ജോസ് ഏട്ടായി ഒരു വരവ് കൂടി വരും ,‘ടർബോ 2 ഉണ്ടാകും’ ; വൈശാഖ്

മമ്മൂട്ടി നായകനായി തിയറ്ററുകളില്‍ മികച്ച വിജയം നേടിയ ടര്‍ബോ സിനിമയ്ക്ക് രണ്ടാം ഭാഗമുണ്ടാകുമെന്ന് സംവിധായകന്‍ വൈശാഖ്. ഷാര്‍ജയില്‍ നടന്ന സിനിമയുടെ വിജയാഘോഷ പരിപാടിയില്‍ സംസാരിക്കവെയാണ് വൈശാഖ് സിനിമയ്ക്ക് രണ്ടാം ഭാഗമുണ്ടാകുമെന്ന് വ്യക്തമാക്കിയത്. 

സിനിമയില്‍ ജോസ് ഏട്ടായി എന്ന കഥാപാത്രമായാണ് മമ്മൂട്ടി എത്തിയത്. ചിത്രത്തിന്‍റെ ക്ലൈമാക്‌സില്‍ ഒരു രണ്ടാം ഭാഗത്തിനുള്ള സൂചന ഇട്ടാണ് അവസാനിച്ചത്. ഇതോടെയാണ് സിനിമയ്ക്ക് രണ്ടാം ഭാഗമുണ്ടാകുമോ എന്ന ചോദ്യം ഉയര്‍ന്നത്. അതിനുള്ള വൈശാഖിന്റെ മറുപടി ഇങ്ങനെയായിരുന്നു. ഒരു വിജയചിത്രത്തിന്റെ സംവിധായകനെന്ന നിലയില്‍ ഇവിടെ വന്ന് നില്‍ക്കുന്നത് സന്തോഷമുള്ള കാര്യമാണ്. ടര്‍ബോ വിജയിപ്പിച്ച എല്ലാവര്‍ക്കും ആയിരമായിരം നന്ദി. സിനിമയ്ക്ക് വേണ്ടി ആത്മാര്‍ഥമായി പരിശ്രമിച്ച എല്ലാവര്‍ക്കും നന്ദി. പ്രധാനമായും മമ്മൂട്ടി ഈ സിനിമയ്ക്ക് വേണ്ടി ഒട്ടേറെ അദ്ധ്വാനിച്ചിട്ടുണ്ട്. നിങ്ങളെല്ലാവരും അനുഗ്രഹിച്ചാല്‍ സിനിമയുടെ രണ്ടാം ഭാഗം ഉടനെ തന്നെയുണ്ടാകും വൈശാഖ് വ്യക്തമാക്കി.