പിഴവ് പറ്റിയത് പൈലറ്റുമാര്‍ക്ക്; 2023 മുംബൈ ജെറ്റ് ക്രാഷ്; അദ്ഭുത അപകടത്തില്‍ ഞെട്ടലായി അന്വേഷണ റിപ്പോര്‍ട്ട്

2023 സെപ്റ്റംബർ 14-നാണ് വിശാഖപട്ടണത്ത് നിന്ന് മുംബൈയിലേക്ക് സർവീസ് നടത്തിയ വിഎസ്ആർ വെഞ്ചേഴ്സിന്റെ (VSR Ventures) ലിയർജെറ്റ് 45XR (Learjet 45XR) എന്ന സ്വകാര്യ ചാർട്ടർ വിമാനം മുംബൈ വിമാനത്താവളത്തിൽ അപകടത്തിൽപ്പെട്ടത്. രാജ്യത്തെ നടുക്കിയ ദുരന്തമായേക്കാവുന്ന സംഭവം പക്ഷെ ഭാഗ്യവശാല്‍ ലോകത്തെ ഞെട്ടിച്ച വിമാനാപകടമായി മാറി. കനത്ത മഴയുള്ള മോശം കാലാവസ്ഥയിൽ ലാൻഡ് ചെയ്യാൻ ശ്രമിച്ച വിമാനം റൺവേയിൽ നിന്ന് തെന്നിമാറുകയും രണ്ട് ഭാഗങ്ങളായി മുറിഞ്ഞ് തീപിടിക്കുകയുമായിരുന്നു.  അപകടത്തിൽ വിമാനത്തിലുണ്ടായിരുന്ന രണ്ട് പൈലറ്റുമാർക്കും ആറ് യാത്രക്കാർക്കും പരുക്കേറ്റു. എന്നാല്‍ ആര്‍ക്കും ജീവഹാനി സംഭവിച്ചില്ല. സാധാരണ ജെറ്റ് അപകടങ്ങളില്‍ മുഴുവന്‍ പേരും മരിക്കുന്നതാണ് പതിവ്. 

എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോ (AAIB) നടത്തിയ അന്വേഷണത്തിൽ അപകടത്തിന് കാരണം വിമാനത്തിന്റെ സാങ്കേതിക തകരാറുകളല്ലെന്ന് കണ്ടെത്തി. കനത്ത മഴ കാരണം റൺവേ വ്യക്തമായി കാണാൻ സാധിക്കാതിരുന്നിട്ടും ലാൻഡിംഗ് ഒഴിവാക്കി വിമാനം വീണ്ടും മുകളിലേക്ക് ഉയർത്താൻ (Go-Around) പൈലറ്റുമാർ തയ്യാറായില്ല. ഇത്തരം പ്രതികൂല സാഹചര്യങ്ങളിൽ പാലിക്കേണ്ട കൃത്യമായ സുരക്ഷാ മാനദണ്ഡങ്ങൾ ലംഘിച്ച് അസ്ഥിരമായ രീതിയിലാണ് പൈലറ്റുമാർ ലാൻഡിങ്ങിന് തുനിഞ്ഞത്.

ലാൻഡിംഗ് സമയത്ത് വിമാനത്തിന്റെ വേഗത ആവശ്യത്തിലധികം കുറഞ്ഞത് പൈലറ്റുമാരുടെ ശ്രദ്ധയിൽപ്പെട്ടില്ലെന്ന് റിപ്പോർട്ട് വ്യക്തമാക്കുന്നു. ഇത് കുറഞ്ഞ ഉയരത്തിൽ വെച്ച് വിമാനത്തിന്റെ ചിറകുകളുടെ ലിഫ്റ്റ് പെട്ടെന്ന് നഷ്ടപ്പെടുന്ന അവസ്ഥയിലേക്ക് (Aerodynamic Stall) നയിച്ചു. കോക്‌പിറ്റിൽ ഇതിനായുള്ള മുന്നറിയിപ്പ് സംവിധാനങ്ങൾ കൃത്യമായി മുഴങ്ങിയിരുന്നെങ്കിലും, വിമാനത്തിന്റെ നിയന്ത്രണം തിരിച്ചുപിടിക്കുന്നതിൽ പൈലറ്റുമാര്‍ക്ക് ഗുരുതരമായ വീഴ്ച സംഭവിച്ചു.

മുംബൈ എയർപോർട്ടിൽ ഏർപ്പെടുത്തിയിരുന്ന ചില നിയന്ത്രണ സമയത്തിന് മുമ്പായി എങ്ങനെയെങ്കിലും ലാൻഡ് ചെയ്യണമെന്ന പൈലറ്റുമാരുടെ അനാവശ്യ സമയ സമ്മർദ്ദവും ഈ ദുരന്തത്തിന് ആക്കം കൂട്ടി. കൂടാതെ, വിമാനം നിയന്ത്രിച്ചിരുന്ന വിഎസ്ആർ വെഞ്ചേഴ്സ് കമ്പനിയുടെ ആന്തരിക ഓഡിറ്റിംഗിലും പൈലറ്റുമാർക്ക് നൽകേണ്ടിയിരുന്ന പരിശീലനങ്ങളിലും വലിയ പോരായ്മകൾ ഉണ്ടായിരുന്നതായി അന്വേഷണ റിപ്പോർട്ട് ചൂണ്ടിക്കാണിക്കുന്നു.