കെഎംസിഎൽ ശുദ്ധീകരിക്കുമെന്ന് ആരോഗ്യമന്ത്രി; എംഡിയായി അന്വേഷണം നേരിടുന്ന ഉദ്യോഗസ്ഥൻ

കോവിഡ് കാലത്തെ കോടികളുടെ പർച്ചേസ് ഇടപാടുകളുമായി ബന്ധപ്പെട്ട് അന്വേഷണം നേരിടുന്ന ഉദ്യോഗസ്ഥനെ വീണ്ടും നിർണായക സ്ഥാനത്ത് നിയമിച്ചതോടെ കേരള മെഡിക്കൽ സർവീസസ് കോർപ്പറേഷൻ (കെഎംസിഎൽ) വീണ്ടും വിവാദത്തിൽ. ലോകായുക്ത അന്വേഷണവും വിജിലൻസ് പരിശോധനയും നേരിടുന്ന ഡി. ബാലമുരളിയെയാണ് കെഎംസിഎല്ലിന്റെ പുതിയ മാനേജിങ് ഡയറക്ടറായി നിയമിച്ചിരിക്കുന്നത്. Also Read: 'കൊച്ചിയില്‍ വഴിയോരക്കടയില്‍ വരെ നാണമില്ലാതെ ബീഫ് വില്‍ക്കുന്നു'; വേദനയെന്ന് യുവാവ്; ട്രോളി മലയാളികള്‍

2021-ലെ കോവിഡ് കാല പർച്ചേസ് ഇടപാടുകളുമായി ബന്ധപ്പെട്ടാണ് ബാലമുരളിക്കെതിരെ അന്വേഷണം നടക്കുന്നത്. ഇദ്ദേഹം എംഡിയായിരുന്ന സമയത്ത് അംഗീകാരമില്ലാത്ത സ്ഥാപനങ്ങളിൽ നിന്ന് പി.പി.ഇ കിറ്റുകൾ വാങ്ങിയെന്നും ഉയർന്ന വിലയ്ക്ക് സാധനങ്ങൾ പർച്ചേസ് ചെയ്തെന്നുമാണ് പ്രധാന ആരോപണങ്ങൾ. കോടികളുടെ മരുന്നുവാങ്ങലുമായി ബന്ധപ്പെട്ട് അഴിമതി നടന്നെന്ന ആരോപണങ്ങളും കോർപ്പറേഷനെതിരെ ഉയർന്നിരുന്നു.

കെഎംസിഎല്ലിലെ ക്രമക്കേടുകൾ അവസാനിപ്പിച്ച് സ്ഥാപനം ശുദ്ധീകരിക്കുമെന്ന ആരോഗ്യമന്ത്രി കെ. മുരളീധരന്റെ പ്രഖ്യാപനത്തിന് പിന്നാലെയാണ് ആരോപണങ്ങൾ നേരിടുന്ന ഉദ്യോഗസ്ഥനെ തന്നെ കോർപ്പറേഷന്റെ തലപ്പത്ത് നിയമിച്ചിരിക്കുന്നത്.

നിരന്തരമായ വിവാദങ്ങളും ആരോപണങ്ങളും നേരിടുന്ന കോർപ്പറേഷന്റെ തലപ്പത്തേക്ക് അനുയോജ്യനായ ഉദ്യോഗസ്ഥനെ കണ്ടെത്താൻ പ്രയാസപ്പെടുന്ന സാഹചര്യത്തിലാണ് പുതിയ നിയമനവും വിമർശനങ്ങൾക്ക് വഴിവെക്കുന്നത്. അന്വേഷണം നേരിടുന്ന ഉദ്യോഗസ്ഥനെ വീണ്ടും എംഡി സ്ഥാനത്ത് നിയമിച്ചതിനെച്ചൊല്ലി ഭരണതലത്തിലും ചർച്ചകൾ ശക്തമാകുകയാണ്.