നൈറ്റ് ലൈഫിന് ഒരു കോടി; വൈഫൈയ്ക്ക് 15 കോടി; ബജറ്റിലെ പ്രഖ്യാപനങ്ങള്‍
- Kerala
- Published on Feb 07, 2025, 06:07 PM IST
ടൂറിസം രംഗത്ത് പുതിയ ട്രെന്‍ഡ് കൊണ്ടുവരുന്ന പദ്ധതികള്‍ പ്രഖ്യാപിച്ച് സംസ്ഥാന ബജറ്റ്. സംസ്ഥാനത്തെ പ്രമുഖ പട്ടണങ്ങളില്‍ നൈറ്റ്ലൈഫിന് സര്‍ക്കാര്‍ പിന്തുണ നല്‍കും. ഒരു കോടി ഇതിനായി ബജറ്റില്‍ വകയിരുത്തി. പ്രധാന സ്ഥലങ്ങളില്‍ വൈഫൈ ഹോട്ട്സ്പോട്ടുകള്‍ സ്ഥാപിക്കുന്നതിന് 15 കോടി രൂപയും പ്രഖ്യാപിച്ചു.
* ടൂറിസം കേന്ദ്രങ്ങളിലെ ശുചിമുറി സ്ഥാപിക്കാനും നിലവിലുള്ളവയുടെ അറ്റകുറ്റപണിക്കും 2 കോടി രൂപ അനുവദിച്ചു. വിനോദ സഞ്ചാരികളില്‍ വര്‍ധിച്ചു വരുന്ന ട്രെക്കിങ് താല്‍പര്യം പ്രോത്സാഹിപ്പിക്കാകാന്‍ വനയാത്ര പദ്ധതിക്ക് മൂന്ന് കോടി രൂപ അനുവദിച്ചു.
* കേരളത്തിൽ വർധിച്ചുവരുന്ന തെരുവുനായകളുടെ ആക്രമണം തടയാൻ മൃഗസംരക്ഷണ വകുപ്പും തദ്ദേശസ്വയംഭരണ വകുപ്പും സംയുക്തമായി കർമപരിപാടികൾ തയാറാക്കും. പോർട്ടബിൾ എബിസി സെന്‍ററുകള്‍ സ്ഥാപിച്ച് തെരുവുനായകളുടെ വന്ധ്യംകരണം കാര്യക്ഷമമായി നടപ്പിലാക്കാനുള്ള സാധ്യതകൾ ആരായും. ഇതിനായി 2 കോടി വകയിരുത്തുമെന്ന് ധനമന്ത്രി ബജറ്റ് പ്രഖ്യാപനത്തിൽ പറഞ്ഞു.
* അതിഥി തൊഴിലാളി ഉന്നമനത്തിന് 5.50 കോടി രൂപയാണ് അനുവദിച്ചത്. അതിഥി തൊഴിലാളികള്‍ക്കായി സംസ്ഥാനം നടപ്പിലാക്കുന്ന അപ്നാ ഘര്‍, ആവാസ്– ആരോഗ്യ ഇന്‍ഷൂറന്‍സ് പദ്ധതി, ബോധവത്കരണ പദ്ധതികള്‍ എന്നിവയ്ക്കാണ് തുക.
* സംസ്ഥാനത്ത് പാമ്പ് കടിയേറ്റുള്ള മരണങ്ങള്‍ അടുത്ത അഞ്ച് വര്‍ഷം കൊണ്ട് പൂര്‍ണമായും ഇല്ലാതാക്കാന്‍ പാമ്പുവിഷബാധ ജീവഹാനി രഹിത കേരളം പദ്ധതി നടപ്പിലാക്കും. ഇതടക്കം വന്യജീവ ആക്രമണം തടയാന്‍ 25 കോടി വകയിരുത്തി.
* തെക്കന്‍ കേരളത്തില്‍ കപ്പല്‍ നിര്‍മാണശാല സ്ഥാപിക്കണമെന്ന ആവശ്യം ശക്തമാണ്. കേന്ദ്രവുമായി ചര്‍ച്ചനടത്തും. സംസ്ഥാനം ഏറ്റെടുക്കേണ്ട ഉത്തരവാദിത്വം നിര്‍വഹിക്കും.
*അഴീക്കല്‍, ബേപ്പൂര്‍, കൊല്ലം, കൊടുങ്ങല്ലൂര്‍, പൊന്നാനി, ആലപ്പുഴ, കണ്ണൂര്‍, കാസര്‍കോട്, തലശേരി എന്നി നോണ്‍ മേജര്‍ തുറമുഖങ്ങള്‍ വികസിപ്പിക്കുന്നതിന് 65 കോടി രൂപ.
