ബ്രേക്കപ്പായോ ? ഇമോഷണലി ഡൗണ്‍ ആണോ ? ഒരു ലീവെടുത്താലോ, ശമ്പളത്തോടെയുള്ള അവധി കിട്ടും

 

ബ്രേക് അപ് ആയാലോ, പാട്ണറുമായി വഴക്കിലാണെങ്കിലോ മൈന്‍ഡ് അത്ര നല്ലതായിരിക്കണം എന്നില്ല അല്ലേ. പക്ഷേ ജോലിക്ക് പോകാണ്ടിരിക്കാനും ആകില്ലല്ലോ. ഇത്തരം സാഹചര്യങ്ങളില്‍ ഒരു ലീവ് കിട്ടിയാല്‍ നല്ലതായിരിക്കില്ലേ...

 

ബന്ധം അവസാനിച്ചതിന്റെ മാനസിക സമ്മർദത്തിൽ നിന്ന് മുക്തി നേടാൻ ജീവനക്കാർക്ക് ഏഴ് ദിവസം വരെ ‘Break-Up Leave’ അനുവദിച്ചിരിക്കുകയാണ് സ്റ്റോക്ഗ്രോ(StockGro). ബന്ധം അവസാനിക്കുന്നത് വ്യക്തിജീവിതത്തിലെ വലിയൊരു മാറ്റമായിരിക്കാം. അതിന്റെ മാനസിക ആഘാതം ജോലിയെയും ദൈനംദിന ജീവിതത്തെയും ബാധിക്കാറുമുണ്ടല്ലോ. ഈ യാഥാർഥ്യം പരിഗണിച്ച് ജീവനക്കാരുടെ വ്യക്തിജീവിതത്തിനും ഇടം നൽകുന്ന വ്യത്യസ്തമായൊരു HR നയം അവതരിപ്പിച്ചിരിക്കുകയാണ് ബെംഗളൂരു ആസ്ഥാനമായ ടെക് കമ്പനിയായ സ്റ്റോക്ഗ്രോ.

 

ബന്ധം അവസാനിച്ച ജീവനക്കാർക്ക് ഏഴ് ദിവസം വരെ ശമ്പളത്തോടെയുള്ള അവധി എടുക്കാൻ അവസരം നൽകുന്നതാണ് കമ്പനിയുടെ ‘Break-Up Leave’ നയം. വ്യക്തിപരമായ പ്രതിസന്ധിയിൽ നിന്ന് മുക്തി നേടാനും സ്വയം വീണ്ടെടുക്കാനും ജീവനക്കാർക്ക് ആവശ്യമായ സമയം നൽകുകയാണ് ഇതിലൂടെ ലക്ഷ്യമിടുന്നത്. ഈ നയത്തെ വേറിട്ടുനിർത്തുന്നത് അവധി അനുവദിക്കുന്ന രീതിയാണ്. ബന്ധം അവസാനിച്ചതായി തെളിയിക്കാൻ ജീവനക്കാർ ചാറ്റുകൾ, സ്ക്രീൻഷോട്ടുകൾ, മറ്റ് വ്യക്തിഗത രേഖകൾ എന്നിവ ഹാജരാക്കേണ്ടതില്ല. ജീവനക്കാരന്റെ വാക്കിൽ വിശ്വാസമർപ്പിച്ചാണ് അവധി അനുവദിക്കുന്നത്.

 

കൂടുതൽ സമയം ആവശ്യമുള്ള സാഹചര്യത്തിൽ മാനേജ്മെന്റുമായി ചർച്ച ചെയ്ത് അധിക അവധിയും പരിഗണിക്കാം. ഓരോ ജീവനക്കാരന്റെയും സാഹചര്യം വ്യത്യസ്തമാണെന്ന കാഴ്ചപ്പാടിലാണ് ഈ സൗകര്യം ഒരുക്കിയിരിക്കുന്നത്.

 

കമ്പനിയുടെ സ്ഥാപകനായ അജയ് ലഖോട്ടിയയുടെ നേതൃത്വത്തിലാണ് ഈ സമീപനം ആരംഭിച്ചിരിക്കുന്നത്. ജീവനക്കാരെ ഒരു കുടുംബമായി കാണുന്നുവെന്നും വ്യക്തിപരമായ പ്രതിസന്ധികളിൽ അവർക്കൊപ്പം നിൽക്കാനാണ് ആഗ്രഹിക്കുന്നതെന്നും അദ്ദേഹം വ്യക്തമാക്കിയിട്ടുണ്ട്. സാധാരണയായി അസുഖം, പ്രസവം, കുടുംബപരമായ ആവശ്യങ്ങൾ തുടങ്ങിയ സാഹചര്യങ്ങൾക്കാണ് കമ്പനികൾ പ്രത്യേക അവധി നൽകുന്നത്. അതിൽ നിന്ന് വ്യത്യസ്തമായി, ബന്ധങ്ങളിലുള്ള വേർപാടിനെയും ജീവനക്കാരുടെ മാനസിക ക്ഷേമവുമായി ബന്ധപ്പെട്ട ഒരു വ്യക്തിപരമായ സാഹചര്യമായി അംഗീകരിക്കുന്നതാണ് സ്റ്റോക്ഗ്രോയുടെ നയത്തിന്റെ പ്രത്യേകത.

 

ഇന്ത്യയിലെ എല്ലാ ജീവനക്കാർക്കും ബാധകമായ നിയമപരമായ അവധിയല്ല ഇത്. സ്റ്റോക്ഗ്രോ സ്വന്തം ജീവനക്കാർക്കായി അവതരിപ്പിച്ചിരിക്കുന്ന അധിക എംബ്ലോയിമെന്‍റ് ഓഫര്‍ മാത്രമാണ്. ജോലിയും വ്യക്തിജീവിതവും തമ്മിലുള്ള സന്തുലിതാവസ്ഥയ്ക്ക് കൂടുതൽ പ്രാധാന്യം ലഭിക്കുന്ന കാലത്ത്, ജീവനക്കാരുടെ വ്യക്തിപരമായ ബുദ്ധിമുട്ടുകളെയും തൊഴിൽസ്ഥല നയങ്ങളുടെ ഭാഗമാക്കി കാണുന്ന പുതിയ സമീപനമാണ് ഈ ‘Break-Up Leave’ മുന്നോട്ടുവെയ്ക്കുന്നത്. ജോലിക്കപ്പുറമുള്ള ജീവിതത്തെയും പരിഗണിക്കുന്ന ഒരു HR സംസ്കാരത്തിന്റെ ഭാഗമായാണ് ഈ വേറിട്ട നയം ഇപ്പോൾ ശ്രദ്ധ നേടുന്നത്.