ഇന്ത്യ-പാക് സേനകളെ താരതമ്യം ചെയ്തു; ഖേദം പ്രകടിപ്പിച്ച് അരുന്ധതി റോയ്
ഇന്ത്യൻ സൈന്യത്തെയും പാക്കിസ്ഥാൻ സൈന്യത്തെയും താരതമ്യം ചെയ്തുള്ള പ്രസ്താവനയിൽ ഖേദം പ്രകടിപ്പിച്ച് എഴുത്തുകാരി അരുന്ധതി റോയി. മനപ്പൂർവ്വമല്ലാതെ സംഭവിച്ച പിഴവായിരുന്നു അതെന്ന് അരുന്ധതി റോയി വ്യക്തമാക്കി.
പാക് സേന സ്വന്തം ജനങ്ങൾക്കെതിരെ അക്രമം നടത്താറില്ലെന്നായിരുന്നു അരുന്ധതി റോയിയുടെ പരാമർശം. പത്ത് വര്ഷങ്ങൾക്ക് മുൻപ് നടത്തിയ പരാമർശം വലിയ വിവാദമായിരുന്നു. ഇതിന്റെ വിഡിയോ വ്യാപകമായി പ്രചരിക്കുകയും ചെയ്തിരുന്നു.
കശ്മീരിൽ ഇന്ത്യൻ സൈന്യത്തെ സ്വന്തം ജനങ്ങൾക്കെതിരെ ഉപയോഗിക്കുന്നു എന്നും അരുന്ധതി റോയി അഭിപ്രായപ്പെട്ടിരുന്നു. ചില സമയങ്ങളിൽ ഓർക്കാതെ ഇത്തരം കാര്യങ്ങൾ പറഞ്ഞു പോകുന്നതാണ്. പാകിസ്ഥാൻ ബംഗ്ളാദേശിൽ സ്വന്തം ജനതയെ കൂട്ടക്കൊല ചെയ്തെന്നാണ് തൻറെ അഭിപ്രായം. അതേസമയം ഇന്ത്യയിൽ ഇപ്പോൾ നടക്കുന്നത് ഫാസിസമെന്ന നിലപാടിൽ മാറ്റമില്ലെന്നും അരുന്ധതി റോയി പറഞ്ഞു.