ഉമ്മയ്ക്ക് പിന്നാലെ ഉപ്പയും പോയി; തനിച്ചായി ഏകമകൾ; നൊമ്പരം
പാചക വിദഗ്ധനും നിർമാതാവുമായ നൗഷാദിന്റെ മരണത്തിന്റെ വേദനയിലാണ് മലയാളികൾ. കുറച്ച് കാലങ്ങളായി തിരുവല്ലയിലെ ആശുപത്രിയില് ചികിത്സയിലായിരുന്നു നൗഷാദ്. അതിനിടെയാണ് ഭാര്യ ഷീബ ഹൃദയാഘാതത്തെ തുടര്ന്ന് മരിച്ചത്. രോഗങ്ങളോട് പൊരുതികൊണ്ടിരിക്കുന്ന നൗഷാദിനെ ഷീബയുടെ മരണം വല്ലാതെ തളര്ത്തി. രണ്ടാഴ്ചകള്ക്കു ശേഷം അദ്ദേഹവും മരണത്തിന് കീഴടങ്ങി.
പതിമൂന്ന് വയസ്സുകാരിയായ നഷ്വയാണ് ഇവരുടെ ഏക മകള്. മാതാവിന്റെ മരണം നല്കിയ മാനസികാഘാതത്തിലായിരുന്നു നഷ്വ. അതൊടൊപ്പം പിതാവ് തിരികെ വരുമെന്ന പ്രതീക്ഷയിലും. എന്നാല് നഷ്വയെ തനിച്ചാക്കി നൗഷാദും യാത്രയായി.
സിനിമയോട് വലിയ താല്പര്യമുണ്ടായിരുന്ന നൗഷാദിനെ ബ്ലെസിയുമായുള്ള സൗഹൃദമാണ് ചലച്ചിത്ര രംഗത്തേക്ക് കൊണ്ടുവരുന്നത്. മമ്മൂട്ടിയെ നായകനാക്കി ബ്ലെസി സംവിധാനം ചെയ്ത കാഴ്ചയുടെ സഹനിര്മാതാവായി സിനിമയില് അരങ്ങേറ്റം കുറിച്ചു. പിന്നീട് ചട്ടമ്പിനാട്, ബെസ്റ്റ് ആക്ടര്, ലയണ്, പയ്യന്സ്, സ്പാനിഷ് മസാല തുടങ്ങിയ ചിത്രങ്ങള് നിര്മിച്ചു.