ഇസ്ലാമോഫോബിയക്കെതിരായ യുഎൻ പ്രമേയത്തിൽ നിന്ന് വിട്ടുനിന്ന് ഇന്ത്യ

 

ഇസ്ലാമോഫോബിയക്കെതിരെ ഐക്യരാഷ്ട്ര സഭയില്‍ പാക്കിസ്ഥാന്‍ കൊണ്ടുവന്ന കരട് പ്രമേയത്തില്‍ നിന്ന് വിട്ടുനിന്ന് ഇന്ത്യ. 193 അംഗ ജനറൽ അസംബ്ലി വെള്ളിയാഴ്ച പാകിസ്ഥാൻ അവതരിപ്പിച്ച 'ഇസ്‌ലാമോഫോബിയയെ ചെറുക്കാനുള്ള നടപടികൾ' എന്ന പ്രമേയം അംഗീകരിച്ചിരുന്നു. 115 രാജ്യങ്ങൾ അനുകൂലിച്ചും ആരും എതിർക്കാതെയും ഇന്ത്യ, ബ്രസീൽ, ഫ്രാൻസ്, ജർമ്മനി, ഇറ്റലി, ഉക്രെയ്ൻ, യുകെ എന്നിവയുൾപ്പെടെ 44 പേർ വിട്ടുനിന്നുമാണ് പ്രമേയം പാസായത്. ചൈനയുടെ പിന്തുണയോടെയാണ് പാക്കിസ്ഥാന്‍ പ്രമേയം അവതരിപ്പിച്ചത്.  ഹിന്ദുമതം, ബുദ്ധമതം, സിഖ് മതം എന്നിവ നേരിടുന്ന അക്രമത്തിലും വിവേചനത്തിലും ശ്രദ്ധ കേന്ദ്രീകരിക്കണമെന്നും പാക്കിസ്ഥാന്‍ പറഞ്ഞു.

 

യഹൂദ വിരുദ്ധത, ക്രിസ്ത്യൻ ഭയം, ഇസ്‌ലാമോഫോബിയ എന്നിവയാൽ പ്രചോദിതമായ എല്ലാ പ്രവർത്തനങ്ങളെയും അപലപിക്കുന്നതായും എന്നാൽ അത്തരം ഭയങ്ങൾ അബ്രഹാമിക് മതങ്ങൾക്കപ്പുറത്തേക്ക് വ്യാപിക്കുന്നുണ്ടെന്ന് അംഗീകരിക്കേണ്ടതുണ്ടെന്നും യുഎന്നിലെ ഇന്ത്യയുടെ സ്ഥിരം പ്രതിനിധി രുചിര കാംബോജ് പറഞ്ഞു. പതിറ്റാണ്ടുകളായി, അബ്രഹാമിക് മതങ്ങളുടെ അനുയായികളെയും മതവിദ്വേഷം ബാധിച്ചിട്ടുണ്ടെന്നതിന് വ്യക്തമായ തെളിവുകൾ ഉണ്ടെന്നും ഇത് മതവിദ്വേഷത്തിന്‍റെ സമകാലിക രൂപങ്ങൾക്ക്, പ്രത്യേകിച്ച് ഹിന്ദു വിരുദ്ധ, ബുദ്ധ വിരുദ്ധ, സിഖ് വിരുദ്ധ വികാരങ്ങളുടെ ആവിർഭാവത്തിന് കാരണമായെന്നും അവർ പറഞ്ഞു.

 

 

ഐക്യരാഷ്ട്രസഭയെ മത ക്യാമ്പുകളായി വിഭജിക്കാൻ സാധ്യതയുള്ള പ്രത്യേക മതങ്ങളുമായി ബന്ധപ്പെട്ടിരിക്കുന്ന ഫോബിയകളെ കേന്ദ്രീകരിച്ചുള്ള നിരവധി പ്രമേയങ്ങൾക്ക് കാരണമായേക്കാവുന്ന ഒരു മുൻവിധി സ്ഥാപിക്കാൻ പ്രമേയം അംഗീകരിക്കരുതെന്നാണ് ഇന്ത്യ പറഞ്ഞത്. ലോകത്തെ ഒരു ആഗോള കുടുംബമായി ആലിംഗനം ചെയ്തുകൊണ്ട് സമാധാനത്തിന്‍റെയും ഐക്യത്തിന്‍റെയും കൊടിക്കീഴിൽ നമ്മെ ഒന്നിപ്പിക്കുന്നതിനുപകരം ഛിന്നഭിന്നമാക്കാൻ ശേഷിയുള്ള ഇത്തരം മതപരമായ ആശങ്കകൾക്ക് മുകളിൽ യുഎൻ നിലപാട് ഉയര്‍ത്തിപിടിക്കേണ്ടത് നിർണായകമാണെന്നും കംബോജ് പറഞ്ഞു. ആഗോളതലത്തിൽ നിലനിൽക്കുന്ന മതപരമായ വിവേചനത്തിന്‍റെ വിശാലമായ വ്യാപ്തി പരിഗണിക്കാൻ എല്ലാ അംഗരാജ്യങ്ങളോടും ഇന്ത്യ ആഹ്വാനം ചെയ്യുകയും ചെയ്തു.

 

“ഇസ്ലാമോഫോബിയയുടെ പ്രശ്നം പ്രാധാന്യമുള്ളതാണെങ്കിലും, മറ്റ് മതങ്ങളും വിവേചനവും അക്രമവും നേരിടുന്നുണ്ടെന്ന് നാം അംഗീകരിക്കണം. ഇസ്‌ലാമോഫോബിയയ്‌ക്കെതിരെ പോരാടുന്നതിന് മാത്രം അനുവദിക്കുന്നത്, മറ്റ് വിശ്വാസങ്ങൾ നേരിടുന്ന സമാന വെല്ലുവിളികളെ അവഗണിക്കുന്നത് ഒഴിവാക്കലിന്‍റെയും അസമത്വത്തിന്‍റെയും തോന്നലുകള്‍ ഇതര മതസ്ഥര്‍ക്കിടയില്‍ സൃഷ്ടിക്കും ”– കാംബോജ്. 

 

1.2 ബില്യണിലധികം അനുയായികളുള്ള ഹിന്ദുമതം, 535 ദശലക്ഷത്തിലധികം വരുന്ന ബുദ്ധമതം, ലോകമെമ്പാടുമുള്ള 30 ദശലക്ഷത്തിലധികം അനുയായികളുള്ള സിഖ് മതം എന്നിവയെല്ലാം മതവിദ്വേഷത്തിന് വിധേയമാണെന്ന് കാംബോജ് യുഎൻ ജനറൽ അസംബ്ലിയിൽ പറഞ്ഞു. ഗുരുദ്വാരകൾ, ആശ്രമങ്ങൾ, ക്ഷേത്രങ്ങൾ തുടങ്ങിയ മത ആരാധനാലയങ്ങൾക്കെതിരായ വർധിച്ചുവരുന്ന ആക്രമണങ്ങള്‍ പല രാജ്യങ്ങളിലും അബ്രഹാമിക് ഇതര മതങ്ങൾക്കെതിരെ വിരുദ്ധതകൾ ഉണ്ടാവുന്നുവെന്നതിന് തെളിവുകളാണെന്നും കാംബോജ് പറഞ്ഞു. ബാമിയൻ ബുദ്ധന്മാരുടെ നാശം, ഗുരുദ്വാര പരിസരങ്ങളിലെ ലംഘനങ്ങൾ, ഗുരുദ്വാരകളിലെ സിഖ് തീർത്ഥാടകരുടെ കൂട്ടക്കൊല, ക്ഷേത്രങ്ങൾക്കെതിരായ ആക്രമണങ്ങൾ, ക്ഷേത്രങ്ങളിൽ വിഗ്രഹങ്ങൾ തകർക്കുന്നതിന്‍റെ മഹത്വവൽക്കരണം എന്നിവയെല്ലാം അബ്രഹാമിക് ഇതര മതങ്ങൾക്കെതിരായ മതവിദ്വേഷത്തിന്‍റെ സമകാലിക രൂപങ്ങളുടെ വളർച്ചയ്ക്ക് കാരണമാകുന്നുവെന്നും 2001 മാർച്ചിൽ താലിബാൻ അഫ്ഗാനിസ്ഥാനിലെ ബാമിയാന്‍റെ ഭീമാകാരമായ ബുദ്ധ പ്രതിമകൾ തകർത്തത് ആഗോള അപലപനത്തിന് കാരണമായയെന്നും അവർ കൂട്ടിച്ചേര്‍ത്തു.

 

 

യഹൂദ വിരുദ്ധത, ക്രിസ്ത്യൻ ഭയം, അല്ലെങ്കിൽ ഇസ്‌ലാമോഫോബിയ എന്നിങ്ങനെയുള്ള എല്ലാത്തരം മതവിദ്വേഷത്തിനും എതിരായി ഇന്ത്യ നിലകൊള്ളുന്നുവെന്നും കാംബോജ് പറഞ്ഞു. "ഞങ്ങൾ എല്ലാ ഹിന്ദു വിരുദ്ധ, ബുദ്ധ വിരുദ്ധ, സിഖ് വിരുദ്ധ വികാരങ്ങൾക്കെതിരെയും നിലകൊള്ളുന്നു." മുസ്‌ലിംകൾക്കെതിരായ വിവേചനം, വിദ്വേഷം അല്ലെങ്കിൽ അക്രമം എന്നിവയ്‌ക്കെതിരായ പ്രേരണ, വിശുദ്ധ ഗ്രന്ഥത്തെ അവഹേളിക്കുന്ന സംഭവങ്ങൾ, പള്ളികൾ, സൈറ്റുകൾ, ആരാധനാലയങ്ങൾ എന്നിവയ്‌ക്കെതിരായ ആക്രമണങ്ങൾ, മറ്റ് മതപരമായ അസഹിഷ്ണുത, നിഷേധാത്മക സ്റ്റീരിയോടൈപ്പ്, വിദ്വേഷം, മുസ്‌ലിംകൾക്കെതിരായ അക്രമം എന്നിവയെയും പ്രമേയം അപലപിച്ചു. 

 

ഇസ്‌ലാമോഫോബിയയെ ചെറുക്കാൻ യുഎൻ പ്രത്യേക പ്രതിനിധിയെ നിയോഗിക്കണമെന്ന് യുഎൻ സെക്രട്ടറി ജനറൽ അന്‍റോണിയോ ഗുട്ടെറസിനോട് അഭ്യർത്ഥിക്കുകയും ചെയ്തു. ഒരൊറ്റ മതത്തിന്‍റെ അടിസ്ഥാനത്തിൽ പ്രത്യേക ദൂതൻ എന്ന പദവി സൃഷ്ടിക്കുന്നതിനെ തത്ത്വത്തിൽ എതിർക്കുന്നുവെന്നാണ് ഇതിനെക്കുറിച്ച് ഇന്ത്യ അഭിപ്രായപ്പെട്ടത്. അത്തരമൊരു സ്ഥാനം സ്ഥാപിക്കുന്നതിന്‍റെ സാമ്പത്തിക പ്രത്യാഘാതങ്ങളെയും കാംബോജ് ചൂണ്ടിക്കാട്ടി. വൈവിധ്യമാർന്ന മതങ്ങളെ ഉൾക്കൊള്ളുന്ന ബഹുസ്വരവും ജനാധിപത്യപരവുമായ രാഷ്ട്രമെന്ന നിലയിൽ ഇന്ത്യ, വിശ്വാസത്തിന്‍റെ പേരിൽ പീഡിപ്പിക്കപ്പെടുന്നവരുടെ അഭയകേന്ദ്രമായി ദീർഘകാലം പ്രവർത്തിച്ചിട്ടുണ്ടെന്നും അവർ പറഞ്ഞു. ബുദ്ധമതക്കാരോ ജൂതന്മാരോ മറ്റേത് മത വിശ്വാസികള്‍ ആയാലും ഇന്ത്യയിൽ പീഡനമോ വിവേചനമോ ഇല്ലാത്ത ഒരു സങ്കേതം സ്ഥിരമായി കണ്ടെത്താന്‍ അവര്‍ക്ക് സാധിച്ചിട്ടുണ്ടെന്നും അവർ പറഞ്ഞു.

 

ജൂതന്മാർക്കും ന്യൂനപക്ഷ ക്രിസ്ത്യൻ സമൂഹങ്ങൾക്കും മറ്റു പലർക്കും എതിരായ മേൽക്കോയ്മ പ്രത്യയശാസ്ത്രങ്ങളിലും ആക്രമണങ്ങളിലും യുഎൻ മേധാവി ആശങ്ക പ്രകടിപ്പിച്ചു. ഒരു കൂട്ടരോടുള്ള വിദ്വേഷം മറ്റൊരു കൂട്ടരോടുള്ള വെറുപ്പിന് ആക്കം കൂട്ടുന്നു. വെറുപ്പ് വിദ്വേഷത്തെ സാധാരണമാക്കുന്നു. വിദ്വേഷം നമ്മുടെ സമൂഹത്തിന്‍റെ ഘടനയെ നശിപ്പിക്കുന്നുവെന്നും അദ്ദേഹം പറഞ്ഞു. 

 

India Abstains From Voting On UN Resolution On Islamophobia. Here's Why