bhima-car

തിരുവനന്തപുരം: ജയിംസ് ബോണ്ട് സിനിമകളിലൂടെ പ്രശസ്തമായ ബ്രിട്ടിഷ് ആഡംബര കാർ ബ്രാൻഡ് ആസ്റ്റൻ മാർട്ടിന്റെ എസ്‌യുവിയായ ഡിബിഎക്സ് ആദ്യമായി കേരളത്തിലെത്തി. ഭീമ ജ്വല്ലറി ഉടമ ഡോ. ബി.ഗോവിന്ദനാണ് രാജ്യത്തെ നാലാമത്തെയും തെക്കേ ഇന്ത്യയിലെ രണ്ടാമത്തെയും കാർ സ്വന്തമാക്കിയിരിക്കുന്നത്. ഐതിഹാസിക ബ്രാൻഡിന്റെ ആദ്യ എസ്‌യുവി ആണ് 5 കോടിയിലേറെ രൂപ വിലവരുന്ന ഡിബിഎക്സ്. 2020 ഫെബ്രുവരിയിൽ പുറത്തിറങ്ങിയ മോഡൽ ഇന്ത്യയിൽ ആദ്യമായി സ്വന്തമാക്കിയത് റിലയൻസ് ഇൻഡസ്ട്രീസ് തലവൻ മുകേഷ് അംബാനിയാണ്.

 

3982 സിസി പെട്രോൾ എൻജിനുള്ള വാഹനത്തിന് 542 എച്ച്പി കരുത്തുണ്ട്. 9–സ്പീഡ് ഓട്ടമാറ്റിക് കാറിൽ സാധാരണ വേഗം മുതൽ അഡ്വഞ്ചർ സ്പോർട്സ് കാർ വേഗം വരെ ഏതും ക്രമീകരിക്കാം. പൂജ്യത്തിൽ നിന്നു 100 കിലോമീറ്റർ വേഗത്തിലെത്താൻ 4.5 സെക്കൻഡ് മതി. ഭാരം കുറഞ്ഞതും അതേസമയം ദൃഢവുമായ അലുമിനിയം ബോഡിയാണ്. ഓട്ടോ എമർജൻസി ബ്രേക്കിങ് സംവിധാനം ഉൾപ്പെടെ അത്യാധുനിക സുരക്ഷാ സംവിധാനങ്ങളുമുണ്ട്. മുന്നിൽ പോകുന്ന വാഹനത്തിന്റെ വേഗമനുസരിച്ച് കാറിന്റെ വേഗം സ്വയം ക്രമീകരിക്കും.

 

ബ്രിട്ടനിലെ ഫാക്ടറിയിൽ എൻജിനീയർമാരുടെ നേരിട്ടുള്ള മേൽനോട്ടത്തിൽ നിർമിക്കുന്നതാണ് ഓരോ കാറും. കേരളത്തിലെത്തിയ കാറിന്റെ നിർമാണ മേൽനോട്ടച്ചുമതല വഹിച്ചത് നഥാൻ ജെൻകിൻസ് എന്ന എൻജിനീയറാണെന്നു കാറിൽ രേഖപ്പെടുത്തിയിട്ടുണ്ട്. ഉടമയുടെ ആവശ്യമനുസരിച്ച് സൗകര്യങ്ങൾ ക്രമീകരിക്കുമ്പോൾ വിലയിൽ വ്യത്യാസം വരും. റോൾസ് റോയ്സ്, ബെന്റ്ലി, പോർഷെ ഉൾപ്പെടെ ലോകത്തെ എണ്ണപ്പെട്ട ആഡംബര കാറുകളെല്ലാം ഡോ. ബി.ഗോവിന്ദനു സ്വന്തമായുണ്ട്.