പ്രണയ വിവാഹങ്ങൾക്ക് വിലക്ക്; കുടുംബങ്ങളെയടക്കം ബഹിഷ്കരിക്കുമെന്ന് മുന്നറിയിപ്പ്

പ്രണയവിവാഹങ്ങൾക്കെതിരെ കടുത്ത നിലപാടുമായി ഹരിയാനയിലെ ഹിസാർ ജില്ലയിലെ ആര്യ നഗർ ഗ്രാമത്തിലെ സാമൂഹിക പഞ്ചായത്ത്. സ്വന്തം ഇഷ്ടപ്രകാരം വിവാഹം കഴിക്കുന്ന യുവതീയുവാക്കൾക്കെതിരെ സാമൂഹിക ബഹിഷ്കരണം ഉൾപ്പെടെയുള്ള നടപടികൾ സ്വീകരിക്കണമെന്ന നിര്‍ദ്ദേശമാണ് യോഗത്തില്‍ ഉയര്‍ന്നിരിക്കുന്നത്.

സെപ്റ്റംബർ 20ന് ചേർന്ന യോഗത്തിൽ ഏകദേശം ആയിരത്തോളം പേർ പങ്കെടുത്തതായാണ് റിപ്പോർട്ട്. കഴിഞ്ഞ ഏതാനും മാസങ്ങൾക്കിടെ ഗ്രാമത്തിൽ മൂന്ന് പ്രണയവിവാഹങ്ങൾ നടന്നതിനെ തുടർന്നാണ് യോഗം ചേർന്നതെന്നാണ് വിവരം.

read more: ലാസ്റ്റ് 7 മിനുട്ടില്‍ ഇത് എന്‍റെ മനസ്സിലുണ്ടാകും; തന്‍റെ ജീവിതത്തിലെ ഏറ്റവും നല്ല തീരുമാനമെന്ന് ജാസ...

ഒരേ ഗ്രാമത്തിൽ നിന്നുള്ള യുവാവും യുവതിയും പ്രണയിച്ച് വിവാഹം കഴിക്കുന്ന സാഹചര്യം ഒഴിവാക്കണമെന്നാണ് യോഗത്തിലെ പ്രധാന ആവശ്യം. ഇത്തരം വിവാഹങ്ങൾക്ക് പിന്തുണ നൽകുന്നവരെയും സാമൂഹികമായി ഒറ്റപ്പെടുത്തണമെന്ന നിർദേശവും മുന്നോട്ടുവന്നതായി റിപ്പോർട്ടുകളുണ്ട്.

എന്നാൽ തീരുമാനം ഔദ്യോഗികമായി തിരഞ്ഞെടുക്കപ്പെട്ട ഗ്രാമപഞ്ചായത്ത് എടുത്തതാണോ എന്ന കാര്യത്തിൽ വ്യക്തതയില്ല. ഇത് ‘സാമൂഹിക പഞ്ചായത്ത്’ എടുത്ത തീരുമാനമാണെന്നും തിരഞ്ഞെടുക്കപ്പെട്ട ഗ്രാമപഞ്ചായത്തിന് ഔദ്യോഗികമായി ഇതിൽ പങ്കില്ലെന്നും ചില റിപ്പോർട്ടുകൾ വ്യക്തമാക്കുന്നു.

read more: റാണി മുഖർജിക്ക് തീരാനഷ്ടം; അമ്മയും പ്രശസ്ത ഗായികയുമായ കൃഷ്ണ മുഖർജി അന്തരിച്ചു ...

അതേസമയം, പ്രണയവിവാഹം നടത്തിയ ദമ്പതികളുടെ സുരക്ഷ ഉറപ്പാക്കുമെന്ന് ഹിസാർ പൊലീസ് അറിയിച്ചതായും റിപ്പോർട്ടുകളുണ്ട്.

പ്രായപൂർത്തിയായ രണ്ട് വ്യക്തികൾക്ക് സ്വന്തം ഇഷ്ടപ്രകാരം ജീവിതപങ്കാളിയെ തിരഞ്ഞെടുക്കാനുള്ള അവകാശമുണ്ടെന്ന നിയമപരമായ നിലപാടിനിടെയാണ് ഗ്രാമത്തിലെ തീരുമാനം ചർച്ചയാകുന്നത്. വിവാഹം കഴിക്കുന്നതിൽ നിന്ന് വ്യക്തികളെ തടയുകയോ സാമൂഹികമായി ബഹിഷ്കരിക്കുകയോ ചെയ്യുന്നതിനുള്ള അധികാരം ഒരു സാമൂഹിക പഞ്ചായത്തിനില്ലെന്നതാണ് നിയമപരമായ വസ്തുത.