ചാല സ്വര്‍ണക്കവര്‍ച്ച; പിടിച്ചെടുത്തത് 450 ഗ്രാം സ്വര്‍ണം; പ്രതികളെ തിരുവനന്തപുരത്തേക്ക് എത്തിക്കും

ചാലയിലെ ജ്വല്ലറി ഉടമയില്‍ നിന്നും സ്വര്‍ണം കവര്‍ന്ന കേസില്‍ വയനാട്ടില്‍ വച്ച് പിടിയിലായ പ്രതികളെ തിരുവനന്തപുരത്തേക്ക് കൊണ്ടുപോയി. നാലുപേരെയാണ് കേസുമായി ബന്ധപ്പെട്ട് ഇന്നലെ അറസ്റ്റ് ചെയ്തത്. ഇവരില്‍ നിന്നും 450 ഗ്രാം സ്വര്‍ണം പിടിച്ചെടുത്തു. കവര്‍ച്ചയുടെ ആസൂത്രണത്തില്‍ കൂടുതല്‍ പേര്‍ക്ക് പങ്കുണ്ടെന്ന നിഗമനത്തിലാണ് പൊലീസ്.  അറസ്റ്റിലായവര്‍ക്ക് പുറമെ തിരുവനന്തപുരത്ത് നിന്നും കസ്റ്റഡിയിലെടുത്ത രണ്ടു പേരെ ചോദ്യം ചെയ്തപ്പോഴാണ് കൂടുതല്‍ പേരിലേക്ക് വഴി തെളിഞ്ഞത്. സ്വര്‍ണം കടയില്‍ വില്‍ക്കുന്നവര്‍ക്കുള്‍പ്പടെ ഗൂഢാലോചനയിലും ആസൂത്രണത്തിലും പങ്കുണ്ടെന്നാണ് പോലീസ് നിഗമനം. അതേസമയം സ്വര്‍ണം പൊട്ടിക്കല്‍ ബന്ധം ഇവര്‍ക്കില്ലെന്നും പൊലീസിന്‍റെ നിഗമനം. പ്രതികളെ പടിഞ്ഞാറത്തറ സ്റ്റേഷനില്‍ നിന്നുമാണ് തിരുവനന്തപുരത്തേക്ക് കൊണ്ടുപോയത്. പിടിയിലായ രാജീവിനെ നോട്ടിസ് നല്‍കി വിട്ടയച്ചു. രാജീവിന്‍റെ റിസോര്‍ട്ടിലേക്കാണ് പ്രതികള്‍ എത്തിയത്.

കവര്‍ച്ച നടന്ന് 48 മണിക്കൂറിനകമാണ് പ്രതികളെ കേരള പൊലീസ് പിടികൂടിയത്. അഞ്ചുപേര്‍ കാറില്‍ സഞ്ചരിക്കുമ്പോഴായിരുന്നു വളഞ്ഞ് പൊലീസിന്‍റെ പിടികൂടല്‍. ഒരാള്‍ ഓടി രക്ഷപെട്ടു. തിരുവനന്തപുരത്ത് നിന്നും കസ്റ്റഡിയിലായവരില്‍ ഒരാള്‍ മഹാരാഷ്ട്ര സ്വദേശിയാണ്.

വെള്ളിയാഴ്ച രാത്രി പത്തരയോടെയാണ് ചാലയിലെ വൈഷ്ണവി ജ്വല്ലറി അടച്ച് സ്വര്‍ണവുമായി വീട്ടിലേക്ക് മടങ്ങാനിറങ്ങിയ നന്ദകുമാറില്‍ നിന്നും ബൈക്കിലെത്തിയ പ്രതികള്‍ കവര്‍ച്ച നടത്തിയത്. മൂന്ന് പതിറ്റാണ്ടോളമായി ചാലയില്‍ സ്വര്‍ണക്കച്ചവടം നടത്തിവരികയായിരുന്നു നന്ദകുമാര്‍. വിവരം പൊലീസില്‍ അറിയിച്ചതോടെയാണ് അന്വേഷണം ഊര്‍ജിതമായത്. തിരുവനന്തപുരം കമ്മിഷണര്‍ അരുള്‍ ബി.കൃഷ്ണയുടെ നേതൃത്വത്തില്‍ മൂന്ന് ടീമുകളായി തിരിഞ്ഞാണ് അന്വേഷണം നടത്തിയത്.