സൗദിയിൽ ചരിത്രമിട്ട് ഭീഷ്മ; ഇന്ത്യൻ സിനിമകളിൽ ഒന്നാമൻ; പണംവാരി ‘പർവം’

സൗദി അറേബ്യയിൽ ഏറ്റവും കൂടുതൽ പണം വാരുന്ന ഇന്ത്യൻ ചിത്രമെന്ന റെക്കോർഡ് മമ്മൂട്ടിയുടെ ഭീഷ്മ പർവം നേടിയെന്ന് റിപ്പോർട്ടുകൾ. ചിത്രത്തിന്റെ ജിസിസി വിതരണം സ്വന്തമാക്കിയ ട്രൂത്ത് ഗ്ലോബല്‍ ഫിലിംസാണ് ഇതുസംബന്ധിച്ച് പോസ്റ്റ് പങ്കിട്ടിരിക്കുന്നത്. 75 കോടിയിൽ അധികം ഇതിനോടകം ചിത്രം ആഗോള കലക്ഷന്‍ നേടിയെന്ന് ട്രേഡ് അനലിസ്റ്റുകള്‍ വ്യക്തമാക്കിയിരുന്നു. ഇതിന് പിന്നാലെയാണ് പുതിയ നേട്ടം.

സിനിമയുടെ ഓസ്ട്രേലിയ–ന്യൂസീലൻഡ് രാജ്യങ്ങളിലെ റിലീസിന്റെ അവകാശം റെക്കോർഡ് തുകയ്ക്കാണ് വിറ്റുപോയത്. ഒരു മലയാള സിനിമക്ക് ഇതുവരെ ലഭിച്ചിട്ടുള്ളതിൽ വച്ച് ഏറ്റവും വലിയ കോപ്പി റൈറ്റ് തുകയാണ് ഭീഷ്മപർവത്തിന് ലഭിച്ചതെന്ന് അണിയറക്കാർ വ്യക്തമാക്കിയിരുന്നു. ആദ്യ ദിനം മൂന്ന് കോടിക്ക് മുകളിൽ ഭീഷ്മപർവം നേടിയിരുന്നു. 406 സ്‌ക്രീനുകളിലായി 1775 ഷോകളാണ് റിലീസ് ദിനത്തില്‍ ഭീഷ്മപര്‍വത്തിന് ഉണ്ടായിരുന്നത്.ആദ്യ നാല് ദിവസങ്ങൾ കൊണ്ട് ചിത്രം എട്ട് കോടിക്ക് മുകളിൽ ഷെയർ നേടിയെന്ന് ഫിയോക് പ്രസിഡന്റ് പറഞ്ഞിരുന്നു. കോവിഡ് പ്രതിസന്ധിക്കു ശേഷം കേരളത്തിലെ തിയറ്ററുകളിൽ ഇത്രയധികം ആവേശം കൊണ്ടുവന്ന സിനിമ വേറെ ഇല്ലെന്നും അദ്ദേഹം പറയുന്നു. ഇപ്പോഴും എല്ലാ തിയറ്ററിലും ഹൗസ് ഫുൾ ആയി തുടരുകയാണ് സിനിമ.