തിരഞ്ഞെടുപ്പ് പ്രചാരണത്തിനിടെ കോൺഗ്രസ് നോർത്ത് ഈസ്റ്റ് ഡൽഹി സ്ഥാനാർഥി കനയ്യകുമാറിന് നേരെ ആക്രമണം. നന്ദ് നഗ്രിയിൽ പൂമാല ഇടാൻ എന്ന വ്യാജേനെ എത്തിയ അക്രമികൾ കനയ്യയെ മർദ്ദിച്ചു. കനയ്യക്കൊപ്പം ഉണ്ടായിരുന്ന പ്രവർത്തകർ അക്രമം തടഞ്ഞു. ആം ആദ്മി പാർട്ടി വനിതാ കൗൺസിലർ ഛായ ഗൗരവ് ശർമയോടും അക്രമികൾ മോശമായി പെരുമാറി.
കോൺഗ്രസ് പൊലീസിൽ പരാതി നൽകിയിട്ടുണ്ട്. പരാജയഭീതിയിലായ ബി.ജെ.പി സ്ഥാനാർഥി മനോജ് തിവാരിയുടെ അനുയായികൾ നടത്തിയ ആസൂത്രിത ആക്രമണമാണെന്നും മറുപടി ജനം വോട്ടിലൂടെ നൽകുമെന്നും കോൺഗ്രസ് പ്രതികരിച്ചു. അക്രമികൾക്കെതിരെ പോലീസ് കർശന നടപടി സ്വീകരിക്കണമെന്നും കോൺഗ്രസ് ആവശ്യപ്പെട്ടു.