shahrukhkhan-new-home-building

ഏവര്‍ക്കും പരിചിതമാണ് ഷാരൂഖ് ഖാന്‍റെ മുംബൈയിലെ 'മന്നത്ത്' വീട്. ലോകമെങ്ങുമുള്ള ആരാധകര്‍ ദിവസവും ഷാരൂഖിനെ കാണാനും അദ്ദേഹത്തിന്‍റെ വീടിന്‍റെ പുറത്തുനിന്ന് ഒരു ചിത്രമെടുക്കാനുമൊക്കെയായി ഇവിടെ എത്താറുണ്ട്. ഇപ്പോഴിതാ, വീടിന് ചില മാറ്റങ്ങള്‍ വരുത്താനൊരുങ്ങുകയാണ് താരം.  നിലവിലുള്ള വീട്ടില്‍ രണ്ട് നിലകള്‍ കൂടി നിര്‍മിക്കാനാണ് ഷാരൂഖ് ഖാന്‍റെ പദ്ധതിയെന്നാണ് റിപ്പോര്‍ട്ടുകള്‍. 

നിര്‍മാണാനുമതിക്കായി  ഷാരൂഖിന്‍റെ ഭാര്യ ഗൗരി ഖാന്‍ മഹാരാഷ്ട്ര കോസ്റ്റല്‍ സോണ്‍ മാനേജ്‌മെന്‍റ് അതോറിറ്റിക്ക് അപേക്ഷ സമര്‍പ്പിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. നവംബര്‍ 9-നാണ് ഗൗരി ഖാന്‍ അപേക്ഷ സമര്‍പ്പിച്ചത്.   616.02 ചതുരശ്ര മീറ്ററാണ് വസതിയില്‍ അധികമായി കൂട്ടിച്ചേര്‍ക്കുന്നത്. റിപ്പോര്‍ട്ടുകള്‍ അനുസരിച്ച് 25 കോടിയാണ് നിര്‍മാണ ചെലവായി കണക്കാക്കുന്നത്. അപേക്ഷ പ്രന്‍സിപ്പല്‍ സെക്രട്ടറി പ്രവീണ്‍ ഡറാഡെയുടെ നേതൃത്വത്തിലുള്ള കമ്മിറ്റി ബുധനാഴ്ച തീരുമാനമെടുക്കും.

2011-ലാണ് വില്ല വിയന്ന എന്നറിയപ്പെട്ടിരുന്ന ആറുനിലവീട് ഷാരൂഖ് വാങ്ങുന്നത്. 26,328 ചതുരശ്ര അടി വിസ്തീര്‍ണമുള്ള വീട് 13 കോടി നല്‍കിയാണ് താരം സ്വന്തമാക്കിയത്.  പിന്നീട്  'മന്നത്ത്' എന്ന് വീടിനെ പുനര്‍നാമകരണം ചെയ്തു. ഗൗരി ഖാന്‍ തന്നെയാണ് വീടിനകം ഡിസൈന്‍ ചെയ്തിരിക്കുന്നത്. വീടിന്‍റെ നെയിംപ്ലേറ്റ് പോലും വളരെ ആകര്‍ഷകമാണ്. ലോകത്താകമാനമുള്ള കൗതുകവസ്തുക്കളും കലാവസ്തുക്കളും കൊണ്ടാണ് വീടിനകം അലങ്കരിച്ചിരിക്കുകയാണ്.

വലിയ വൈറ്റ് പില്ലറുകളും, ഫ്രഞ്ച് ടൈപ്പ് ജനാലകളും, മികച്ച ഡിസൈനിങ് ലൈറ്റുകളും മന്നത്ത് വീടിന്‍റെ സവിശേഷതയാണ്. ബെയ്ജ്, ക്രീം, വെള്ള, തവിട്ട് മുതലായ ഇളംനിറങ്ങളാണ് വീടിനകത്ത് ഉപയോഗിച്ചിരിക്കുന്നത്.  ബംഗ്ലാവിന്‍റെ പുറംവശത്ത് വെള്ള പെയിന്‍റാണ് അടിച്ചിരിക്കുന്നത്. കുട്ടികള്‍ക്കായ പ്രത്യേകം പ്ലേ റൂമുകളും, കൂടാതെ,  ലൈബ്രറി, പ്രൈവറ്റ് ബാര്‍, തിയേറ്റര്‍ എന്നിവയും വീടിനുള്ളിലുണ്ട്.  ഇന്‍റീരിയല്‍ ഡിസൈനര്‍ എന്ന രീതിയില്‍ ഗൗരി യാത്ര തുടങ്ങിയതും മന്നത്തില്‍ നിന്നാണെന്ന് ഷാരൂഖ് മുന്‍പ് വെളിപ്പെടുത്തിയിട്ടുണ്ട്.

ENGLISH SUMMARY:

Shah Rukh Khan is planning to add two more floors to his house