‘കുഞ്ഞിനെ എടുത്തത് ഉള്ളിലൊരു അച്ഛന്‍ ഉള്ളതിനാല്‍’; വിമര്‍ശനങ്ങള്‍ക്ക് മറുപടി

 

കൊല്ലം ഓയൂരില്‍ നിന്ന് കാണാതായ ആറുവയസുകാരിയെ കണ്ടെത്തിയെന്ന വാര്‍ത്ത പങ്കിട്ടതിന് പിന്നാലെ നടനും കൊല്ലം എംഎല്‍എയുമായ മുകേഷിന് ട്രോള്‍ മഴ. കുട്ടിയെ കണ്ടെത്തിയതിന് ഒപ്പം എഎല്‍എയെ കൂടി കണ്ടുകിട്ടിയെന്നായിരുന്നു ട്രോള്‍. പിന്നാലെ വിമര്‍ശനങ്ങളും പരിഹാസങ്ങളും സോഷ്യല്‍ വാളുകളില്‍ നിറഞ്ഞു. 

 

കുട്ടിയെ കൊല്ലം ആശ്രാമം മൈതാനിയില്‍ നിന്ന് കണ്ടുകിട്ടിയതിനെ പിന്നാലെ മുകേഷ് കുട്ടിയെ സന്ദര്‍ശിക്കുകയായിരുന്നു. കുട്ടിയെ എടുത്ത് നില്‍ക്കുന്ന ചിത്രവും പങ്കുവെച്ചു. പിന്നാലെയാണ് ട്രോളുകള്‍ എത്തിയത്. ഇപ്പോള്‍ വിമര്‍ശനങ്ങള്‍ക്ക് മറുപടിയുമായി താരം പങ്കുവെച്ച ഫേസ്ബുക്ക് പോസ്റ്റും ശ്രദ്ധേയമായി. കുട്ടിയെ എടുത്തത് ഉള്ളില്‍ ഒരച്ഛന്‍ ഉള്ളതിനാലാണ്. അപരിചിതരുടെ ഇടയില്‍ പകച്ചുനിന്ന കുഞ്ഞിന് തന്നെ കണ്ടപ്പോള്‍ ആശ്വാസമായെന്നും ടിവിയിലും സിനിമകളിലും കണ്ടിട്ടുണ്ടെന്ന് കുഞ്ഞ് പറഞ്ഞപ്പോള്‍ വാരിപ്പുണരാന്‍ തോന്നിയെന്നും മുകേഷ് പറയുന്നു. എംഎല്‍എ എന്ന നിലയില്‍ തന്‍റെ പ്രവര്‍ത്തനം നാട്ടുകാര്‍ക്ക് ബോധ്യപ്പെട്ടതിനാലാണ് രണ്ടാമതും തിരഞ്ഞെടുക്കപ്പെട്ടതെന്നും തന്നെ കാണാനില്ല എന്ന നാടകം ഏഴുവര്‍ഷം മുന്‍പ് അവതരിപ്പിച്ചതാണെന്നും മുകേഷ് കുറിച്ചു. തന്‍റെ ശ്രദ്ധ മുഴുവൻ മണ്ഡലത്തിലെ ജനങ്ങൾക്ക് ഇനിയും എന്തെല്ലാം  ചെയ്തുകൊടുക്കാൻ കഴിയുമെന്നുള്ളതാണെന്നും അദ്ദേഹം പറയുന്നു. 

 

‘നല്ല മനസ്സുള്ള എല്ലാവർക്കും എന്നെ ഇഷ്ടമാണ് അതിൽ പ്രായമില്ല...എന്‍റെ സ്ഥാനം ലോക മലയാളികളുടെ ഹൃദയത്തിലാണ്..അവരുടെ കുടുംബത്തിലെ ഒരു അംഗത്തെ പോലെ അവരെന്നെ സ്നേഹിക്കുന്നു’ മുകേഷ് കുറിച്ചു. കുട്ടിയെ കണ്ടെത്താന് വിശ്രമമില്ലാതെ പണിയെടുത്ത കേരള പോലീസിന് അഭിനന്ദനങ്ങൾ നേരുന്നുവെന്നും എംഎല്‍എ. 

 

കുറിപ്പിന്‍റെ പൂര്‍ണരൂപം, 

 

 

‘കുട്ടിയെ എടുത്തത് എന്നിൽ ഒരച്ഛൻ ഉള്ളതിനാൽ..ഒരു ദിവസം മുഴുവൻ കേരളക്കരയെ ആകെ കണ്ണീരിൽ ആക്കിയ ആറുവയസുകാരിയെ കണ്ടെത്തിയതറിഞ്ഞു. ഞാൻ അപ്പോൾ തന്നെ കൊല്ലം ഏആർ ക്യാമ്പിൽ എത്തുമ്പോൾ ചുറ്റിനും അപരിചിതരുടെ മുന്നിൽ ചെറിയ ഭയത്തോടു കൂടി ഇരിക്കുകയായിരുന്ന കുഞ്ഞ് എന്നെ കണ്ടതും ചെറുതായൊന്നു മന്ദഹസിച്ചു ..അപ്പോൾ പ്രിയ സുഹൃത്ത് ഗണേഷ് കുമാർ എംഎൽഎ കുഞ്ഞിനോട് ചോദിച്ചു ഈ മാമനെ അറിയുമോ....?ചെറിയ ചിരിയോടു കൂടി മോളുടെ മറുപടി അറിയാം..എങ്ങനെ അറിയാം...? ടിവിയിലും സിനിമയിലും എല്ലാം കണ്ടിട്ടുണ്ട്.. അത് കേട്ടതും ഒരച്ഛന്‍റെ ഹൃദയം കൂടിയുള്ള  എനിക്ക് മോളെ വാരി പുണരണമെന്ന് തോന്നി അതാണ് എടുത്തു കയ്യിൽ വെച്ചത് ...ആ മോളുടെ മുഖത്തേക്ക് നിങ്ങൾ സൂക്ഷിച്ചു നോക്കൂ അവിടെ നിങ്ങൾക്ക് ഭയം കാണാൻ കഴിയില്ല... അത് ഈ മോൾക്ക് മാത്രമല്ല... നല്ല മനസ്സുള്ള എല്ലാവർക്കും എന്നെ ഇഷ്ടമാണ് അതിൽ പ്രായമില്ല...എന്‍റെ സ്ഥാനം ലോക മലയാളികളുടെ ഹൃദയത്തിലാണ്..അവരുടെ കുടുംബത്തിലെ ഒരു അംഗത്തെ പോലെ അവരെന്നെ സ്നേഹിക്കുന്നു... മഹാദേവനായും ഗോപാലകൃഷ്ണനായും രാമഭദ്രനായുമൊക്കെ ഞാൻ അവരുടെ മനസ്സിലുണ്ട്... പിന്നെ എംഎൽഎ എന്ന നിലയിൽ എന്‍റെ നാട്ടുകാർക്ക് എന്നെ ബോധിച്ചത് കൊണ്ടാണല്ലോ  രണ്ടാമതും  ഞാൻ എംഎൽഎ ആയത്.. എന്നെ കാണാനില്ല എന്നുള്ള നാടകം ഏഴുവർഷം മുമ്പ് അവതരിപ്പിച്ചതാണ് അതിന് അന്ന് ഞാൻ നല്ല മറുപടിയും നൽകിയതാണ്.. ചുരുക്കിപ്പറഞ്ഞാൽ "കള്ളന് കള്ള വിചാരവും ദുഷ്ടനു ദുഷ്ട വിചാരവും". ചീറ്റിപ്പോയ  നാടകക്കാരോട് പറയാനുള്ളത് എന്നെക്കൊണ്ട് ഒന്നും പറയിക്കരുത്...എന്‍റെ ശ്രദ്ധ മുഴുവൻ എന്‍റെ മണ്ഡലത്തിലെ ജനങ്ങൾക്ക് ഇനിയും എന്തെല്ലാം  ചെയ്തുകൊടുക്കാൻ കഴിയുമെന്നുള്ളതാണ്.. പൊന്നുമോളെ കണ്ടെത്താൻ വിശ്രമമില്ലാതെ പണിയെടുത്ത കേരള പോലീസിന് അഭിനന്ദനങ്ങൾ.