ഒന്ന് ഉറക്കമുണര്ന്നപ്പോഴേയ്ക്കും ദേ മക്കളേ ഇന്സ്റ്റഗ്രാം മുഴുവന് 80'S ഗ്രാമമായി മാറിയിരിക്കുന്നു. ഇതെന്നതാ സംഭവം എന്ന് മനസ്സിലാക്കാന് കുറച്ച് സമയം മാറ്റിവെച്ചവരായിരിക്കും നമ്മളില് പലരും. സെലിബ്രിറ്റികളും രാഷ്ട്രീയ നേതാക്കളുമൊക്കെ ഈ ട്രന്ഡിന് പിന്നാലെ കൂടിയിരിക്കുകയാണ്. സംഭവമെന്താണെന്ന് ഇനിയും പിടി കിട്ടാത്തവര്ക്ക് പറഞ്ഞുതരാം, സോഷ്യൽ മീഡിയയിൽ റെട്രോ തരംഗമടിച്ചിരിക്കുന്നു. അതെ, AI ഉപയോഗിച്ച് 70, 80, 90കളിലേയ്ക്ക് ഒരു തിരിച്ചുപോക്ക് നടത്തുകയാണ് എല്ലാവരും.
പഴയ ഫാഷന് കൊണ്ടുവരികയല്ല ഇത്തവണ ചെയ്തിരിക്കുന്നത്. ഈ തിരിച്ചുപോക്കിന് പിന്നിൽ എഐ ആണ്. റെട്രോ ഫാഷനും പഴയകാല ഹെയർസ്റ്റൈലുകളും ഫോട്ടോഗ്രാഫി ശൈലികളുമാണ് എഐ വഴി തിരിച്ചെത്തിച്ചിരിക്കുന്നത്.
ChatGPT പോലുള്ള AI ഉപകരണങ്ങളുടെ സഹായത്തോടെ ആളുകൾ തങ്ങളുടെ ഇന്നത്തെ ഫോട്ടോകളെ വിവിധ ദശകങ്ങളിലെ പഴയകാല ഛായാചിത്രങ്ങളാക്കി മാറ്റുകയാണ്. ഇതിനായി ഒരു സാധാരണ ഫോട്ടോയും അതിന് അനുയോജ്യമായ കൃത്യമായ ഒരു പ്രോംപ്റ്റും മതിയാകും. മുഖത്തിന്റെ അടിസ്ഥാന സവിശേഷതകൾ നിലനിർത്തിക്കൊണ്ട് മുടി, വസ്ത്രം, മേക്കപ്പ്, ലൈറ്റിംഗ്, പശ്ചാത്തലം, ഫോട്ടോയുടെ ടെക്സ്ചർ എന്നിവ ഒരു പ്രത്യേക കാലഘട്ടത്തിനനുസരിച്ച് മാറ്റാൻ AI-യ്ക്ക് കഴിയും.
സെലിബ്രിറ്റികളും രാഷ്ട്രീയ നേതാക്കളുമടക്കം നിരവധി പേരാണ് ഈ വൈറൽ ട്രെൻഡിന്റെ ഭാഗമാകുന്നത്. AI ഉപയോഗിച്ച് സൃഷ്ടിച്ച റെട്രോ ലുക്കിലുള്ള ചിത്രങ്ങൾ സോഷ്യൽ മീഡിയയിൽ പങ്കുവെയ്ക്കുന്നതോടെ ട്രെൻഡിന് കൂടുതൽ ജനപ്രീതിയും ലഭിച്ചിരിക്കുകയാണ്. ആഭ്യന്തര മന്ത്രി രമേശ് ചെന്നിത്തലയും, മന്ത്രി ഒ.ജെ. ജനീഷ്, മുൻ മന്ത്രി വി. ശിവൻകുട്ടി എന്നിവരും ഇത്തരത്തിലുള്ള രൂപാന്തരപ്പെടുത്തിയ ചിത്രങ്ങൾ തങ്ങളുടെ സോഷ്യൽ മീഡിയ പേജുകളിൽ പങ്കുവെച്ചിട്ടുണ്ട്.
80-കളിലെ സ്റ്റൈൽ വേണോ?നിങ്ങളും ഒന്ന് പരീക്ഷിച്ചുനോക്കൂ...
1980-കളിലെ ഹൈസ്കൂൾ ഇയർബുക്ക് ഫോട്ടോയുടെ ലുക്ക് സ്വന്തമാക്കാൻ ഈ പ്രോംപ്റ്റ് പരീക്ഷിക്കാം
പ്രോംപ്റ്റ്: അപ്ലോഡ് ചെയ്ത സെൽഫിയിൽ നിന്ന് 1980-കളിലെ ഒരു ആധികാരിക ഹൈസ്കൂൾ ഇയർബുക്ക് പോർട്രെയ്റ്റ് സൃഷ്ടിക്കുക. വ്യക്തിയുടെ മുഖം, മുഖസവിശേഷതകൾ, തിരിച്ചറിയാവുന്ന സ്വഭാവങ്ങൾ, ഭാവം എന്നിവ കഴിയുന്നത്ര അതേപടി നിലനിർത്തുക. കാലഘട്ടത്തിന് അനുയോജ്യമായ രീതിയിൽ മുടി, മേക്കപ്പ്, വസ്ത്രം, ലൈറ്റിംഗ്, പശ്ചാത്തലം എന്നിവ മാത്രം മാറ്റുക. 1980-കളിലെ സ്റ്റുഡിയോ ഫോട്ടോഗ്രാഫിയുടെ സ്വാഭാവിക നിറങ്ങളും മൃദുവായ ലൈറ്റിംഗും പഴയ ഇയർബുക്ക് ഫോട്ടോകളുടെ ലളിതമായ പശ്ചാത്തലവും ഉൾപ്പെടുത്തുക. ചിത്രം യഥാർത്ഥ കാലഘട്ടത്തിൽ എടുത്തതുപോലെ തോന്നണം.
70-കളിലെ റെട്രോ ലുക്ക് വേണോ?
1970-കളിലെ ഡിസ്കോ കാലഘട്ടത്തിന്റെ വിന്റേജ് ഭാവം ചിത്രത്തിലേയ്ക്ക് കൊണ്ടുവരാനും AI ഉപയോഗിക്കാം.
പ്രോംപ്റ്റ്: എന്റെ ഫോട്ടോ 1970-കളിലെ ഒരു റെട്രോ പോർട്രെയ്റ്റായി പുനഃസൃഷ്ടിക്കുക. വ്യക്തിയുടെ മുഖവും മുഖസവിശേഷതകളും തിരിച്ചറിയാവുന്ന സ്വഭാവങ്ങളും നിലനിർത്തുക. വൈഡ് കോളറുള്ള പാറ്റേൺ ചെയ്ത ഷർട്ട്, കാലഘട്ടത്തിന് അനുയോജ്യമായ വലിയ റെട്രോ ഹെയർസ്റ്റൈൽ, സ്വാഭാവികമായ വിന്റേജ് മേക്കപ്പ്, ഊഷ്മളമായ അനലോഗ് കളർ ടോണുകൾ എന്നിവ ഉപയോഗിച്ച് 1970-കളിലെ ക്ലാസിക് ഡിസ്കോ ലുക്ക് നൽകുക. പഴയ ഫിലിം ക്യാമറയിൽ പകർത്തിയതുപോലുള്ള സൂക്ഷ്മമായ ഫിലിം ഗ്രെയിൻ, മൃദുവായ കോൺട്രാസ്റ്റ്, സ്വാഭാവികമായ വിന്റേജ് ഫോട്ടോ ടെക്സ്ചർ എന്നിവ ചേർക്കുക.
90-കളിലെ നൊസ്റ്റാൾജിക് ലുക്ക് വേണോ?
90-കളുടെ ഫാഷനും പോളറോയ്ഡ് ഫോട്ടോഗ്രാഫിയുടെ പ്രത്യേക ഭാവവും ഇഷ്ടപ്പെടുന്നവർക്ക് ഈ പ്രോംപ്റ്റ് ഉപയോഗിക്കാം.
പ്രോംപ്റ്റ്: എന്റെ ഫോട്ടോ 1990-കളിലെ സൗന്ദര്യശാസ്ത്രത്തിൽ പുനഃസൃഷ്ടിക്കുക. വ്യക്തിയുടെ മുഖവും മുഖസവിശേഷതകളും ഭാവവും തിരിച്ചറിയാവുന്ന സ്വഭാവങ്ങളും മാറ്റാതെ നിലനിർത്തുക. ക്ലാസിക് 90-കളിലെ ആൾട്ടർനേറ്റീവ് ഫാഷൻ, കാഷ്വൽ ഡെനിം അല്ലെങ്കിൽ ഫ്ലാനൽ വസ്ത്രങ്ങൾ, കാലഘട്ടത്തിന് അനുയോജ്യമായ നൊസ്റ്റാൾജിക് ഹെയർസ്റ്റൈൽ എന്നിവ ഉപയോഗിച്ച് സ്റ്റൈൽ ചെയ്യുക. മ്യൂട്ടഡ് കളർ ടോണുകൾ, നേരിയ ഫിലിം ഗ്രെയിൻ, പഴയ പോളറോയ്ഡ് ക്യാമറ ഫോട്ടോ പോലുള്ള സ്വാഭാവികമായ അനലോഗ് ഫിനിഷ് എന്നിവ ചേർക്കുക.
ഒരു പ്രോംപ്റ്റ്, ഒരു ഫോട്ടോ, ഒരു കാലഘട്ടത്തിലേക്കുള്ള യാത്ര
റെട്രോ ഫാഷൻ വീണ്ടും ജനപ്രീതി നേടുന്നതിനൊപ്പം AI ഫോട്ടോ എഡിറ്റിംഗ് ഉപകരണങ്ങളും കൂടുതൽ സൃഷ്ടിപരമായ സാധ്യതകളാണ് തുറന്നുകൊടുക്കുന്നത് എന്ന് വേണം മനസ്സിലാക്കാന്. ഇന്നത്തെ ഒരു സാധാരണ സെൽഫിയെ 70-കളിലെയോ 80-കളിലെയോ 90-കളിലെയോ കാലഘട്ടത്തിലെ ഫോട്ടോയാക്കി മാറ്റാൻ ഇനി പഴയ ക്യാമറയോ സ്റ്റുഡിയോയോ ആവശ്യമില്ല. ശരിയായ പ്രോംപ്റ്റ് നൽകിയാൽ, ഒരു ഫോട്ടോയ്ക്ക് പിന്നിലെ കാലഘട്ടം തന്നെ മാറുകയാണ്.