മലയോരങ്ങളിൽ വിരിഞ്ഞൊരുങ്ങി ഡെയ്സി പൂക്കൾ; മഞ്ഞിന്റെ വരവറിയിക്കും കാഴ്ച
മഞ്ഞുകാലത്തിന്റെയും ക്രിസ്മസിന്റെയും വരവറിയിച്ച് ഇടുക്കിയുടെ മലയോരങ്ങളില് കുളിര്കാഴ്ചയാകുകയാണ് ഡെയ്സി പൂക്കള്. ഡിസംബര് മാസത്തില് പൂക്കുന്നതിനാല് ക്രിസ്മസ് ട്രീയെന്നും ഇവയെ വിശേഷിപ്പിക്കാറുണ്ട്.
മധ്യ അമേരിക്കയാണ് ഡെയ്സിയുടെ ജന്മദേശം. വെള്ള നിറത്തിലുള്ള പൂക്കളോട് കൂടിയ ചെടി ശീതകാലമായ നവംബര്, ഡിസംബര്, ജനുവരി മാസങ്ങളിലാണ് പുഷ്പിക്കുന്നത്. പത്ത് അടിയില് കൂടുതല് ഉയരത്തില് വളരുന്ന ചെടിക്ക് അമ്പത് വര്ഷത്തിലധികം ആയുസുണ്ട്. തണുപ്പ് കാലത്തിന്റെ ആരംഭത്തില് തന്നെ പുഷ്പിക്കുന്ന പൂക്കള്ക്ക് ചോക്ലേറ്റിന്റെ മണമാണ്. വിരിഞ്ഞ പൂക്കള് കൊഴിഞ്ഞുപോയതിന് ശേഷം ഇളം മഞ്ഞ നിറത്തോട് കൂടിയ വിത്തുകള് ചെടിയില് അവശേഷിക്കും. ശീതകാല മേഖലയില് വളരുകയും പുഷ്പ്പിക്കുകയും ചെയ്യുന്ന ഇവയ്ക്ക് വരള്ച്ചയെയും അതിജീവിക്കാന് കഴിയുമെന്ന് പഠനങ്ങള് തെളിയിക്കുന്നു. മഞ്ഞുകാലത്തിന്റെ വരവറിയിച്ചുകൊണ്ട് വര്ഷത്തില് ഒരിക്കല് മാത്രമാണ് ഡെയ്സി പുഷ്പ്പിക്കുന്നത്. വിദേശ രാജ്യങ്ങളില് ആരാമവൃക്ഷമായി നട്ടുപരിപാലിക്കുന്ന ഡെയ്സി ചെടികള് ഇന്ത്യയില് സഹ്യപര്വതനിരകളില് ധാരാളമായി കണ്ടുവരുന്നു.