വയനാടിനായി ഡിവൈഎഫ്ഐയുടെ പോർക്ക് ഫെസ്റ്റ്; മതനിന്ദയെന്ന് നാസർ ഫൈസി

ഡിവൈഎഫ്ഐ പോർക്ക് ചലഞ്ചിനെതിരെ സമസ്ത നേതാവ് നാസർ ഫൈസി കൂടത്തായി. പന്നി മാംസം നിഷിദ്ധമായവരാണ് വയനാട്ടിലെ ദുരിത ബാധിതരിൽ വലിയൊരു വിഭാഗം. അവരെ അവഹേളിക്കുന്നതാണ് ഡിവൈഎഫ്ഐ പോർക്ക് ചലഞ്ച് എന്നും അദ്ദേഹം ഫേസ്ബുക്കിൽ കുറിച്ചു. ചലഞ്ചിൽ ഒളിച്ച് കടത്തുന്ന മതനിന്ദയെന്ന തലക്കെട്ട് ഓടെയാണ് ഫേസ്ബുക്ക് പോസ്റ്റ്.  ഡിവൈഎഫ്ഐ കോതമംഗലം മുനിസിപ്പൽ കമ്മിറ്റിയാണ് വയനാടിനായി പോർക്ക് ചലഞ്ച് പ്രഖ്യാപിച്ചത്. 

മതനിരപേക്ഷതയെ സങ്കര സംസ്കാരമാക്കുന്ന ചെഗുവേരിസം. വയനാട്ടിലെ ദുരിതത്തിൽ പെട്ടവർ അധികവും പന്നി ഇറച്ചി നിഷിദ്ധമായി കരുതിയവരാണ്. അറിഞ്ഞ് കൊണ്ട് ‍ഡിവൈഎഫ്ഐ കോതമംഗലം കമ്മറ്റി അത് ചലഞ്ചാക്കി ഫണ്ടുണ്ടാക്കി നൽകുകയാണെന്ന് പോസ്റ്റ് വിമർശിക്കുന്നു. അനുവദനീയമായ ഭക്ഷ്യം പലതും ചലഞ്ചാക്കാമായിരുന്നിട്ടിട്ടും ദുരിതരിൽ വലിയൊരു വിഭാഗത്തിന് നിഷിദ്ധ ഭക്ഷ്യത്തിൻ്റെ വരുമാനമുണ്ടാക്കി ദുരിത നിവാരണം നടത്തുന്നത് സാമാന്യമായി പറഞ്ഞാൽ അവഹേളനമാണ്, അധിക്ഷേപമാണ്, നിന്ദയുമാണെന്നും കുറിപ്പിലുണ്ട്. അതേസമയം പോസ്റ്റിന് താഴെ രൂക്ഷവിമർശനമാണ്.

ഫെയ്സ്ബുക്ക് കുറിപ്പിന്റെ പൂർണ രൂപം 

*ചലഞ്ചിൽ ഒളിച്ച് കടത്തുന്ന മത നിന്ദ*

മതനിരപേക്ഷതയെ സങ്കര സംസ്കാരമാക്കുന്ന ചെഗുവേരിസം. വയനാട്ടിലെ ദുരിതത്തിൽ പെട്ടവർ അധികവും പന്നി ഇറച്ചി നിഷിദ്ധമായി കരുതിയവരാണ്. അറിഞ്ഞ് കൊണ്ട് DYFI കോതമംഗലം കമ്മറ്റി അത് ചലഞ്ചാക്കി ഫണ്ടുണ്ടാക്കി നൽകുകയാണ്. അനുവദനീയമായ ഭക്ഷ്യം പലതും ചലഞ്ചാക്കാമായിരുന്നിട്ടിട്ടും ദുരിതരിൽ വലിയൊരു വിഭാഗത്തിന് നിഷിദ്ധ ഭക്ഷ്യത്തിൻ്റെ വരുമാനമുണ്ടാക്കി ദുരിത നിവാരണം നടത്തുന്നത് സാമാന്യമായി പറഞ്ഞാൽ അവഹേളനമാണ്, അധിക്ഷേപമാണ്, നിന്ദയുമാണ്. വയനാട്ടുകാരെ ഭക്ഷിപ്പിക്കുന്നില്ലെന്ന " ന്യായം '' അത് കൊണ്ട് കിട്ടുന്ന വരവ് വയനാട്ടുകാരെ അവഹേളിക്കലാണെന്ന് ധരിക്കുന്നതിനുള്ള മറുപടിയാവില്ല.

നാസർ ഫൈസി കൂടത്തായി