽ ആം ആദ്മി പാർട്ടി വന്നപ്പോൾ പത്തു രൂപ നൽകി അംഗത്വം എടുത്തിരുന്നുവെന്നും അദ്ദേഹം കൂട്ടിച്ചേര്‍ത്തു.