തമിഴ്നാട്ടിലെ രണ്ട് മണ്ഡലങ്ങളിലെ ഉപതിരഞ്ഞെടുപ്പ് വോട്ടെണ്ണൽ ഇന്ന്. മധുരാന്തകം, ധാരാപുരം മണ്ഡലങ്ങളിലെ ഫലമാണ് ഇന്ന് പുറത്തുവരിക. രാവിലെ 8 മണിക്ക് വോട്ടെണ്ണൽ ആരംഭിക്കും. വിജയ് സർക്കാർ അധികാരമേറ്റ ശേഷമുള്ള ആദ്യ ബലപരീക്ഷണത്തിലെ ഫലം മൂന്ന് മുന്നണികൾക്കും നിർണായകമാണ്. 2026 ലെ നിയമസഭാ തിരഞ്ഞെടുപ്പിലേതിനെക്കാൾ ഉപതിരഞ്ഞെടുപ്പിൽ പോളിങ് കുറഞ്ഞത് മുന്നണികളെ ആശങ്കയിലാഴ്‌ത്തുന്നുണ്ട്. നിയമസഭ തിരഞ്ഞെടുപ്പിൽ 93 .22 ശതമാനം വോട്ട് പോൾ ചെയ്ത മധുരാന്തകത്ത് ഉപതിരഞ്ഞെടുപ്പിൽ 85.99 ശതമാനമാണ് പോൾ ചെയ്തത്. ധാരാപുരത്തേത് 89.89 ശതമാനത്തിൽ നിന്ന് 80.31 ശതമാനമായി കുറഞ്ഞിരുന്നു. കഴിഞ്ഞ തിരഞ്ഞെടുപ്പിൽ അണ്ണാ ഡിഎംകെ വിജയിച്ച ഈ മണ്ഡലങ്ങളിലെ എംഎൽഎമാർ രാജിവച്ച് ടിവികെയിൽ ചേർന്നതോടെയാണ് ഉപതിരഞ്ഞെടുപ്പിന് കളമൊരുങ്ങിയത്. ഉപതിരഞ്ഞെടുപ്പ് നടന്ന പുതുച്ചേരിയിലെ തട്ടാൻചാവടി മണ്ഡലത്തിലും ഇന്നാണ് വോട്ടെണ്ണൽ.