അഫ്ഗാനിസ്ഥാനില് താലിബാനെ നേരിടാന് ആയുധമെടുത്ത വനിതാ ഗവര്ണര്മാരില് ഒരാളായ സലീമ മസാരിയെ പിടികൂടിയതായി റിപ്പോര്ട്ട്. അവരുടെ നിലവിലെ അവസ്ഥയെന്താണെന്ന് വ്യക്തതയില്ല. അഫ്ഗാനിലെ മറ്റു നേതാക്കള് രാജ്യം വിട്ടപ്പോഴും ബല്ക്ക് പ്രവിശ്യ വീഴുന്നതു വരെ സലീമ ചെറുത്തുനിന്നിരുന്നു. കാബൂളിന്റെ നിയന്ത്രണം ഏറ്റെടുത്ത ശേഷമാണ് സലീമയെ താലിബാന് പിടികൂടിയതെന്നാണു റിപ്പോര്ട്ട്. അഫ്ഗാനിലെ മൂന്നു വനിതാ ഗവര്ണര്മാരില് ഒരാളാണ് സലീമ.
മറ്റു പല പ്രവിശ്യകളും വലിയ എതിര്പ്പ് കൂടാതെ താലിബാനു മുന്നില് കീഴടങ്ങിയപ്പോള് സലീമയുടെ നേതൃത്വത്തില് ബല്ക്ക് പ്രവിശ്യയിലെ ചഹര് കിന്റ് ജില്ല ശക്തമായ ഏറ്റുമുട്ടല് നടത്തി. അവസാനഘട്ടം വരെ താലിബാനു കീഴടങ്ങാതെനിന്ന സ്ത്രീകള് നേതൃത്വം നല്കുന്ന ഏകമേഖലയായിരുന്നു ചഹര് കിന്റ്. രാജ്യത്തെ സ്ത്രീകള്ക്കിടയില് ഏറ്റവും സ്വാധീനമുള്ള നേതാക്കളില് ഒരാളാണ് സലീമ.
കഴിഞ്ഞ വര്ഷം സലീമയുടെ ഇടപെടലിനെ തുടര്ന്ന് 100 താലിബാന് പ്രവര്ത്തകര് കീഴടങ്ങിയത് വലിയ ചര്ച്ചയായിരുന്നു. സോവിയറ്റ് യുദ്ധകാലത്ത് അഫ്ഗാനില്നിന്ന് ഇറാനിലേക്കു കടന്ന കുടുംബത്തില്പെട്ടയാളാണ് സലീമ. ഇറാനില് ജനിച്ച അവര് ടെഹ്റാന് സര്വകലാശാലയില്നിന്നാണ് ബിരുദം നേടിയത്. തുടര്ന്ന് അവിടുത്തെ സര്വകലാശാലകളില് ജോലി ചെയ്തിരുന്നു.