മുഖം കോടിപ്പോകുന്ന ബെൽസ് പാൾസി രോഗം; പേടിക്കണോ? അറിയേണ്ടതെല്ലാം

അവതാരകനും നടനുമായ മിഥുൻ രമേശിനെ  ബെൽസ് പാൾസി രോഗത്തെ തുടര്‍ന്ന് ആശുപത്രിയിൽ പ്രവേശിപ്പിച്ചിരിക്കുകയാണ്. പേശികൾക്കുണ്ടാകുന്ന  ഒരു തരം ബലക്ഷയമാണ് ബെൽസ് പാൾസി. താരം തന്നെയാണ് രോഗത്തെ കുറിച്ചുള്ള വിവരങ്ങള്‍ ഇന്‍സ്റ്റാഗ്രാമിലൂടെ പങ്കുവച്ചത്. 

 

ബെൽസ് പാൾസി എന്നത് വളരെ സാധാരണമായ അസുഖമാണ്. പലരും ഇതിനെ സ്‌ട്രോക്കെന്ന് തെറ്റായി വ്യാഖ്യാനിക്കാറുണ്ടെങ്കിലും ഇത് സ്‌ട്രോക്കല്ല. മുഖത്തിന്റെ ഒരുവശത്തെ മസിലുകൾക്ക് പെട്ടെന്ന് തളർച്ച സംഭവിക്കുന്ന അവസ്ഥയാണിത്. ഇഡിയോപ്പതിക് ലോവര്‍ മോട്ടോര്‍ ന്യൂറോണ്‍ ഫേഷ്യല്‍ നെര്‍വ് പാള്‍സി എന്നാണ് ഈ രോഗത്തിന്റെ ശാസ്ത്രീയ നാമം. നെറ്റി ചുളിക്കുക, കണ്ണടയ്ക്കുക, ചിരിക്കുക തുടങ്ങിയ കാര്യങ്ങള്‍ ചെയ്യാന്‍ ഫേഷ്യല്‍ മസില്‍സിന്റെ സഹായം ആവശ്യമാണ്. ഈ മസില്‍സിനെ സപ്പോര്‍ട്ട് ചെയ്യുന്നത് ഫേഷ്യല്‍ നെര്‍വ് ആണ്. ഈ ഞരമ്പുകളെ ബാധിക്കുന്ന രോഗമാണ് ബെല്‍സ് പാള്‍സി എന്നറിയപ്പെടുന്നത്. 

 

രോഗം വരാന്‍ പ്രത്യേക കാരണമൊന്നും വേണമെന്നില്ല. പെട്ടെന്നുണ്ടാകുന്ന ഞരമ്പിന്റെ പ്രവര്‍ത്തന വൈകല്യമാണ് ഇങ്ങനെ സംഭവിക്കുന്നത്. ഏതു പ്രായത്തിലും ലക്ഷണങ്ങൾ പ്രകടമാകാം. അതായത് ഞരമ്പില്‍ നീര് വന്നത് പോലെ തളര്‍ച്ചയുണ്ടാകും.  മിക്ക രോഗികളിലും രോഗം പ്രത്യക്ഷപ്പെട്ട് ആഴ്ച്ചകൾക്കുള്ളിൽ തന്നെ രോഗം ഭേദമാകാറുണ്ട്. ചിലരിൽ ആറു മാസം വരെ രോഗലക്ഷണങ്ങള്‍ കണ്ടെക്കാം. 

 

രോഗം വന്ന് കഴിഞ്ഞാല്‍, മുഖം നോര്‍മല്‍ സൈഡിലേക്ക് കോടിപ്പോകുക, നെറ്റി ചുളിക്കാന്‍ സാധിക്കാതെ വരിക, കണ്ണടയ്ക്കാന്‍ ബുദ്ധിമുട്ട് അനുഭവപ്പെടുക,  ഭക്ഷണം കഴിക്കുമ്പോള്‍ കവിളില്‍ കെട്ടിക്കിടക്കുക, ചിരിക്കാന്‍ പറ്റാതിരിക്കുക, വായയുടെ ഒരുവശത്തുകൂടി തുപ്പൽ ഒലിക്കുക, രോഗം ബാധിച്ച വശത്തെ താടിക്ക് ചുറ്റുമോ ചെവിക്കു പിന്നിലോ വേദന അനുഭവപ്പെടുക, തലവേദന, രുചി അനുഭവപ്പെടാതിരിക്കുക, കണ്ണുനീരിന്റെയും തുപ്പലിന്റെയും അളവിലുള്ള വ്യത്യാസം... ഇവയെല്ലാം ഈ രോഗത്തിന്‍റെ ലക്ഷണങ്ങളാണ്. 

 

രോഗലക്ഷണങ്ങള്‍ പ്രകടമായാല്‍ വൈകാതെ കൃത്യസമയത്ത് ചികിത്സ ആരംഭിക്കണം.ആദ്യത്തെ മണിക്കൂറുകളിലുള്ള ചികിത്സ പ്രധാനമാണ്. ഡോക്ടറുടെ നിര്‍ദേശപ്രകാരം ഫിസിയോതെറാപ്പിയും ആരംഭിക്കാവുന്നതാണ്. ഒപ്പം ടെന്‍സ് എന്ന് പറയുന്ന ചികിത്സയും നടത്താറുണ്ട്. ഞരമ്പുകളെ ഉത്തേജിപ്പിക്കാന്‍ ചെറിയ ഇലക്ട്രോഡ് വച്ച് ഷോക്ക് ഏല്‍പ്പിക്കുന്നതാണ് ടെന്‍സ്. രണ്ടു മുതല്‍ മൂന്നു ശതമാനം ആളുകളില്‍ മാത്രം ഫേഷ്യല്‍ നെര്‍വില്‍ ട്യൂമറോ തകരാറോ കാണാറുണ്ട്. അപകടം സംഭവിച്ച് ഞരമ്പുകള്‍ക്ക് തകരാറ് സംഭവിച്ചാലും ഇങ്ങനെ വരാന്‍ സാധ്യതയുണ്ട്. ഇത്തരം ചികിത്സകള്‍ ലഭിച്ച് കഴിഞ്ഞാല്‍ തൊണ്ണൂറ് ശതമാനം ആളുകള്‍ക്കും രോഗം പൂര്‍ണ്ണമായും ഭേദമാകും. ഒന്നിലധികം പ്രാവശ്യം രോഗം വരാനുള്ള സാധ്യതയും കുറവാണ്. എങ്കിലും അപൂര്‍വ്വമായി വീണ്ടും ചിലയാളുകളില്‍ വരാറുണ്ട്. രോഗം വന്ന് മാറിക്കഴിഞ്ഞാല്‍ പിന്നെ സ്ഥിരമായി മരുന്ന് കഴിക്കേണ്ട സാഹചര്യമില്ല.

 

Bell's Palsy: Causes, Symptoms, Treatment