ആരോഗ്യമന്ത്രി വീണാ ജോര്ജിനെതിരായ ആക്രമണത്തില് ചലഞ്ചുമായി യൂത്ത് കോൺഗ്രസ് ദേശീയ സെക്രട്ടറി അബിൻ വർക്കി. വീണാ ജോർജിനെ ആക്രമിക്കുന്ന ദൃശ്യങ്ങൾ പുറത്ത് വിട്ടാൽ ഒരു ലക്ഷം രൂപ ഇനാം പ്രഖ്യാപിച്ചിരിക്കുകയാണ് അബിൻ. നേരത്തെ വീണാ ജോര്ജിനെതിരായ ആക്രമണത്തില് കുഴിമന്തി ചലഞ്ചുമായി കെഎസ്യു മട്ടന്നൂര് ബ്ലോക്ക് കമ്മിറ്റി രംഗത്ത് വന്നിരുന്നു.
ആരോഗ്യമന്ത്രി വീണാ ജോര്ജിനെ കണ്ണൂരില് വെച്ച് കെഎസ്യു പ്രവര്ത്തകര് അക്രമിക്കുന്ന വീഡിയോ ദൃശ്യങ്ങള് ഹാജരാക്കുന്നവര്ക്ക് കുഴിമന്തി നല്കുന്ന ചലഞ്ചാണ് കെഎസ്യു മട്ടന്നൂര് ബ്ലോക്ക് കമ്മിറ്റി നടത്തുന്നത്. വീണാ ജോര്ജിനെ അക്രമിച്ച സംഭവവുമായി ബന്ധപ്പെട്ട് കേരളത്തിന്റെ വിവിധ ഭാഗങ്ങളില് പ്രതിഷേധങ്ങളും മറ്റും നടക്കുമ്പോളാണ് ചലഞ്ചുമായി കെഎസ്യു പ്രവര്ത്തകര് രംഗത്തെത്തിയിരിക്കുന്നത്.
അതേസമയം ദൃശ്യങ്ങൾ ഹാജരാക്കുന്നവർക്ക് ഒരു പവൻ സ്വർണമാണ് യൂത്ത് കോൺഗ്രസ് പാരിതോഷികമായി പ്രഖ്യാപിച്ചിരിക്കുന്നത്. യൂത്ത് കോൺഗ്രസ് കണ്ണൂർ ജില്ലാ കമ്മിറ്റിയുടേതാണ് പ്രഖ്യാപനം.