മലയാളി പുരുഷന് ശരാശരി ഒരു ലൈംഗികപങ്കാളി; വൈറലായി ബോഡി കൗണ്ട് ചാർട്ട്

ഒരു ശരാശരി മലയാളി പുരുഷന് എത്ര ലൈംഗികപങ്കാളികളുണ്ടാകും? അയ്യേ എന്നു പറയാൻ വരട്ടെ. 2019–2021 കാലയളവിലെ കണക്കുകളാണ് ഇപ്പോൾ സമൂഹമാധ്യമങ്ങളിൽ വീണ്ടും ചർച്ചയാകുന്നത്. കൗതുകകരമായ ഈ കണക്കുകൾ പുറത്തുവിട്ടത് ദേശീയ കുടുംബാരോഗ്യ സർവേയാണ് (NFHS-5). പുരുഷന്മാരുടെ കണക്കുകൾക്കൊപ്പം സ്ത്രീകളുടെ കണക്കുകളും സർവേയിലുണ്ട്.

കണക്കുകൾ പ്രകാരം, ഇന്ത്യയിൽ പുരുഷന്മാർക്ക് ജീവിതകാലത്ത് ശരാശരി 2.1 ലൈംഗികപങ്കാളികളുണ്ട്. സ്ത്രീകളുടേത് 1.7 ആണ്. അതായത്, സർവേയിൽ പങ്കെടുത്തവരുടെ റിപ്പോർട്ടുകൾ പ്രകാരം പുരുഷന്മാരുടെ ശരാശരി സ്ത്രീകളുടേതിനേക്കാൾ കൂടുതലാണ്.

സംസ്ഥാനങ്ങളുടെ കണക്കുകളിൽ മേഘാലയയിലെ പുരുഷന്മാർക്കാണ് ഏറ്റവും ഉയർന്ന ശരാശരി ലൈംഗികപങ്കാളികളുടെ എണ്ണം. ഇവിടെ ഇത് 9.6 ആണ്. സ്ത്രീകളുടെ കാര്യത്തിൽ രാജസ്ഥാനാണ് മുന്നിൽ; ശരാശരി 3.1 പങ്കാളികൾ. സിക്കിമിലെ പുരുഷന്മാരുടെ ശരാശരി 7.1 ആണ്. മധ്യപ്രദേശിലെ സ്ത്രീകളുടേത് 2.5. ഇങ്ങനെ വിവിധ സംസ്ഥാനങ്ങളിലെയും കേന്ദ്രഭരണപ്രദേശങ്ങളിലെയും കണക്കുകൾ സർവേയിലുണ്ട്.

കേരളത്തിലെ കണക്കുകൾ ദേശീയ ശരാശരിയിൽനിന്ന് വ്യത്യസ്തമാണ്. ഇവിടെ പുരുഷന്മാർക്ക് ജീവിതകാലത്ത് ശരാശരി ഒരു ലൈംഗികപങ്കാളിയാണുള്ളത്. സ്ത്രീകളുടേത് 1.4 ആണ്. അതായത്, സർവേയിലെ കണക്കുപ്രകാരം കേരളത്തിൽ സ്ത്രീകളുടെ ശരാശരി ലൈംഗികപങ്കാളികളുടെ എണ്ണം പുരുഷന്മാരുടേതിനേക്കാൾ കൂടുതലാണ്. ലക്ഷദ്വീപിലും സമാനമായ പ്രവണതയാണ് റിപ്പോർട്ട് ചെയ്തിരിക്കുന്നത്.