ബോളിവുഡ് നടി നേഹ ധൂപിയ കഴിഞ്ഞ വര്ഷം നവംബറിലാണ് പെണ്കുട്ടിയുടെ അമ്മയായത്. മുലയൂട്ടുന്ന അമ്മമാര്ക്ക് അവശ്യമായ സൗകര്യങ്ങള് രാജ്യത്ത് ഇല്ല എന്നാണ് ഇപ്പോൾ നേഹ പറയുന്നത്. തന്റെ ഇന്സ്റ്റഗ്രാം പോസ്റ്റിലൂടെയാണ് മുലയൂട്ടുന്നതിലെ അനുഭവം താരം പങ്കുവെച്ചത്. ബ്രസ്റ്റ് ഫീഡിങ് വീക്കിന്റെ ഭാഗമായാണ് താരം മകളെ മുലയൂട്ടുന്ന ചിത്രത്തിനൊപ്പം കുറിപ്പ് പങ്കുവെച്ചത്.
എട്ടുമാസം നീണ്ട അമ്മ ജീവിതത്തെക്കുറിച്ചാണ് നേഹ ആരാധകരോട് സംസാരിക്കുന്നത്. 'അമ്മയാവുക എന്നത് എളുപ്പമല്ല. ഉറക്കമില്ലാത്ത രാത്രികളും താനൊരു ഭക്ഷ്യ വസ്തുവാണെന്ന ചിന്തയുമെല്ലാം ചേര്ന്ന മനോഹരമായ ഒരു പാക്കേജാണ് ഇത്. ഒരേ സമയം ഒരുപാടു കാര്യങ്ങള് ഒരുമിച്ച് ചെയ്യാന് അമ്മയ്ക്കാവും. ആറു മാസം മെഹറിന് മുലപ്പാല് മാത്രം കൊടുത്തു. ഇപ്പോഴും അത് തുടരുന്നു. എനിക്ക് ലഭിക്കുന്ന പിന്തുണയെക്കുറിച്ച് മനസിലാക്കാന് ഇത് കാരണമായി. അതിനൊപ്പം മുലയൂട്ടാന് സൗകര്യമില്ലാത്തതിനെക്കുറിച്ചും മറ്റു പ്രശ്നങ്ങളും തിരിച്ചറിയാനായി. ഒരിക്കല് വിമാനത്തിലായിരിക്കുമ്പോള് കുഞ്ഞിനെ മുലയൂട്ടേണ്ടതായി വന്നു. ഞാന് മകളെയും കൊണ്ട് വാഷ്റൂമിലേക്ക് പോയി. സീറ്റ് ബെല്റ്റ് സിഗ്നല് ലഭിക്കുന്നതിന് മുന്പ് തിരിച്ചെത്തണമെന്ന ചിന്തമാത്രമാണ് ഉണ്ടായത്. പുറത്തെത്തിയതിന് ശേഷം കുറേ സമയം വാഷ്റൂം ഉപയോഗിച്ചതിന് ഞാന് ക്ഷമ ചോദിച്ചു.' നേഹ പറഞ്ഞു.
മറ്റൊരവസരത്തിൽ മകൾ മെഹറുമായി പുറത്ത് ഫോട്ടോഷൂട്ടിന് പോയപ്പോൾ സമീപത്തുള്ള മരത്തിന്റെ പിന്നിൽ മറഞ്ഞിരുന്ന് മുലയൂട്ടേണ്ടി വന്നിട്ടുണ്ടെന്നും നടി വ്യക്തമാക്കുന്നു
തനിക്ക് പിന്തുണ നല്കാന് നിരവധി പേരുണ്ടായിരുന്നെന്നും എന്നാല് അല്ലായിരുന്നെങ്കില് തന്റെ മാനസികാവസ്ഥ മറ്റൊന്നായിരിക്കും എന്നാണ് താരം പറയുന്നത്. അതിനാല് മുലയൂട്ടുന്ന അമ്മമാര്ക്ക് ആവശ്യമായ സൗകര്യങ്ങള് ചെയ്തുകൊടുക്കണം എന്നാണ് നേഹ പറയുന്നത്. ചര്ച്ചയിലൂടെ മാത്രമേ ഇത് നേടിയെടുക്കാന് സാധിക്കൂ എന്നും താരം പറയുന്നു. മുലയൂട്ടുമ്പോഴുണ്ടായ അനുഭവങ്ങള് പങ്കുവെക്കാനും താരം ആരാധകരോട് ആവശ്യപ്പെട്ടു. നടന് അങ്കത് ബേദിയാണ് നേഹയുടെ ഭര്ത്താവ്. ഇരുവരും മേയിലാണ് വിവാഹിതരായത്.