ആരുമായും സഖ്യത്തിനില്ല; ബിഎസ്പി തനിച്ച് മല്‍സരിക്കും; മായാവതി

2024 ലെ ലോക്സഭാ തിരഞ്ഞെടുപ്പില്‍ എന്‍ഡിഎയുമായോ ഇന്ത്യ മുന്നണിയുമായോ സഖ്യത്തിനില്ലെന്ന് ബിഎസ്പി നേതാവ് മായാവതി. ബിഎസ്പി തനിച്ച് തിരഞ്ഞെടുപ്പിനെ നേരിടും. എന്‍ഡിഎയുമായി സഖ്യമെന്ന ആശയം പോലും ഉദിക്കുന്നില്ലെന്നും മായാവതി 'എക്സി'ല്‍ കുറിച്ചു. ഇരു സഖ്യങ്ങളും ജാതീയ, വര്‍ഗീയ, മൂലധന നയങ്ങളില്‍ ബഹുജന്‍ സമാജ്​വാദി പാര്‍ട്ടിക്ക് ചേരാത്ത നയം പുലര്‍ത്തുന്നവരാണെന്ന് മായാവതി വ്യക്തമാക്കുന്നു. സഖ്യമുണ്ടാക്കുമെന്ന തരത്തിലുള്ള വാര്‍ത്തകള്‍ വ്യാജമാണെന്നും അവര്‍ കുറിച്ചു. 

 

2007 ലേത് പോലെ  വരാനിരിക്കുന്ന ലോക്സഭാ തിരഞ്ഞെടുപ്പിലും  നാല് നിയമസഭാ തിരഞ്ഞെടുപ്പുകളിലും ബിഎസ്പി മല്‍സരിക്കും. സമൂഹത്തിലെ അവഗണിക്കപ്പെട്ടവരും ചിതറിക്കിടക്കുന്നവരുമായ ജനങ്ങളെ ഒന്നിപ്പിച്ച് തിരഞ്ഞെടുപ്പിനെ നേരിടുമെന്നും മായാവതി വ്യക്തമാക്കി. ഗ്രാമങ്ങളില്‍ വ്യാപകമായ പ്രചരണ പരിപാടികള്‍ സംഘടിപ്പിച്ച് ആളുകളിലേക്ക് കൂടുതലായി ഇറങ്ങിച്ചെല്ലാനും മായാവതി ബിഎസ്പി നേതാക്കളോട് ആഹ്വാനം ചെയ്തു.

 

കഴിഞ്ഞ ലോക്സഭാ, യുപി നിയമസഭാ തിരഞ്ഞെടുപ്പുകളില്‍ സമാജ്​വാദി പാര്‍ട്ടിയുമായും കോണ്‍ഗ്രസുമായും മായാവതി സഖ്യമുണ്ടാക്കിയിരുന്നു. ഉത്തര്‍പ്രദേശില്‍ നിന്ന് 10 എംപിമാരാണ് ബിഎസ്പിക്കുള്ളത്. ഉത്തരാഖണ്ഡ്, പഞ്ചാബ്, ഉത്തര്‍പ്രദേശ് എന്നിവിടങ്ങളില്‍ നിന്ന് എംഎല്‍എമാരും ബിഎസ്പിക്കുണ്ട്. പാര്‍ലമെന്‍റില്‍ കോണ്‍ഗ്രസ് അടക്കമുള്ള പ്രതിപക്ഷ പാര്‍ട്ടികളുമായി സഹകരിക്കാതെ കേന്ദ്രസര്‍ക്കാരിനെ പരോക്ഷമായി സഹായിക്കുന്ന നിലപാടാണ് നിലവില്‍ ബിഎസ്പി സ്വീകരിക്കുന്നത്.  

 

BSP to contest alone in Elections; Mayawati