മലപ്പുറം ചേലാമ്പ്രയിൽ നിന്ന് കാണാതായ യൂട്യൂബർ ദിൽഷാദിനെ കണ്ടെത്തി. ഏഴ് ദിവസത്തോളം ദിൽഷാദിനെക്കുറിച്ച് വിവരമൊന്നും ലഭിച്ചിരുന്നില്ല. തുടർന്ന് പൊലീസ് നടത്തിയ അന്വേഷണത്തിലാണ് ദിൽഷാദ് മേഘാലയയിലാണെന്ന് കണ്ടെത്തിയത്. പക്ഷേ, ദിൽഷാദ് ആശുപത്രിയിലാണെന്ന വാർത്തയ്ക്ക് പിന്നാലെ ആശ്വാസത്തിലും അതേസമയം ആശങ്കയിലുമാണ് ബന്ധുക്കളും സുഹൃത്തുക്കളും യൂട്യൂബ് ചാനലിന്റെ ആരാധകരും.
ഈ മാസം ആറിനാണ് ദിൽഷാദ് വീട്ടിൽ നിന്ന് യാത്ര പുറപ്പെട്ടത്. ‘യാത്രാ ടുഡേ’ എന്ന യൂട്യൂബ് ട്രാവൽ ചാനൽ നടത്തുന്ന ദിൽഷാദിന് ദൂരയാത്രകൾ സാധാരണ സംഭവമായിരുന്നു. അസമിലേക്ക് പോകുകയാണെന്ന് പറഞ്ഞ് പുറപ്പെട്ട ദിൽഷാദ് 22 വരെ തന്റെ സോഷ്യൽ മീഡിയയിൽ പോസ്റ്റുകളിലൂടെയും സ്റ്റോറികളിലൂടെയും സജീവമായിരുന്നു. എന്നാൽ 22-ന് ശേഷം ദിൽഷാദ് അപ്രത്യക്ഷനായി. ആരാധകർ പോസ്റ്റുകളുമില്ല, സ്റ്റോറികളുമില്ല എന്നത് കണ്ട് പരിഭവിച്ചു. എന്നാൽ ഭീതിയിലായിരുന്നു ദിൽഷാദിന്റെ അടുപ്പക്കാർ. ദിൽഷാദിനെ ഫോണിൽ ബന്ധപ്പെടാനാകുന്നില്ല. സ്വിച്ച്ഡ് ഓഫ്...
മൂന്ന് ദിവസമായിട്ടും വിവരങ്ങളൊന്നും ലഭിക്കാതെ വന്നതോടെയാണ് ദിൽഷാദിന്റെ ബന്ധുക്കൾ പൊലീസിൽ പരാതി നൽകിയത്. തുടർന്ന് പൊലീസ് നടത്തിയ അന്വേഷണത്തിലാണ് ദിൽഷാദിനെക്കുറിച്ച്, കാണാതായി ഏഴാം ദിവസം, വിവരം ലഭിച്ചത്. ‘ഐ ആം ക്വിറ്റ്’ എന്ന് ഇൻസ്റ്റഗ്രാമിൽ ഒരു പോസ്റ്റിട്ട ശേഷം ദിൽഷാദുമായി ബന്ധപ്പെടാൻ സാധിച്ചിരുന്നില്ല. കുടുംബത്തിന്റെ പരാതിയിൽ തേഞ്ഞിപ്പാലം പൊലീസ് കേസെടുത്ത് അന്വേഷണം നടത്തിവരികയായിരുന്നു. സൈബർ സംഘവും പൊലീസും സംയുക്തമായാണ് കേസ് അന്വേഷിച്ചത്.
ദിൽഷാദ് ബൈക്ക് അപകടത്തിൽപ്പെട്ട് മേഘാലയയിൽ ചികിത്സയിലാണെന്നാണ് ലഭിച്ചിരിക്കുന്ന വിവരം. എന്നാൽ അപകടത്തിന്റെ വ്യാപ്തിയോ ദിൽഷാദിന്റെ ആരോഗ്യസ്ഥിതിയോ സംബന്ധിച്ച് ഇനിയും വിവരങ്ങളില്ല. ‘ബ്രോ, കം ബാക്ക് സൂൺ’, ‘തിരിച്ചുവരൂ’, ‘അയ്യപ്പാ കാത്തോളണേ’ എന്നിങ്ങനെയുള്ള കമന്റുകളാണ് ദിൽഷാദിന്റെ ചാനലിൽ നിറയുന്നത്. ആഫ്രിക്കൻ രാജ്യങ്ങളിലുൾപ്പെടെ സഞ്ചരിച്ച് ‘യാത്രാ ടുഡേ’ എന്ന പേരിൽ വീഡിയോകൾ പങ്കുവയ്ക്കുന്ന ദിൽഷാദിന് ഒരു മില്യണിലധികം ഫോളോവേഴ്സുണ്ട്.