റഷ്യൻ എണ്ണ ഇറക്കുമതി; ഇന്ത്യയ്ക്ക് മേൽ 100 ശതമാനം വരെ തീരുവ ചുമത്താൻ യുഎസിന് അധികാരം

റഷ്യയിൽ നിന്ന് വലിയ തോതിൽ എണ്ണ ഇറക്കുമതി ചെയ്യുന്ന രാജ്യങ്ങൾക്ക് 100 ശതമാനം വരെ തീരുവ ചുമത്താൻ യുഎസ് പ്രസിഡന്റിന് അധികാരം നൽകുന്ന ബിൽ നിയമമായി. റഷ്യയ്ക്കും ഇറാനും മേലുള്ള ഉപരോധം ശക്തമാക്കുന്നതിനുള്ള ലിൻഡ്സെ ഒ. ഗ്രഹാം ബില്ലിൽ യുഎസ് പ്രസിഡന്റ് ഡോണൾഡ് ട്രംപ് ഒപ്പുവെച്ചതോടെയാണ് നിയമം പ്രാബല്യത്തിൽ വന്നത്.

റഷ്യൻ എണ്ണയുടെ ഏറ്റവും വലിയ ഇറക്കുമതിക്കാരായ അഞ്ച് രാജ്യങ്ങൾക്കെതിരെ അധിക തീരുവ ചുമത്താൻ ഇതോടെ യുഎസിന് സാധിക്കും. ഇന്ത്യയും ചൈനയും ഉൾപ്പെടെയുള്ള രാജ്യങ്ങളെയാണ് നടപടി പ്രധാനമായും ബാധിക്കുക.

2022 മുതൽ കുറഞ്ഞ വിലയിൽ ലഭിക്കുന്ന റഷ്യൻ ക്രൂഡ് ഓയിലിനെ ഇന്ത്യ വലിയ തോതിൽ ആശ്രയിക്കുന്നുണ്ട്. ഈ വർഷം ജൂലൈയിൽ ഇന്ത്യയുടെ റഷ്യൻ എണ്ണ ഇറക്കുമതി പ്രതിദിനം 2.47 ദശലക്ഷം ബാരലിലെത്തിയതായി റിപ്പോർട്ടുകൾ പറയുന്നു. ഇന്ത്യയുടെ ആകെ എണ്ണ ഇറക്കുമതിയുടെ ഏകദേശം 51 ശതമാനമാണിത്.

അതേസമയം, ഏത് രാജ്യത്തിന് എത്ര ശതമാനം അധിക തീരുവ ചുമത്തണമെന്നത് നിയമത്തിൽ കൃത്യമായി വ്യക്തമാക്കിയിട്ടില്ല. ഇക്കാര്യത്തിൽ അന്തിമ തീരുമാനം യുഎസ് പ്രസിഡന്റിനായിരിക്കും.

റഷ്യൻ എണ്ണ ഇറക്കുമതി കുറയ്ക്കേണ്ട സാഹചര്യമുണ്ടായാൽ കൂടുതൽ വിലയ്ക്ക് മറ്റ് രാജ്യങ്ങളിൽ നിന്ന് ക്രൂഡ് ഓയിൽ വാങ്ങേണ്ടിവരുന്നത് ഇന്ത്യയുടെ ഇറക്കുമതി ചെലവ് ഉയർത്തിയേക്കാം. ഇന്ത്യയും യുഎസും തമ്മിലുള്ള വ്യാപാര കരാർ ചർച്ചകളെയും പുതിയ നിയമം ബാധിക്കാനുള്ള സാധ്യതയുണ്ട്.

എന്നാൽ തീരുവ ഭീഷണിക്ക് വഴങ്ങില്ലെന്ന സൂചനയാണ് കേന്ദ്ര വിദേശകാര്യ മന്ത്രാലയം നൽകിയത്.