അനിയത്തിപ്രാവ് എന്ന ചിത്രത്തിലൂടെ മലയാളികളുടെ മനസിലേക്ക് സ്പ്ലെന്ഡര് ഓടിച്ചെത്തിയ നടനാണ് കുഞ്ചാക്കോ ബോബന്. തെണ്ണൂറുകളുടെ അവസാനം സിനിമയിലേക്ക് എത്തിയതാണെങ്കിലും ഇന്നും മലയാള സിനിമയുടെ ചോക്ലേറ്റ് ഹീറോയാണ് ഈ 49കാരന്. ഇപ്പോഴിതാ കുഞ്ചാക്കോ ബോബനുമൊത്തുള്ള ഒരു ബാലന്റെ മനം നിറയ്ക്കുന്ന ദൃശ്യങ്ങളാണ് സോഷ്യല് മീഡിയയില് വൈറല്.
ആലപ്പുഴ ലിയോ തേർട്ടീന്ത് സ്കൂള് ഓഡിറ്റോറിയത്തിൽ ഓപ്പറേഷൻ തൂഫാനോടനുബന്ധിച്ച് നടന്ന ചടങ്ങിനിടെയായിരുന്നു ഈ മനോഹര കാഴ്ച. വിദ്യാര്ഥികളിലൊരാള് കുഞ്ചാക്കോ ബോബനെ കെട്ടിപിടിക്കുന്നതും ഉമ്മകൊടുക്കുന്നതുമാണ് വിഡിയോയിലുള്ളത്. ആദ്യം വേദിയിലേക്ക് എത്തിയ കുട്ടി നടന് റോസാപ്പൂ കൊടുക്കുകയും കെട്ടിപിടിക്കുകയും ചെയ്യുന്നുണ്ട്. പിന്നീട് അപ്രതീക്ഷിതമായി ഓടിവന്ന് കുഞ്ചാക്കോ ബോബനെ കെട്ടിപ്പിടിച്ച് ചുബിച്ചു. അതിന് ശേഷം 'ഇത് ഞങ്ങടെ അങ്കിളാ...' എന്ന് ബാലന് എല്ലാവരോടുമായി പറയുന്നുമുണ്ട്. ഇരുവരും ഒന്നിച്ചുള്ള ഈ ഹൃദ്യമായ ദൃശ്യങ്ങള് സൈബര് ലോകം ഇതിനോടകം ഏറ്റെടുത്തുകഴിഞ്ഞു. ആ സ്നേഹം പോരേ ചാക്കോച്ചന് എന്നും, മനം നിറയ്ക്കുന്ന കാഴ്ചയെന്നുമെല്ലാം വിഡിയോയ്ക്ക് ചുവടെ ആളുകള് കമന്റ് ചെയ്തിട്ടുണ്ട്.
ചടങ്ങിൽ മുഖ്യാതിഥിയായി എത്തിയതായിരുന്നു കുഞ്ചാക്കോ ബോബൻ. ആഭ്യന്തര മന്ത്രി രമേശ് ചെന്നിത്തലയായിരുന്നു ഉദ്ഘാടകൻ. ചെന്നിത്തലയോടും സംസാരിച്ചാണ് വിദ്യാര്ഥി മടങ്ങിയത്.
കുഞ്ചാക്കോ ബോബനും ലിജോമോള് ജോസും ആദ്യമായി ഒന്നിച്ച 'ഉന്മാദം' സിനിമയുടെ പ്രചാരണാർഥമായിരുന്നു ചാക്കോച്ചൻ ചടങ്ങിനെത്തിയിരുന്നത്. ഷാഹി കബീര് സംവിധാനം ചെയ്ത ഏറ്റവും പുതിയ ചിത്രമാണ് ഉന്മാദം. ക്രൈം ത്രില്ലര് ജോണറില് കഴിഞ്ഞ ദിവസം തിയറ്ററുകളിലെത്തിയ ഉന്മാദത്തിന് മികച്ച അഭിപ്രായമാണ് ലഭിക്കുന്നത്. ഷെല്ലി എന്ന പൊലീസ് ഓഫീസറെയാണ് കുഞ്ചാക്കോ ബോബൻ ഉന്മാദത്തില് അവതരിപ്പിച്ചിരിക്കുന്നത്.