ചാലക്കുടിയില്‍ ബെന്നിക്ക് തിളക്കം; മനോരമന്യൂസ് സർവേ ഫലം

 

എംപിയെന്ന നിലയില്‍ ചാലക്കുടിയില്‍ ബെന്നി ബെഹനാന്റെ പ്രകടനം മികച്ചതെന്ന് മനോരമന്യൂസ്–വി.എം.ആര്‍ മൂഡ് ഓഫ് ദ് സ്റ്റേറ്റ് സര്‍വേ. അഭിപ്രായസര്‍വേയില്‍ പങ്കെടുത്ത 65 ശതമാനം പേരും ബെന്നിയുടെ പ്രകടനത്തില്‍ തൃപ്തരാണ്. ഏറ്റവും മികച്ചതെന്ന് 26.81 ശതമാനം പേരും മികച്ചതെന്ന് 37.45 ശതമാനവും അഭിപ്രായപ്പെട്ടു. 21.68 ശതമാനം ശരാശരി പ്രകടനമെന്നാണ് വിലയിരുത്തിയത്. എംപിയുടെ പ്രകടനം മോശമെന്ന് കരുതുന്നവര്‍ 10.91 ശതമാനമാണ്. വളരെ മോശമെന്ന് കരുതുന്നത് 3.15 ശതമാനം.

 

രണ്ടുവട്ടം നിയമസഭാംഗമായ ശേഷമാണ് ബെന്നി ബെഹനാന്‍ 2019ല്‍ ലോക്സഭയിലേക്ക് മാറ്റുരച്ചത്. സിറ്റിങ് എംപിയും സിനിമാതാരവുമായ ഇന്നസെന്റായിരുന്നു എതിരാളി. 1,32,274 വോട്ടിന്റെ തകര്‍പ്പന്‍ ഭൂരിപക്ഷത്തിന് ബെന്നി വിജയിച്ചു. മുതിര്‍ന്ന ബിജെപി നേതാവ് എ.എന്‍.രാധാകൃഷ്ണന്‍ 1,54,159 വോട്ട്  (15.56%) നേടി.

 

ലോക്സഭയിലെ പ്രകടനം

 

പതിനേഴാം ലോക്സഭയിലെ പതിമൂന്നാം സമ്മേളനം വരെ ബെന്നി ബെഹനാന്‍ 56 ചര്‍ച്ചകളില്‍ പങ്കെടുത്തു. 329 ചോദ്യങ്ങളുന്നയിച്ചു. 20 സ്പെഷല്‍ മെന്‍ഷനുകള്‍ നടത്തി. സര്‍ക്കാര്‍ അവതരിപ്പിച്ച 5 ബില്ലുകളില്‍ ഭേദഗതികള്‍ നിര്‍ദേശിച്ചു. 2 സ്വകാര്യ ബില്ലുകള്‍ അവതരിപ്പിച്ചു.  സാംസ്കാരിക ടൂറിസം കണ്‍സള്‍ട്ടേറ്റിവ് കമ്മിറ്റി, ഭവന നഗരകാര്യ സ്റ്റാന്‍ഡിങ് കമ്മിറ്റി, ഓഫീസസ് ഓഫ് പ്രോഫിറ്റ് ജോയിന്റ് കമ്മിറ്റി എന്നിവയില്‍ അംഗമാണ് ഈ എഴുപത്തൊന്നുകാരന്‍.

 

Here is Benny Behanan's rating as an MP in Chalakudy constituency. Manorama News-VMR Mood of the State Survey results.