ആ 18 കോടിയിലേക്ക് ഒരു കോടി സമാഹരിച്ചു; അയക്കാൻ തുടങ്ങുമ്പോൾ ആ വാർത്ത

അപൂർവരോഗം ബാധിച്ച കണ്ണൂർ സ്വദേശി മുഹമ്മദിനായി മലയാളികളാകെ കൈകോർത്ത് 18 കോടി സമാഹരിച്ച വാർത്ത മുഹമ്മദിന്റെ കുടുംബം മാത്രമാല്ല, നാടാകെ സന്തോഷത്തോടെയാണ് കേട്ടത്. ലോകത്തിന്റെ നാനാകോണിലുള്ള മലയാളികളാണ് ജാതി, മത, ഭേതമില്ലാതെ ഈ നൻമക്കായി ഒരുമിച്ചത്. അവരിലൊരാൾ മലപ്പുറം സ്വദേശിയും ദുബായിലെ ABRECO ഗ്രൂപ്പ് ഓഫ് കംപനീസിന്റെ എംഡിയുമായ മുഹമ്മദ് ഷാജി ആയിരുന്നു.

ഒരു കോടിയിലധികം രൂപയാണ് ഷാജിയും സുഹൃത്തുക്കളും കമ്പനിയിലെ ജീവനക്കാരും ചേർന്ന് സമാഹരിച്ചത്. ആ തുക മുഹമ്മദിന്റെ ചികിൽസക്കായി അയക്കാൻ തുടങ്ങിയപ്പോളാണ് ആവശ്യമായ തുക ഇതിനോടകം ലഭിച്ചു എന്ന വാർത്തയെത്തുന്നത്. 

സമാഹരിച്ച തുക ഇനിയെന്തു ചെയ്യും എന്ന ആലോചനയിൽ ഇരിക്കുമ്പോളാണ് ഇതേ രോഗമുള്ള ഈറോഡിലെ മൈത്രയെയും പെരിന്തൽ മണ്ണയിലെ ഇമ്രാനെയും ലക്ഷദ്വീപിലെ നാസറിനെയും കുറിച്ച് അറിയുന്നത്. ഇതോടെ മുഹമ്മദിനായി അയച്ച തുക ഈ കുട്ടികൾക്ക് നല്‍കാൻ തീരുമാനിച്ചെന്നും മുഹമ്മദ് ഷാജി ഫെയ്സ്ബുക്കിൽ പങ്കുവെച്ച വിഡിയോയിൽ പറയുന്നു.