‘എൻഎസ്എസ് മക്കൾ സർവീസ് സൊസൈറ്റിയായി’; സുകുമാരൻ നായർക്കെതിരെ കെ.ബി.ഗണേഷ് കുമാർ

എൻഎസ്എസ് ജനറൽ സെക്രട്ടറി സുകുമാരൻ നായർക്കെതിരെ രൂക്ഷ വിമർശനവുമായി കെ.ബി. ഗണേഷ് കുമാർ. സുകുമാരൻ നായരെ ‘ഗോഡ്ഫാദർ’ സിനിമയിലെ അഞ്ഞൂറാനോട് ഉപമിച്ച ഗണേഷ് കുമാർ, ‘നക്കാപ്പിച്ച കണ്ട് നായർ വീഴരുതെന്നും’ പറഞ്ഞു. എൻഎസ്എസ് ഇന്ന് ‘മക്കൾ സർവീസ് സൊസൈറ്റി’ അഥവാ എംഎസ്എസ് ആയി മാറിയെന്നും അദ്ദേഹം ആരോപിച്ചു. Also Read: 'പൈസ അളവില്‍ കൂടുതലായി, ഇന്‍കം ടാക്സ് ചോദ്യം ചെയ്തു'; യൂട്യുബ് വരുമാനത്തെ പറ്റി ഫിറോസ് ചുട്ടിപ്പാറ

വണ്ടൻമേട് എൻഎസ്എസ് യൂണിയൻ രജതജൂബിലി ആഘോഷത്തിന്റെ ഉദ്ഘാടനച്ചടങ്ങിലായിരുന്നു ഗണേഷ് കുമാറിന്റെ വിമർശനം. എൻഎസ്എസ് നിലനിൽക്കുന്നത് സുകുമാരൻ നായരുടെ മക്കൾക്കും ബന്ധുക്കൾക്കും വേണ്ടിയാണെന്നായിരുന്നു അദ്ദേഹത്തിന്റെ ആരോപണം. അതിനാൽ എൻഎസ്എസിന്റെ പേര് എംഎസ്എസ് എന്നാക്കണമെന്ന പരിഹാസവും ഗണേഷ് കുമാർ നടത്തി. സുകുമാരൻ നായരുടെ മകൾക്ക് എൻഎസ്എസിന് കീഴിലുള്ള കോളജുകളുടെ ചുമതല നൽകിയിരിക്കുകയാണെന്നും ഗണേഷ് കുമാർ ആരോപിച്ചു. പ്രഫസറാകാനുള്ള യോഗ്യത പോലുമില്ലാത്ത വ്യക്തിയാണ് എൻഎസ്എസ് കോളജുകൾ നിയന്ത്രിക്കുന്നതെന്നായിരുന്നു അദ്ദേഹത്തിന്റെ വിമർശനം. എന്നാൽ, ഈ ആരോപണങ്ങളെക്കുറിച്ച് കൂടുതൽ വിശദീകരണം അദ്ദേഹം നൽകിയില്ല.

അടുത്തിടെ എൻഎസ്എസ് ആസ്ഥാനത്ത് വിദ്യാഭ്യാസമന്ത്രി മന്ത്രി എൻ. ഷംസുദ്ദീൻ എത്തിയപ്പോൾ സുകുമാരൻ നായർ പൊന്നാടയണിച്ച് സ്വീകരിച്ചതിനെയും ഗണേഷ് കുമാർ വിമർശിച്ചു. ചെറുമകന്റെ സർക്കാർ സർവീസിലെ തടസ്സങ്ങൾ നീക്കുന്നതിനുള്ള വ്യക്തിപരമായ താൽപര്യത്തിന്റെ ഭാഗമായിരുന്നു സ്വീകരണമെന്നായിരുന്നു ആരോപണം. സുകുമാരൻ നായരുടെ മുസ്ലിം സമുദായത്തോടുള്ള നിലപാടുകളെയും ഗണേഷ് കുമാർ വിമർശിച്ചു. ചങ്ങനാശ്ശേരിയിലെ ചന്ദനക്കുടം നിർത്താൻ സുകുമാരൻ നായർ ഇടപെട്ടെന്ന ആരോപണവും അദ്ദേഹം ഉന്നയിച്ചു. അതേസമയം, മുസ്ലിം സമുദായത്തോട് തനിക്ക് സ്നേഹമുണ്ടെന്നാണ് സുകുമാരൻ നായർ പറയുന്നതെന്നും ഗണേഷ് കുമാർ പരിഹസിച്ചു.

ധനലക്ഷ്മി ബാങ്കിലെ നിക്ഷേപം പിൻവലിക്കാൻ കരയോഗങ്ങൾക്ക് സുകുമാരൻ നായർ നിർദേശം നൽകിയെന്ന ആരോപണവും ഗണേഷ് കുമാർ ഉന്നയിച്ചു. ബന്ധുവിനെ ബാങ്കിൽനിന്ന് ഒഴിവാക്കിയതുമായി ബന്ധപ്പെട്ടാണ് ഇത്തരമൊരു നടപടിയുണ്ടായതെന്നും അദ്ദേഹം ആരോപിച്ചു. മാതാ അമൃതാനന്ദമയിയെ ജാതീയമായി അധിക്ഷേപിച്ചയാളാണ് സുകുമാരൻ നായരെന്നും ഗണേഷ് കുമാർ ആരോപിച്ചു. അതേസമയം, അമൃതാനന്ദമയിയുടെ കീഴിലുള്ള എൻജിനീയറിങ് കോളജിലാണ് സുകുമാരൻ നായരുടെ ചെറുമകൻ പഠിക്കുന്നതെന്നും അദ്ദേഹം ചൂണ്ടിക്കാട്ടി.

ഭാര്യക്കും മക്കൾക്കും ജോലി നൽകിക്കൊണ്ട് സുകുമാരൻ നായർ ആളുകളെ അടിമകളാക്കുകയാണെന്നും ഗണേഷ് കുമാർ ആരോപിച്ചു. എൻഎസ്എസ് ജനറൽ സെക്രട്ടറിയാകാൻ അഭിഭാഷകർ മാത്രമേ യോഗ്യരാകൂ എന്ന പ്രചാരണം നിലനിൽക്കുമ്പോഴും പത്താം ക്ലാസ് പോലും ജയിക്കാത്തവർക്ക് എൻഎസ്എസ് ആസ്ഥാനത്ത് ഇരിക്കാമെന്ന് തെളിയിച്ചുവെന്നും അദ്ദേഹം പരിഹസിച്ചു. സുകുമാരൻ നായരെ ‘സോ ചീപ്പ്’ എന്നും ഗണേഷ് കുമാർ വിശേഷിപ്പിച്ചു.

എൻഎസ്എസിനെ ‘ദുഷ്ടന്റെയും ഭീരുവിന്റെയും കൈയിൽനിന്ന് രക്ഷിക്കണം’ എന്നും ‘നക്കാപ്പിച്ച കണ്ട് നായർ വീഴരുതെന്നും’ ഗണേഷ് കുമാർ പറഞ്ഞു. ഹൈറേഞ്ച് എൻഎസ്എസ് യൂണിയനും പത്തനാപുരം എൻഎസ്എസ് യൂണിയനും രാത്രിയുടെ മറവിൽ പിരിച്ചുവിട്ടതിന്റെ കാരണം സമുദായ നേതൃത്വം വ്യക്തമാക്കണമെന്നും അദ്ദേഹം ആവശ്യപ്പെട്ടു.